Read MAASAI REVISED PROTESTANT Isaya 3 Bible Online

Isaya 3 - MAASAI REVISED PROTESTANT bible

Isaya 3

¹Ng'ura ajo ore Olaitoriani, Olaitoriani loo lororani, naa keiwuang'ie te Yerusalem o te Yuda, ina naisiligi o ina naishuyieki, eneisiligi te ndaa o enkare;

²ilo tung'ani magilani o sikari o larishani o loiboni le Nkai o laitumusumusoni o lpayian kitok

³ilo arikoni le njore e onom o ilo tung'ani oata enkitoo, ilo arikoni o ilo arriyia too nkitoduaat, o ilo arriyia te naibon.

⁴Naa kaitaa nanu ilayiok ilkituaak lenye, naa inkera kutiti naapuo aaitore ninche.

⁵Naa kepuo iltung'ana aaibookino enkop maate, neitorogony ake oltung'ani olikae oltung'ani ake ole latia enye; neitokoos olbarnoti te dukuya olpayian, neitokoos oltung'ani li abori te dukuya ilo kitok.

⁶Kelotu enkata naibung oltung'ani olalashe lenye tiatua enkaji e menye, ejo, “Iata iyie olkila; iyie olo aaku olarikoni lang, ore ele sototi pooki le nkidaata naa keaku abori enkitoria ino.”

⁷Ore teina olong naa keiro ninye ajo, “Maaku nanu olabaani, ore atua enkaji aimetii endaa nemetii olkila; mikintaa intae nanu olarikoni loo ltung'ana.”

⁸Amu etarrorre Yerusalem, netabatate Yuda; te nkaraki naa ore nkirorot enye o nkiaasin enye negilunore Olaitoriani, nemor dukuya nkonyek enyena.

⁹Ilo kep lenye oishakenoki ninche; keibalunye ninche ing'ok enye anaa Sodom, meisudoo ninche. Woi ninche Amu eyautua entorroni shumata ate.

¹⁰Tiaaki lelo asipak inchere aisidain imbaa tialo ninche, amu kenya ninche ilng'anayio loo nkiaasin enye.

¹¹Woi ilo tung'ani torrono! Kerruoyo mbaa te ninye, amu ore enaba anaa enataasa inkaik enyena, ina eyookini aaitaas ninye.

¹²Ore too ltung'ana laainei, inkera naaitorogony ninche, naa nkituaak naaitore ninche. Lo tung'ana laainei, eitapong'oitie intae ilarikok linyi, neitapong'oo inkoitoi inyi.

¹³Eitasho Olaitoriani pee eishankarra, eitasho pee eiguanare iltung'ana lenyena.

¹⁴Etijing'a Olaitoriani enkiguana aiguanare ilpayiani o lkituaak loo ltung'ana lenyena: “Intae apa ooinosa enkurma oo lng'anayio, ore nena nitoorutuo intae ilaisinak netii atua inkajijik inyi.

¹⁵Kainyoo intodolulu pee intorogonyonyo iltung'ana laainei, nindong'idong'o aarepeny inkomomi e lelo aisinak?” Olaitoriani Enkai oo lororani ojo.

¹⁶Etejo Olaitoriani: Ore te nkaraki naitokoos intoyie e Sion nepuo te nkitaragirag neing'orisho to lwuasa, neyagiyag epuoito eipidie inkejek enye.

¹⁷Keosh Olaitoriani to lpepedoi nena lukuny oo ntoyie e Sion, naa keibalunye Olaitoriani emasipaisho enye.

¹⁸Ore kenya teina olong naa keiwuang'ie Olaitoriani nena masaa naang'idare,

¹⁹o lmiintoni o lkataarri o nkarash oo murto; o nkarash

²⁰oo lukuny o sekenke oo nkaik o ntoren o ltuleta le sonkoyo o ntaleng'o

²¹o lelo giso oomishira o lgiso loo nkumeishin;

²²o lelo kilani loo siruai, lelo karash lioriong o lelo kilani o lbenia loo nkaik;

²³o lelo kilani oobebek, o lelo kilani oopuyiapui o nkarash oo lukuny o lelo karash ooimulumulieki inkonyek.

²⁴Ore te rishata e rropili naa eng'uan; ore te rishata e nkeene e mpolos naa olgosoi; naa ore te rishata oo lpapit ooitobiraki, naa enkurroto; naa ore te rishata o olkila sidai naa enkishopo oo lkuniyiani; naa ore te rishata e nkikishaan naa enkurruna.

²⁵Ore ilewa linyi naa kebatat olalem nemuta lelo lewa linyi magil to larrabal.

²⁶Ore nchomito e nkanasa neyietu aaishir; neirrag ninye te nkop meishopo.