Read MAASAI REVISED PROTESTANT Isaya 42 Bible Online

Isaya 42 - MAASAI REVISED PROTESTANT bible

Isaya 42

¹ Lele osinka lai laitagol nanu, ilo gelunoti lai, oshipakino oltau lai; atipika nanu enkiyang'et ai shumata ninye, naa kelo ninye aiguanaki iloshon too sipat.

²Meishir ninye nemebuaku, aashu ening'i ninye too nkoitoi.

³Megil ninye entiyani nailenye nemekut aar oltaa oiliilayie; keyau ninye aitobiru enkiguana nasipa.

⁴Melaikino ninye ae toki nemepalari o metaba anaa neibulunye esipata enkop; ore iloomanaa le naiposha neanyu enkitanapata enye.

⁵Nji ejo Enkai, Olaitoriani, ilo oitayio shumata neisalaash, ilo olak enkop aitorioo o pooki naimu ninye, ilo oisho enkiyang'et lelo tung'ana ootii oriong enkop, neisho enkishui lelo oopuo ti oriong enkop.

⁶“Kara nanu Olaitoriani, aaipoto nanu iyie te supatisho, aaibung'a nanu iyie enkaina naagolie; aaishorua nanu iyie taa olning'o too loreren, ore te iyie naa kayaki nanu ewang'an iloshon.

⁷Ilo aitodolisho ilmodook, nilo alaaya lelo ooena te naimin, nintayu ilooena aitung'uaa olgilata liatua jila nintayu te jila lelo ootoni tiatua enaimin.

⁸Kara nanu Olaitoriani, ina enkarna ai, ore enkitoo ai nemaisho nanu likae, nemaisho enkisisa ai nkitanyaanyukot oo nkaitin naaguetuno.

⁹Ng'ura ajo etulusoitie ntokitin e apa, naa kaibalunye taata nanu ntokitin ng'ejuko; ore eton eitu eipang'u aaliooyu naa kaaliki nanu ninche.”

¹⁰Entaranyaki Olaitoriani osinkolio ng'ejuk, nchoo enkisisa enye eimu ilubot e nkop pooki! Nchoo eikurrukur enaiposha o nena naabore atua oloomanaa le naiposha o lelo oomanya ninche.

¹¹Nchoo enkop natoyio o nkanas enye eilepunye iltoiloishi lenye, o nena ang'itie naamanya Kedar; nchoo lelo oomanya Sela eranyisho te ng'ida, nchoo ninche ebuaku too nchumat oo ldoinyo.

¹²Nchoo ninche eisho Olaitoriani enkitoo, neibalunye enkisisa enye too loomanaa le naiposha.

¹³Kelo Olaitoriani anaa oltung'ani magilani, nepush anaa oltung'ani lo larrabal; neyietu aishir, nebuaku, neitoduaaya kewan ajo aimagilani alang ilmang'ati lenyena.

¹⁴Ore te nkata naado natigire nanu, aitirring'e nanu naibooyo kewan, ore taata kaishir nanu anaa enkitok nasaisai, kaipang'ipang nanu naiyiogiyiog.

¹⁵Kaitomijoon nanu ildoinyo o ndoinyo, naitoi nanu nkujit o lkeek; naitaa nanu ilkejek enkop natoyio, naitoi ilchorroi.

¹⁶Nalo nanu arikoo lelo modook teina oitoi apa neitu eyiolou ninche, aimie atua ina oitoi nemeyiolo ninche karikoo nanu ninche. Kaibelekeny nanu ina aimin natii dukuya ninche aitaa ewang'an, naisiashayie iwuejitin neesur. Kuna baa nanu aas, nemalo nanu aing'uaa ninche.

¹⁷Kerrinyuni ninche neitukurruni katukul, lelo ooisilig inkitanyaanyukot oo nkaitin naaguetuni, lelo oojoki nkitanyaanyukot naasholuni, “Irara intae inkaitin ang.”

¹⁸Entoning intae ilming'anta, ning'oring'oro intae ilmodook, pee itumutumu aatodolisho!

¹⁹Kalo olmodooni leme ilo sinka lai, aashu kalo olming'ani anaa ilo kipaaret lairriwaa nanu?

²⁰Kedol ninye ntokitin kumok kake mesipu; nebolo nkiyiaa enyena kake mening'isho ninye.

²¹Eitiship apa Olaitoriani, te nkaraki esupatisho enye makewan, pee eibalunye enkitanapata enye neitaa kitok.

²²Kake iltung'ana kulo ootupurroyioki nerayae, etarreshoki ninche pooki too ngumot neisudori tiatua jila; meeta ninche oltung'ani okordu ninche, nemeetae ololo arrinyu ninche?

²³Kalo te intae olo aning ena, nelo ajing ine ainining'isho te nkaraki ina kata nayooki alotu.

²⁴Kaing'ae apa oishooyie Yakobo meibung'i aaya, neisho Israel ilapurrok? Aime Olaitoriani, laa te ninye kitaasa iyiook eng'oki, laa inkoitoi enyena etanyaita ninche, ore nkitanapat enyena neitu ninche eiruk?

²⁵Neaku etubukoko shumata ninye engoro enye, o larrabal kitok; nepik ninye enkima aitaman kake eitu ninye emuso ayiolou; nepej ina kima ninye, kake eitu edamu to ltau lenye.