Read MAASAI REVISED PROTESTANT Isaya 26 Bible Online

Isaya 26 - MAASAI REVISED PROTESTANT bible

Isaya 26

¹Ore kenya teina olong nepuoi aarany ele sinkolio te nkop e Yuda: “Kiata iyiook enkanasa nagol; eishoo ninye iyiook enjeunoto naikununo anaa sunta enkang nagol

²Entabol nchomito, pee etum ilo osho loo sipat oibung enkirukoto aimu.

³Nchoo iyie meitiring'ayu te seriani, ilo laa iyie edamu te nkaraki nikisiliga ninye iyie.

⁴Isiliga Olaitoriani ntarasi, amu ore Olaitoriani Enkai, naa endapidapoi oo ntarasi.

⁵Amu eitadowuo ninye lelo ooilepie ate ina anasa naitokoos. Eitadowuo ninye, etanang'aka ninye enkop, nenang'aki enterit.

⁶Eitunyito nkejek ninye, nkejek e lelo aisinak, iroruat e lelo oomena.”

⁷Keitoriori enkoitoi e ilo asipani; itooro iyie enkoitoi e ilo asipani.

⁸Ina oitoi oo nkiguanat inono kiaanyunyie iyiook, iyie Olaitoriani; ina arna nikidamunye iyie, ninye eyieunoto oo ltauja lang.

⁹Iyie eng'uar oltau lai kewarie, ore enkishui ai tiatua nanu naa iyie eing'oru. Ore enkata natii nkiguanat inono enkop, neiteng'enuo lelo oomanya enkop te sipata.

¹⁰Tenaa keitoduaaki ilo torrono olng'ur, meyiolou aekata ninye esipata; ore tiatua enkop oo sipat, neas ake ntorrok, nemedol enkitoo o Laitoriani.

¹¹Yie Olaitoriani, eilepieki enkaina ino, kake medol ninche. Nchoo ninche metoduaa olom too ltung'ana linono, nekurru ninche. Nchoo ina kima te nkaraki ilmang'ati linono enya ninche.

¹²Iyie Olaitoriani, intobiraki iyie iyiook eseriani, iyie oishoo iyiook nena siaaitin ang pooki.

¹³Iyie Olaitoriani Enkai ang, eitoria apa iyiook kulikae aitoriak leme iyie, kake enkarna ino ake kewan kiyiolo iyiook.

¹⁴Etuata ninche, nemeitoki aapiu, etaa ninche iloipi, nemeigil ninche aaitashe; ore teina, itaara iyie ninche aishie, niwuang'ie ninche pee meigili ai kata aadamu.

¹⁵Kake itoponayie iyie ilo orere, Olaitoriani, itoponayie iyie ele orere; kintaaki iyie kitok; intalala iyie ilpolosien lena kop.

¹⁶Iyie Olaitoriani, ore to sina niking'oru ninche iyie, nebuku ninche enkomono, ina kata etii enkitamioto shumata ninche.

¹⁷Ore anaa entuaa natashala, neyietu aishir te mion e saisai, neijia iyiook kitiu te nkaraki iyie, Olaitoriani;

¹⁸kitunutate apa iyiook, kitasaisayia, kitotiutuo anaa eikitoiutuo enkijape. Mikiaata enkordunoto nikiyautua enkop, ore lelo oomanya enkop neitu ebatata.

¹⁹Ore lelo linono ootuata naa kepiu kedumunye aaitashe iseseni lenye. Lo tung'ana kulo oomanya atua enterit, enyoito entaranyisho te ng'ida! Amu ore ina oileelio ino naa enkoileelio e wang'an, ore teina kop e nemeneng'a naa ilo iyie aitopiu ninche.

²⁰Wootu lo tung'ana laainei, entijing ilgilat linyi, ninkenikene nkutukie oo nkajijik, esudori intae maate te nkiti rishata o metaba anaa nelusoo ina goro.

²¹Kelotu Olaitoriani aipang'u te wueji enye pee elotu aitame lelo oomanya enkop te nkaraki enkarruoisho enye. Ore enkop nelo aibalunye ilo sarge apa oibukoyioki ti oriong ninye, nemeigil ae kata aitemoo lelo apa ootaraki metuata.