Read MAASAI REVISED PROTESTANT Isaya 21 Bible Online

Isaya 21 - MAASAI REVISED PROTESTANT bible

Isaya 21

¹Olkilikuai oipirta Babilon. Ore anaa enadumunye olkutati te Negeb neor enkop, eing'uaa olpurkel, ina kop torrono oleng.

²Aatolikioki nanu te nduaata entoki torrono; keisimisho olaisimani, neinyalisho olainyalani. Ilepa shomo iyie Elam, irraga kitang'aduaki, iyie Media; ore lelo sinaitin pooki ooyaua ninye kaishie nanu.

³Ore te nkaraki ina aaiputa nanu olkirutoto; aaibung'a nanu emion naikununo anaa ene nkitok nasaisai; atashala nanu o metaa meekure aning'isho, airuto nanu o metaa meekure adolisho.

⁴Aaisurito endukuya, aaiputa nanu olkirutoto, ore enteipa duoo naanyita neibelekenye aaku enkiputukuny.

⁵Eitobira ninche emisa, eisalaasha ninche ilkarash oopiki oltiren, nedaa ninche neokisho. Entudumunye intae, lo kituaak, eelie long'oi eilata!

⁶Amu nji nanu aatiaaka Olaitoriani: “Shomo ngero olarriponi, nchoo ninye elimu aibalunye ina nadol.

⁷Te nedol ninye ilakedok, lelo akedok loo mbartan epuo maare o lakedok loo sirkon o lakedok loo ntamesin, nchoo ninye einining'isho asipu, nchoo esipu oleng.”

⁸Ore ilo otoduaa neyietu ajo: “Te nchumata oltalet orripishoreki nanu aitashe, anaake te ndama iyie o Laitoriani. Ore te siaai ai natii nanu nkewarietin pooki.

⁹Ore kiti kata nadol epuonu ilakedok, nadol ilakedok loo mbartan epuonu maare!” Newal ninye ajo, “Etabatate, etabatate Babilon, ore nena kitanyaanyukot enyena oo nkaitin, netarrarrakinote enkop.”

¹⁰Lo tung'ana laainei, kulo ooidong'oki neipiripiri, ore ina natoning'o nanu to Laitoriani loo lororani, ina Ai e Israel, atolikio nanu intae.

¹¹Olkilikuai ele oipirta Edom. Etii obo oipotisho te Seir, nejo, “Lo arriponi, kejaa enkewarie? Lo arriponi, kejaa enkewarie?”

¹²Nejo ilo arriponi: “Kelotu enkakenya nelotu sii enkewarie. Tenaa ilo aikilikuanisho, nkilikuanisho; nyaaki torrinyunye.”

¹³Olkilikuai oipirta Arabia. Too sanagi le Arabia intae ipuopuo aairrag, na tamesin oo le Dedan.

¹⁴Eyaki enkare ilo oata enkure, entanang'are lelo aisikak endaa, intae kulo oomanya enkop e Tema.

¹⁵Amu eisika ninche aaing'uaa ilalema, aailany ina shutati o lalem, neilany ina awuo nakurruno, neilany ilo arrabal otirrisha.

¹⁶Amu inji nanu aatiaaka Olaitoriani, “Ore te rishata o lari obo, te risioroto oo larin le nkigeroto, ore ina kitoo pooki e Kedar naa keiting;

¹⁷ore lelo ooleku, le lelo tung'ana magil oong'oroo mbaa Kedar naa keaku kuti; amu Olaitoriani, Enkai e Israel, nairoro.”