Read MAASAI REVISED PROTESTANT Isaya 32 Bible Online

Isaya 32 - MAASAI REVISED PROTESTANT bible

Isaya 32

¹Kepuku olaiguanani oitoreisho too sipat, nepuo ilkituaak aaitoreisho too nkiguanat naasipa.

²Kelo ake atiu te pooki lenye anaa eneigarae te nkaraki olkutati, olchurie te nkaraki olkutati, netiu anaa nchorroi oo nkariak te nkop natoyio, netiu anaa oloip le ndapidapoi kitok te nkop e nauri.

³Ore nkonyek e lelo oodol nemeitokini aaiken, ore nkiyiaa e lelo ooning nening.

⁴Ore oltau le ilo opuny netum mbarakinot, ore olng'ejep le ilo oiramiram neiro aitorioki.

⁵Nemeigili aajo oltung'ani omoda kedupa, nemeji lelo aisimak eji keleng.

⁶Amu mbaa e modai eiro olmodai nedamu mbaa e ntorroni to ltau lenye; pee etum ataasa ntorrok, neiro mbaa naapaashaa tialo Olaitoriani, neing'uaa lelo ooisumash meeta toki, nemitiki ilo oata enkure enkare.

⁷Ore enkeleekisho e ilo kiminchali naa entorroni, entorroni eipiru ninye pee einyal ilo omena too rorei le lejare, hoo duoo ninye tenaa kesipa ewalata e ilo omena.

⁸Kake ore ilo supat neiro mbaa e supatisho, ore too mbaa e supatisho neitashe ninye.

⁹Enyoito intae kuna kituaak naaisikarra, entoning oltoilo lai; natoyie kuna nemeshilaa toki, entoning enkiroroto ai.

¹⁰Ore te nkiti rishata naba anaa olari obo, nipuopuo intae aatum enyamali, intae kuna naaiputakinote amu meitoki aatii ilng'anayio, meitoki atii enkikesare oo lng'anayio.

¹¹Enkirikirata intae nakituaak kuna naaisikarra, entayu nkilani metaa minchopopo, nirretenene ilkuniyiani.

¹²Entooshiosh ilgooitie linyi te nkaraki nena kurman sidain, te nkaraki nena kurman oo sabibu naatoishete oleng.

¹³Ore teina kurma oo ltung'ana laainei nebulu ilkiku o endiati ee too nkajijik e nchipai teina anasa e ng'ida.

¹⁴Amu kepuoi aaing'uaa ina aji e nkitoo, neing'uari ina anasa naning'o; ore endoinyo o ine nerripishoreki nepuo aaku iwuejitin oo ng'uesi ntarasi, ewueji neitigiranie iloitikoishi, neaku ndaat oo nkerrai;

¹⁵ometaba anaa nebukokini iyiook Enkiyang'et naing'uaa shumata, nesidanu olpurkel aaku enkop naisho oleng, ore nkuapi naadupa neaku ijo ntimi.

¹⁶Netum taa esupatisho atamanya ina ong'ata, nemany eseriani atua ina kurma naisho.

¹⁷Ore esupatisho neiu eseriani, ore esupatisho neyau enkitirring'ata o nkirukoto ntarasi.

¹⁸Kepuo iltung'ana laainei aabik te manyisho e seriani ntarasi, tiatua ewueji e nkirrita oo wuejitin neeitirring'areki aayeng'iyeng'are.

¹⁹Ore entim neurori katukul, neurori katukul ina anasa.

²⁰Imayianana intae lelo oounisho te mbata oo nkariak pooki, lelo ooisho ilmong'i o sirkon eidapashari aapuo.