Read MAASAI REVISED PROTESTANT Isaya 13 Bible Online

Isaya 13 - MAASAI REVISED PROTESTANT bible

Isaya 13

¹Ele olkilikuai oipirta Babilon apa otabolokoki Isaya olayioni le Amos.

²Ore te nchumata e ndoinyo naisiasha tudumu olmonekie tabuaku nchiraki ninche; iyuku ninche te nkaina metijing'u nena shomito oo lkituaak.

³Aitanapa nanu makewan lelo gelunot laainei, aipotuo nanu lelo tung'ana laainei magil, pee eitalaku engoro ai te lelo latagorokine.

⁴Toning'o embuakunoto too ldoinyo eba anaa eno lorora kitok! Toning'o, embuakunoto oo nkitoriat, e lelo oshon oosoto te nebo! Olaitoriani loo lororani oitobirita olarrabal.

⁵Kepuonu ninche eing'uaa enkop nalakua, eing'uaa enkiting'oto e keper, nelotu Olaitoriani eeta iruparen enyena pee eidaikie enkop pooki.

⁶Enteyietu enchira amu etataana enkolong o Laitoriani; pee elotu ina kidaata naing'uaa olmagilani!

⁷Ore te nkaraki ina kelepori inkaik pooki, neiropijaa empijan e pooki tung'ani.

⁸Naa keiputukuny ninche. Nejing ninche emion naikununo anaa ene nkitok nasaisai. Neing'ura ninche maate to lkirutoto; neiput enkurruna nkomomi enye.

⁹Ng'ura ajo kelotu enkolong o Laitoriani, ina olong torrono e ngoro o empijan e mpushuna, pee eitaa enkop olmuaate neidaikie lelo aing'okok lenyena aishie.

¹⁰Amu ore ilakir le keper, nemeitoki aaishoru ewang'an enye; nemisimisu enkolong eilepu nemeitoki olapa aitawang'isho te wang'an enye.

¹¹Kaitame nanu enkop te nkaraki eng'oki enye, naitame lelo arruok te nkaraki enkarruoisho enye; kaiting'ie nanu ilo wuasa le lelo ooitokoos, naitadou nanu olwuasa le lelo ooing'ola.

¹²Kaitaa nanu iltung'ana iloodoorieki anaa saabu nasila netiu iltung'ana anaa saabu e Ofir.

¹³Ore te nkaraki ina kaikirikirie nanu keper, neigusugusieki enkop teine wueji enye, teina goro o Laitoriani loo lororani teina olong e ngoro enye napi.

¹⁴Ore anaa entarakuet narreshitoi, aashu anaa nkerra nemeetae oltung'ani oiturrur, keibelekenyakino ake oltung'ani olorere lenye, neisik ake oltung'ani alo enkop enye.

¹⁵Ore oloba anaa oloinepuni neari metua; ore oloba anaa oloibung'i nebatata to lalem.

¹⁶Ore nkera enye kutiti naa kedung'udung'i te dukuya inkonyek enye, keibung'i nkajijik enye, ore nkituaak enye neikonyi.

¹⁷Ng'ura ajo kaputu nanu lelo le Amedi metarasaki ninche, lelo lemeshilaa enkosholai; nemeshipakino saabu.

¹⁸Inkai enye naar ilbarnot metuata; nemeing'urrie ninche ina natii enkoshoke e ng'otonye; ore nkonyek enye nemeeta olng'ur too nkera kutiti.

¹⁹Ore Babilon, ina kitoo oo nkitoriat, ina kishiaa nawuasare Ilkaldayo, nelo atiu anaa Sodom o Gomora ina kata te nenang'aa Enkai ninche.

²⁰Meigili aekata aamany ninye aashu aatoni tiatua ninye too ishoritin pooki; meetae Olmarabui oigil aun olng'obor lenye teine; nemeetae ilairritak loo ntare ooigil aairragie nkerrai enye teine.

²¹Kake ing'uesi e ntim naapuo aairrag teine, ore inkajijik enye neiput inkeenta enkop; nemany isidan ine, neitigiran ntarakueti teine.

²²Nekueni ilng'ojiniaa too ltaleta lenyena, nebuaku mbariak too nkajijik sidain e nkitoo; etataana ina kata enye, nemeimutieki nena olong'i enyena.