Read MAASAI REVISED PROTESTANT Isaya 24 Bible Online

Isaya 24 - MAASAI REVISED PROTESTANT bible

Isaya 24

¹Ng'ura ajo kelo Olaitoriani ainyal enkop neitaa mijooni, naa kelo aibelekeny neidapash lelo oomanya.

²Naa ore ina nalo atiu too ltung'ana, naa neijia etiu to lapolosani; ore enatiu to rrindik, neijia etiu to lkitok lenye, ore enatiu te nkaisiaayiani, neijia etiu teina naigero ninye, ore enatiu te ilo oinyang'isho, neijia etiu te ilo omirisho, ore enatiu te ilo oisilenisho neijia etiu te ilo oisilenokini, ore enatiu te ilo oishooyo esile, neijia etiu te ilo oisilenokini.

³Keitomijooni enkop katukul neitarruorri oleng; amu eiroro Olaitoriani ele ororei.

⁴Eishirita enkop neisha, etemene enkop nalulung'a neisha, etemene shumata amitari te nebo o enkop.

⁵Etaa enkop olminong, ti abori lelo oomanya; amu etigila ninche nkitanapat, negolong'aki nena kikoot, negil ilo ning'o loo ntarasi.

⁶Ore te nkaraki ina keibung oldeket enkop, ore lelo oomanya kemeyu te nkaraki enkitarruorroto enye; ore naa kepejori lelo oomanya enkop, naa ilkuti ake elekuni.

⁷Eishirita enaisho oo sabibu, ore olchani loo sabibu netasara, ore lelo apa oong'ida nejing osina.

⁸Ore oltoilo le nkinanta netigire, ore ilo toilo le nchipai netigire, ore oltoilo lo lwulul loo usin neitigiraki.

⁹Meigil aekata aaok enaisho oo sabibu eranyisho; keduaru ina aisho napi te lelo ook.

¹⁰Ore ina anasa naing'oling'ole neturori ninye, eikenoki pooki aji metaa meetae olojing.

¹¹Etasapuka olkiyioi too nkoitoi naalala e nkanasa, eiting'o enaisho oo sabibu; neishieki eng'ida pooki; neishieki enchipai pooki e nkop.

¹²Eitomijoonoki enkanasa, etigilaki nchomito aainyal.

¹³Amu ena nalo aaku te mpolos e nkop, tiatua loshon, ore anaa enaigusugusieki oloirien, o anaa enasotuni ilng'anayio to sabibu.

¹⁴Neilepie ninche iltoiloishi lenye, neranyisho te ng'ida; ore te nkitoo o Laitoriani kebuaku ninche te nkalo o loo ntoluo.

¹⁵Ore naa te nkalo o loo saen nchoo Olaitoriani enkitoo; ore to lomanaa le naiposha nchoo Olaitoriani enkitoo, Enkai e Israel.

¹⁶Ore too neeiting'ie enkop nikining'oo isinkolioitin le nkisisa, le nkitoo te ilo Obo Osipa. Kake atejo nanu, “Aibiitiari nanu, aibiitiari nanu. Woi kewan ai! Amu ore lelo aitang'orok netarasutua, etarasutua ilaitang'orok oleng.”

¹⁷Olkirutoto o engumoto o rreshet shumata iyie, shumata iyie ilo omanya enkop!

¹⁸Ore ilo oilanyisho to ltoilo lo lkirutoto, naa kelo adoiki engumoto; naa ore ilo oilepu te ngumoto neibung orreshet. Amu etaboloki ilusien e shumata, ore olkitamanyunot le nkop neikirikira.

¹⁹Etigiligilaki enkop tukul, etabee neaku mbelibelat, eikirikirieki enkop oleng.

²⁰Eyukuyukori enkop anaa olamerani, etotiwuo anaa enkaji nakutita osiwuo; etii nkitarruorot enyena shumata ninye, naa kenang'aa ninye nemeigil adumunye.

²¹Ore kenya teina olong naa kelo Olaitoriani aitame olorora le shumata te keper, nelo aitame ilaiguanak le nkop teinakop.

²²Neiturrurri ninche te nebo anaa ilooena te ngumoto; neikenori ninche te jila, ore te siadi nkolong'i kumok neitamei ninche.

²³Neitomisimisi olapa nemeitoki enkolong awang'u; amu Olaitoriani loo lororani olo aitoreisho to ldoinyo le Sion o te Yerusalem, naa ore te dukuya ilpayiani lenyena nelo ninye aibalunye enkitoo enye.