Read MAASAI REVISED PROTESTANT Isaya 22 Bible Online

Isaya 22 - MAASAI REVISED PROTESTANT bible

Isaya 22

¹Olkilikuai oipirta oerata le nduaata. Kainyoo ena? Eji ishomo intae shumata, ishomo pooki nchumat oo nkajijik,

²iyie enabore enkilepilep, na anasa ena nailugo, na ang ena nabore eng'ida? Ore lelo tung'ana linono ootaraki neme to lalem, neme to larrabal etuata.

³Eisika ilaitoriak linono pooki te nebo, eibung'aki eitu ninye eng'oroo embae. Ore intae pooki ooinepuaki neibung'aki, hoo neisika ninche aapuo enelakua.

⁴Ore te nkaraki ina atejo nanu: “Mbelekenyayu miking'or nanu, nchooki nanu maishira olkiyioi le mion; mintanaur kewan kintigir nanu, te nkaraki enkidaata o lorere lang.”

⁵Amu Olaitoriani Enkai oo lororani neeta enkata e nkiputukuny o enkitunyoto o enkinyalata tiatua ilo erata le nduaata, nena naauroo isunta e nkanasa, nebaiki embuaakinoto ildoinyo.

⁶Ore Elam nenap imootiani ekedito ngarrin oo mbartan, ore Kir nebolu ilong'oi.

⁷Ore lelo erat linono sidain neiput ngarrin oo mbartan, ore ilakedok loo mbartan netumoki nkitashot too nchomito.

⁸Eiwuang'ie ninye elong'o e Yuda. Ore apa teina olong ning'oru iyie iruparen te nkaji e ntim.

⁹Nidol ajo eikumok ilusien e nkanasa e Daudi, nioku enkare too lchorroi li abori,

¹⁰ninken inkajijik e Yerusalem, nigil inkajijik pee ishet esuntai aitagol.

¹¹Nintobir olchumati le nkare te rishata e nena sunta pokira are. Kake eitu ing'or ilo apa oitobira ilo shorro, neitu ishilaa ilo oipirua kuna pooki apa moitie, laa ninye oishoo metaa.

¹²Ore apa teina olong neipotu Olaitoriani Enkai oo lororani olkiyioi o enkishirata, nebarni iltung'ana te nkaraki osina neishop ilkuniyiani;

¹³naa ng'ura, eng'ida o enchipai o eyieng'ata oo lmong'i o lkerra, enkinosata oo nkiri o eokoto e naisho oo sabibu. Ijojo: “Matadaata iyiook nikiokisho, amu ore taaisere nikiye.”

¹⁴Eibalunye Olaitoriani Enkai oo lororani kewan too nkiyiaa aainei: “Kesipa ore ena kitarruorroto mikipalakini iyie o metaba anaa niye.” Olaitoriani loo lororani ojo.

¹⁵Nji ejo Olaitoriani Enkai oo lororani, “Wou, shomo enetii ele aitasheikinoni, shomo enetii Shebna laa ninye oitasheiki enkaji, nijoki ninye:

¹⁶Kainyoo iasita tene? Naa kaing'ae iata iyie tene, kaing'ae nikitonyorrikia taguetaki kewan enkurare. Ee, iyie, ilo oturu enkurare te wueji e Shumata, niguetu enimany te ndapidapoi?

¹⁷Tayiolo ajo eikinang'aa iyie Olaitoriani aiturraa, lo tung'ani ele ogol. Ekimbung ninye akurraki,

¹⁸nikiyuk ninye aitamanaa anaa empira anang'aki enelakua; nilo aye teine. Naa ine epuo aatii nena garrin inono oo mbartan, iyie ilo ora enkurruna e nkaji o lkitok lino.

¹⁹Kaanang'aa nanu iyie teine niaasishore, nikintadouni te ilo orika le shumata.

²⁰“Ore kenya teina olong naa kaipotu nanu osinka lai Eliakim olayioni le Hilkia,

²¹naishopoki nanu ninye olkila lino, narreten nanu ninye te nkimeita ino, ore enkitoria ino naitarasaki nanu ninye. Naa keaku ninye papa te lelo oomanya Yerusalem o te nkaji e Yuda.

²²Naiteleiki nanu oloililai lenye olbolet le nkaji e Daudi; ore enebol ninye nemeetae oloiken, ore eneeiken nemeetae olobol.

²³Naa kaitasheyie nanu ninye netiu anaa encheitoi nauno oleng, neaku ninye olorika le nkitoo te nkaji e papaai lenye.

²⁴Neitanapi ninye olola le nkaji e papaai lenye pooki, eishoi pooki o nkera, ebaiki nkikompeni o metabaiki nkukurto e nkare.

²⁵Ore kenya teina olong, Olaitoriani loo lororani ojo, ore ina sheitoi apa natuunoki oleng nelolong'u, nedotunye asulunye; ore ilo ola apa oikare nesulunye adou, amu Olaitoriani oiroro.”