Read MAASAI REVISED PROTESTANT Isaya 23 Bible Online

Isaya 23 - MAASAI REVISED PROTESTANT bible

Isaya 23

¹Olkilikuai ele oipirta Tiro. Enteyietu enchira na melin e Tarshishi, amu eitomijoonoki Tiro neaku metii enkaji aashu ewueji neitasheyieki! Ore ebaiki enkop e Kupro eibalakinyeki ninche.

²Entirring'ata intae kulo oomanya olomanaa le naiposha, lo ainyiang'ak le Sidon, etalang'a apa lelo lirriwaitie intae enkare nepuo ninche aaim inkariak kumok;

³ore ropiyiani inyi naa ina tapa e Shihor, ina kesare o lkeju le Nail; iyie apa olbiasharai loo loreren.

⁴Tukurru iyie Sidon, amu eiroro enaiposha, ine nerripieki enaiposha ejo, “Eitu nanu atum emion e saisai neitu aisho, neitu nanu aitubulu ilayiok aashu intoyie.”

⁵Te nelotu ilo omoni Misiri, nejing ninche osina te nkaraki ilo omoni oipirta Tiro.

⁶Entulusoi enchom Tarshishi, enteyietu enchira, intae lelo oomanya olomanaa le naiposha.

⁷Kena ninye enkanasa ino e ng'ida, naa ore enkiterunoto enye naa apa moitie, ore nkejek enyena netanapa ninye meshomo amanyisho te nkop nalakua?

⁸Kaing'ae oipirua ena, agilunore Tiro, naa ninye naishooyo maupen e nkitoo. Ore apa lelo ainyiang'ak lenyena naa eikituaak, ore lelo amirak lenyena naa ilooyanyiti te nkop?

⁹Eipirua Olaitoriani loo Lororani ina pee einyal ilo wuasa ena kitoo pooki, nesul ilo pooki oyanyiti te nkop.

¹⁰Iremo enkop ino anaa olkeju le Nail, natito e Tarshishi; meekure eetae entoki nikimbooyo.

¹¹Eitorioyie ninye enkaina enye aitalang enaiposha, eigirigirie ninye nkitoriat; eishorua Olaitoriani enkitanapata naipirta Kanaan, pee eidaikie lelo sempewueti lenyena.

¹²Nejo ninye: “Mingil aekata iyie ang'ida natito ena natusulaki e Sidon; tudumunye shomo Kupro, ore ake sii teine milo atum enkiyeng'iyeng.”

¹³Ng'ura ina kop oo Lkaldayo! Ilo orere apa, mme ile Asiria, oopuo aaishooyo Tiro metaa enoo lowuarak le ntim. Neirrag ninche aang'adu ninye, nerasaki nena ajijik enyena e nkitoo, neing'uaa ina anasa etaa enkidaata.

¹⁴Teyietu nchira iyie Tarshishi, amu ore osempewuet lino neitomijoonoki.

¹⁵Ore kenya teina olong, nemeitokini aadamu Tiro too larin ntomoni naapishana, naaba anaa nkolong'i o laiguanani obo. Ore te siadi lelo arin ntomoni naapishana netiu te Tiro anaa enatiu te ilo sinkolio le mulayoi:

¹⁶“Tudumu enkawuo oo sinkoliotin, tamanimanai te nkanasa, na mulayoi ena nemedamuni! Taranyisho to ltoilo sidai, taranya isinkolioitin kumok, pee kitumi aatadamu.”

¹⁷Ore te siadi ilarin ntomoni naapishana naa kelotu Olaitoriani abaiki Tiro. Naa kerrinyokino ninye olekoisiaayio lenye, nelo aiborrie onyek te nena kitoriat e nkop naatii oriong e nkop.

¹⁸Ore ina biashara enye o lekoisiaayio lenye neiteng'elakini Olaitoriani; meshumi ninye nemeirragieki aaisudoo, kake ore ina biashara enye kelo ainyiang'u endaa sapuk o nkilani sidain ainyang'aki lelo ootoni te dukuya Olaitoriani.