Read MAASAI REVISED PROTESTANT Isaya 41 Bible Online

Isaya 41 - MAASAI REVISED PROTESTANT bible

Isaya 41

¹Entirring'ata entoning'oki nanu na kuapi, kuna o lmanie le naiposha; nchoo iltung'ana eitang'ejuk engolon enye; nchoo ninche enyiku, netum taa aairoro; maigutu pooki te nebo aanyikaki enkiguana.

²Kaing'ae otuputuo ilo obo oing'uaa enkalo o loosaen, laa ore ake enelo neisulu? Nepalaa ninye iloreren te dukuya ninye, pee etum ninye aitunyoi ilaiguanak atupudaki enkop; neitotiu ninye ninche anaa enterit to lalem lenye, netiu anaa isuut naatang'oroyioki te nkawuo enye.

³Nesujaa ninye ninche nelo agiroo te seriani, teina oitoi neitu aekata eroro nkejek enyena.

⁴Kalo ilo otaasa ena bae, aing'ae oitobira rishat o nkatitin? Nanu, Olaitoriani, ilo le dukuya, nara ole siadi; Nanu ilo.

⁵Etoduaa nkuapi o lomanaa le naiposha neureishoyu, eikirikira ineeiting'ie enkop; eetuo ninche aanyiku.

⁶Etaretuo ake oltung'ani ole latia enye, nejoki olalashe lenye, “Ntagoluoyu!”

⁷Neitagol olaguetani loo nkeek olkunoni oshoke, ore oloiutuutisho neitagol oshoke ilo oidong'isho; ore te nkiruburubare nejo ninche, “Eisidai,” neitirrish ninye too lmushumaani pee meing'unung'un.

⁸Kake ore iyie Israel, osinka lai, Yakobo lategelua nanu, ina ishoi e Abraham, olchore lai;

⁹iyie apa layaua nanu aitung'uaa ineeiting'ie enkop, naaipotu too neelakua oleng, aajoki nanu iyie, “Ira iyie osinka lai, aategelua nanu iyie, nemaanang'aa nanu aiturraa.”

¹⁰Miureishoyu amu atii nanu te nebo iyie, ming'aeng'ae amu kara nanu Enkai ino; kaaitagol nanu iyie, kaaretu nanu iyie, kaaibung nanu iyie te nkaina ai e tatene naata engolon.

¹¹Ore lelo pooki likitagorokinote naa keitukurruni nemiri; ore lelo ooekenya te nkaraki iyie naa kepuo aaku pesho, neidaaya.

¹²Ilo iyie aing'oru lelo likikeshare, kake midol ninche; ore lelo likintayunye olarrabal naa kepuo aaku pesho.

¹³Amu nanu Olaitoriani Enkai ino, likimbung enkaina e tatene; nanu ilo likijoki iyie, “Miureisho, kaaretu nanu.”

¹⁴Miureishoyu Yakobo, hoo niba anaa olkurto, lo tung'ana le Israel! Karetu nanu intae, Olaitoriani ojo; Ilo Osinya le Israel ninye okordu intae.

¹⁵Ng'ura ajo kaaitaa nanu iyie entoki nadung'ishoreki, ng'ejuk, nepi, neeta lala; naa ilo iyie adung ildoinyo niuroo ninche, nintotiu iyie oldoinyo anaa suut.

¹⁶Naa ilo iyie aipirripir ninche neya osiwuo, neidapash olkutati ninche. Nilo iyie ang'ida tiatua Olaitoriani; tiatua Ilo Obo Osinya le Israel, ilo iyie ang'ida.

¹⁷Te neing'oru lelo aisinak enkare nelau, netoyu ilng'ejepa lenye te nkure, nawaliki Nanu Olaitoriani ninche, ore Nanu, Enkai e Israel nemaiturraa ninche.

¹⁸Kabolu nanu ilkejek le nkare too ldoinyo, o nkonyek oo nkariak tiatua ierat; kaisho nanu ong'ata metaa olchorro le nkare, ore enkop natoyio neruko nkariak.

¹⁹Kaun nanu to lpurkel iltarakua, o ltepes o loirienito, kaitubulu nanu te nkop natoyio, ilkeek kumok lo supuko,

²⁰pee etum iltung'ana aatodol neyiolou, nedamu neyiolou te nebo, nchere enkaina o Laitoriani nataasa ina, Ilo Osinya le Israel oitobira ina.

²¹Iyau lomon linono, Olaitoriani ojo; iyau shakenisho ino, Olaiguanani le Yakobo ojo.

²²Nchoo ninye meyau, neliki iyiook ina nalotu aaku, entoliki iyiook mbaa e apa eneikununo pee kitum iyiook aaiguanare ninche, pee kitum iyiook aatayioloito enepukoki ninche, aashu eibalakinye iyiook mbaa naayooki aapuonu.

²³Entoliki iyiook mbaa naayooki aapuonu, pee kiyiolou iyiook nchere irara nkaitin; entaas esidai anaa entorroni pee kimputukuny iyiook nikiureishoyu.

²⁴Mira iyie toki, naa pesho esiaai ino; naa pesho entoki nikitegelua iyie.

²⁵Atuputuo nanu ilo obo te nkalo e moikuape, neewuo ninye, eewuo ninye eing'uaa enkilepunoto e nkolong, naa kelotu ninye aipot enkarna ai; naa kelotu ninye aituny lelo aitoriak anaa esarng'ab, anaa enaipurj olaitobirani loo motioo oo nkulupuok esarng'ab.

²⁶Kaing'ae apa oibalunye te dukuya, pee kitum iyiook aatayiolo, nelimu eng'or enkata, pee kitum iyiook aatejo, “Etisipa ninye”? Metii apa hoo obo oibalunye ina, meetae olotolimuo, meetae olotoning'o irorei linono.

²⁷Atang'asa apa nanu aibalakinye Sion, naisho nanu Yerusalem olkilikuai loo lomon supati.

²⁸Kake te naing'orisho nanu, metii hoo obo, tiatua oidim ataa olaikooni, laa te naikilikuanisho newalu.

²⁹Ng'ura ajo pesho kuna pooki, naa pesho esiaai enye; ore nena kitanyaanyukot enye oo nkaitin naatosholuaki naa enkijape e pesho.