Read MAASAI REVISED PROTESTANT Isaya 39 Bible Online

Isaya 39 - MAASAI REVISED PROTESTANT bible

Isaya 39

¹Ore apa teina kata neirriu Merodek-baladan olayioni le ilo aiguanani le Babilon olkilikuai eeta mpala o enkishooroto nayaki Hesekia, amu etoning'o apa ninye nchere etamuoyia nenyaaka aishiu.

²Neitoomon Hesekia ninche; neitodol ninche ina aji enye nashumishoreki; neitodol enkosholai o saabu o eilata nagol enkinyang'a o kulie tokitin te nebo imasaa o ruparen o nena pooki apa naatii atua ina aji enye nashumishoreki. Meetae apa entoki hoo nabo natii atua enkaji enye aashu ina ang enye pooki neitu eitodol ninche.

³Neitoki oloiboni Isaya alotu enetii olaiguanani Hesekia nejoki ninye, “Kainyoo etejo kulo tung'ana? Naa kaji eing'uaa pee epuonu enitii?” Nejo Hesekia, “Eetuo ninche eing'uaa enkop nalakua, Babilon eing'uaa.”

⁴Nejo ninye, “Kainyoo ninche etoduaa te nkaji ino?” Newal Hesekia ajo, “Etodua ninche nena pooki naatii atua enkaji ai; meetae entoki natii atua enkaji ai neitu nanu aitodol ninche.”

⁵Neitoki Isaya ajoki Hesekia, “Toning'o ororei lo Laitoriani loo lororani:

⁶Kepuonu nkolong'i naa ore nena pooki naatii atua enkaji ino o nena pooki apa naatushuma loo papaai linyi o metabaiki ena olong, naa kenapi aaya Babilon, meetae entoki naleku, Olaitoriani ojo.

⁷Ore embata e lelo ayiok linono likitoikioki naa keyai sii ninche. Naa kepuo aaku isunashi oogelema tiatua enkaji o laiguanani le Babilon.”

⁸Neitoki Hesekia ajoki Isaya, “Ore ilo rorei lo Laitoriani liroro iyie naa eisidai.” Amu etejo apa ninye, “Ketumi eseriani too nkolong'i aainei.”