Read MAASAI REVISED PROTESTANT Isaya 38 Bible Online

Isaya 38 - MAASAI REVISED PROTESTANT bible

Isaya 38

¹Ore apa te nena olong'i nemuoyu Hesekia eneyieu eye. Nelo ilo oiboni le Nkai Isaya olayioni le Amos enetii ninye, nejoki ninye, “Nji ejo Olaitoriani; Ntobira enkaji ino, amu iye iyie, miinchiu.”

²Neibelekenyakino Hesekia esuntai neomon Olaitoriani nejo,

³“Tadamu taata Olaitoriani, aatasayia inchere ashomo nanu te dukuya iyie te nkisiligata pooki o to ltau pooki nataasa nanu ina sidai too nkonyek inono.” Neishir Hesekia oleng.

⁴Neitoki ororei lo Laitoriani alotu enetii Isaya, nejo,

⁵“Shomo tiaaki Hesekia, Nji ejo Olaitoriani Enkai e Daudi papaai lino: Atoning'o nanu enkomono ino, natoduaa nanu ilkiyio linono; kaponiki nanu enkishui ino ilarin tomon o miet.

⁶Kaakordu nanu iyie o ena anasa aitung'uaa inkaik o laiguanani le Asiria, namitu ena anasa.

⁷“Ele olmonekie te iyie oing'uaa Olaitoriani, nchere kelo Olaitoriani aas ena naisiligishore:

⁸Karrinyu nanu oloip iroruat tomon, teine netabaikia te wueji nekedi e Ahas.” Neaku etorrinye apa enkolong siadi iroruat tomon te wueji duoo netabaikia.

⁹Enkomono naigeri ena e Hesekia olaiguanani le Yuda, ina kata apa etamuoyia ninye nenyaaka aishiu:

¹⁰Atejo nanu eitoritote nkolong'i aainei etaa kalo; aipirakinore nanu kishomi enemeneng'a, too larin pooki le nkishui ai.

¹¹Najo nanu, madol Olaitoriani teina kop oo looishu; maigil aekata nanu adol iltung'ana tiatua lelo oomanya enkop.

¹²Etadotuoki emanyisho ai neiwuang'ieki te nanu, eikunaki anaa olng'obor lo lchekut; atununuko nanu enkishui ai anaa endapana, aaikuna nanu anaa enkila naitobiri te wueji neripishoreki; ore dama o kewarie nikiyau iyie nanu enkiting'oto.

¹³Aishira nanu o mekenyu aing'oru eretoto; negiligil ninye iloik laainei pooki anaa olng'atuny; ore dama o kewarie nikiyau iyie nanu enkiting'oto.

¹⁴Nabuaku nanu anaa emotonyi aishirita anaa enturkuluo, enaurate nkonyek aainei aimariri shumata. Iyie Olaitoriani, aaisoruoki nanu, taa iyie esarunoto ai!

¹⁵Kake kaa nanu ajo? Amu aairorie ninye nanu, netaasa ninye makewan ina. Eidurra njo aainei pooki te nkaraki ina mion o ltau lai.

¹⁶Iyie Olaitoriani, te kuna baa eishu iltung'ana, ore enkishui o ltau lai netii atua kuna pooki. Ooi, torrinyokoki nanu embiotisho nikincho manyaaki aishu!

¹⁷Kesipa te nkaraki eseriani ai apa pee anoto emion sapuk kake imbooyie iyie enkishui ai arishie ina gumoto e nkidaata, amu itanang'aka iyie ng'ok aainei oriong ino.

¹⁸Amu mikindim iyie enemeneng'a aishoo enashe, mikindim keeya aterrepa iyie. Ore lelo oopuo aadoiki engumoto nemeidim aaisiligisho, te nkaraki ina supatisho ino.

¹⁹Ore ilo oishu, ilo oishu, ninye likincho enashe, anaa enaasita nanu ena olong; neitayiolo menye nkera enyena esupatisho ino.

²⁰Kaaitajeu nanu Olaitoriani, naa eikipuo aaranyisho too nkinantani oo usin too nkolong'i pooki e nkishui ang te nkaji o Laitoriani.

²¹Netejo apa Isaya, “Nchoo ninche eya olkitushulati loo lng'abolo neelie ninche ilo dututai pee etum ninye aishiu.”

²²Netejo sii ninye Hesekia, “Kainyoo olmonekie nchere kalo nanu Enkaji o Laitoriani?”