Read MAASAI REVISED PROTESTANT Isaya 11 Bible Online

Isaya 11 - MAASAI REVISED PROTESTANT bible

Isaya 11

¹Kepuku enkaitubului te nkobei e Yese, nebulu olng'osila te nena tona enyena.

²Naa ketonie Enkiyang'et o Laitoriani shumata ninye, enkiyang'et e ng'eno o enkarriyiano, enkiyang'et e utaroto o enkidimata, enkiyang'et e ng'eno o euriata o Laitoriani.

³Ore enchipai enye naa euriata o Laitoriani. Nemedung ninye enkiguana too naadol inkonyek enyena, aashu edung too naaning too nkiyiaa enyena;

⁴kake too sipat ninye eiguanare ilaisinak, neikok ninye te mborron lelo oobor ootii enkop; naa kear ninye enkop te ng'udi e nkutuk enye, near ilo arruoni metua te nkiyang'et e nkutuk enye.

⁵Esipata naaku enkeene e mpolos enye, naa ina kisiligata naisiligayu ninye naaku enkeene narreten ninye.

⁶Neton osuyiani te nebo olkuoo le ker, neirrag olowuaru keri te nebo olkuoo le kine, ore olashe o lng'atuny neirrag te nebo nerikoo enkiti kerai ninche.

⁷Ore enkiteng o lng'arurumi ng'iro nedaa te nebo; ore lasho lenye neirrag te nebo, ore olng'atuny neaku nkujit enya anaa olkiteng.

⁸Neiguran enkerai nanakita te nkutuk e ngumoto o lasurai, nepik enkerai kiti enkaina enye enkutuk e engumoto e nturbubua.

⁹Meiko ninche ae nemeinyal tiatua ilo doinyo lai pooki sinyati; amu keiput enkop eyiolounoto o Laitoriani, anaa enaiputa inkariak enaiposha.

¹⁰Ore kenya teina olong naa keitashe entonai e Yese anaa enkitoduaaroto too loreren; keaku ninye eing'oru iloreren, ore emanyisho enye neaku ewueji e nkitoo.

¹¹Ore kenya teina olong naa keitorioo Olaitoriani enkaina enye aigil eniare, pee errinyu ilo pisiai apa otelekua loo ltung'ana lenyena, aitung'uaa Asiria o Misiri o Patros o Etiopia o Elam o Shina o Hamat, neitung'uaa sii olomanaa le naiposha.

¹²Naa kedumaki ninye nkuapi olmonekie pee eiturrurru lelo apa ooidapashari le Israel, neiturrur lelo ooidapashari le Yuda meetu aaing'uaa ilubot pokira ong'uan e nkop.

¹³Keiwuang ilo lom le Efraim, ore lelo ooiture Yuda neiwuang'ieki; meigil Efraim aatayie olom Yuda, nemeigil Yuda aiture Efraim.

¹⁴Naa keor ninche ebaiki oloililai loo filisti te nkalo o loo ntoluo, neibung'a ninche te nebo aaidaikie iltung'ana lo loosaen. Nepik ninche inkaik enye enkop e Edom o Moab, ore ile Amon neiruk ninche.

¹⁵Naa keishie Olaitoriani katukul olkina le naiposha e Misiri; naa keyuk ninye enkaina enye te shumata olkeju le frati, te ilo kutati lenye opejisho, naa keosh ninye aitaa inong'ot naapishana pee eim iltung'ana anaa enkop natoyio.

¹⁶Naa keaku keetae enkoitoi kitok naing'uaa Asiria, te nkaraki ilo pisiai otelekuaki loo ltung'ana lenyena, ina kata apa pee epuonu ninche eing'uaa enkop e Misiri.