Read MAASAI REVISED PROTESTANT Isaya 31 Bible Online

Isaya 31 - MAASAI REVISED PROTESTANT bible

Isaya 31

¹Woi ninche lelo oodoyio aapuo Misiri aaing'oru eretoto, neisilig mbartan, lelo oong'idare ngarrin oo mbartan eji amu aikumok, o lelo akedok loo mbartan eji amu kegol ninche oleng, kake meisilig ninche Ilo Sinyati le Israel, aashu eikilikuanishore ninye!

²Naa ng'en ake sii ninye neyau enkidaata, merrinyokino ninye irorei lenyena, kake kedumakino ninye ina aji oo larruok, nedumakino lelo aretok le lelo oas entorroni.

³Ore lelo le Misiri naa iltung'ana, mme Enkai; ore nena bartan enye naa nkiri, mme nkiyang'eta. Te neitorioo Olaitoriani enkaina enye, neikirikira ilo oretisho, ore ilo oretitoi nebatata, neidaaya pooki te nebo.

⁴Amu nji nanu aatiaaka Olaitoriani, “Ore anaa enaikurrukur olng'atuny anaa olkuoo lo lng'atuny teina ng'ues natara, naa te neipotuni olturrur loo lairritak meetu aarare ninye, nemeiture ninye nena buakunot enye aashu eirutie enkilepilep enye, neijia eikununye Olaitoriani te nedou alotu aitayu olarrabal te nchumata oldoinyo le Sion, o te shumata endoinyo enye.

⁵Ore anaa enaitoip emotonyi inkera enyena neijia eiko Olaitoriani loo Lororani emitu Yerusalem; kerrip neitajeu ninye, kemitu nekordu ninye.”

⁶Embelekenyakinoto ilo apa litogolong'akita oleng, lo tung'ana loo Siraeli.

⁷Amu ore kenya teina olong, naa kenang'aa pooki ng'ae nena kitanyaanyukot enyena oo nkaitin e nkosholai, o nkitanyaanyukot e saabu, apa naaitobirutua nkaik inyi too ng'ok, te nkaraki intae.

⁸“Naa kebatata ile Asiria to lalem leme ole tung'ani; keidakie ilo alem leme ole tung'ani ninye; naa kelo ninye ailany ilo alem, ore elelero enye nepuoi aapik esinkaisho.

⁹Ore ilo oitaa ninye endapidapoi neisik to lkirutoto, ore lelo kituaak lenyena neilanyisho aaing'uaa inankan enye te nkiputukuny.” Neijia ejo Olaitoriani otii enkima enye Sion netii olkokuet lenye atua Yerusalem.