Read MAASAI REVISED PROTESTANT Isaya 45 Bible Online

Isaya 45 - MAASAI REVISED PROTESTANT bible

Isaya 45

¹Nji etiaaka Olaitoriani ilo otubukoko eilata, aput, ilo oji Sairas, ilo laibung'a nanu enkaina enye e tatene, pee elo ninye aitore iloreren te dukuya ninye neoru ilaiguanak imasaa enye, nebol nkutukie oo nkajijik te dukuya ninye pee meitoki nkutukie oo nkajijik aaikeno:

²“Kalo nanu te dukuya iyie naitorioo ildoinyio, kagiligil nanu nena shomito o suyai nagiligil nena shomito e sekenkei.

³Kaalo nanu aisho iyie ilo shumati le naimin o nena naaisudoro, pee itum iyie atayiolo nchere, ee nanu Olaitoriani, ina Ai e Israel, nikimpotuo iyie te nkarna ino.

⁴Ore te nkaraki osinka lai Yakobo o Israel ilo gelunoti lai, aaipoto nanu te nkarna ino aaipoto nanu enkarna ino hoo nimikiyiolo iyie.

⁵Kara nanu Olaitoriani, nemeetae likae, meetae ae Ai neme nanu; kaarripito nanu hoo nimikiyiolo iyie nanu,

⁶pee etum lelo tung'ana le nkilepunoto e nkolong, o lo loontoluo aatayiolo nchere meetae ae Ai neme nanu; nanu Olaitoriani nemeetae likae.

⁷Aitobirua nanu ewang'an naitayu enaimin, nanu oyau emayianata o enkidaata, nanu Olaitoriani oas kuna baa pooki.

⁸“Tasha iyie shumata, e keper, naa nchoo shumata eshau esupatisho; naa nchoo enkop eng'amaa, pee etum enjeunoto aibulai, naa nchoo eitubulu esupatisho; nanu Olaitoriani oitobirua ina.

⁹“Woi ninye ilo okeshare oloitayio ninye, keishankarrare emoti oo nkulupuok ilo oitobira! Keikilikuan enterit ilo oitobir ajoki, ‘Kainyoo iyie intobirita?’ Aashu ejoki, ‘Meeta ena toki ino ineeibung'i?’

¹⁰Woi ninye ilo ojoki menye, ‘Kainyoo iyie pee kitoiwuo?’ Aashu ilo ojoki enkitok, ‘Kainyoo iyie nikintasaisai?’ ”

¹¹Nji ejo Olaitoriani, Ilo Osinya le Israel, ilo oitayio ninye: “Eikinkilikuanishore nanu tialo nkera aainei, anaa eikisikong nanu tialo esiaai oo nkaik aainei?

¹²Aitobira nanu enkop, naitayu oltung'ani apik oriong enkop; nkaik aainei apa naaisalaasha shumata, naitaisheiki nanu lelo ororani lenye pooki.

¹³Ailepunye nanu Sairas te sipata, naa kaitorioo nanu nkoitoi enyena pooki; kelo ninye ashet enkanasa ai ore lelo tung'ana laainei ooena nelaaya meshomo, neme te nkaraki enkishooroto anaa olerrinyore,” Olaitoriani loo lororani ojo.

¹⁴Nji ejo Olaitoriani: “Ore ina arsisisho e Misiri o ina kinyang'a e Etiopia, o lelo tung'ana le Sabean adoru, naa kepuonu enitii neaku linono, nikipuo ninche aasujaa iyie; kepuonu ninche enitii eena too lpisia nikipuonu aairrugokino iyie. Eikipuo ninche aasai iyie ejo, ‘Etii Enkai te nebo iyie ake, meetae ae Ai neme ninye ake.’ ”

¹⁵Kesipa ira iyie Enkai naisudoo kewan, iyie na Ai e Israel, Olaitajeunoni.

¹⁶Eitukurruaki ninche pooki netusulaki, ore lelo aitobirak loo nkitanyaanyukot oo nkaitin nepuo to lmilo te nebo.

¹⁷Kake eitajewuo Olaitoriani Israel, te njeunoto oo ntarasi; mikintukurruni iyie nimikisuli o kenya.

¹⁸Amu nji ejo Olaitoriani, ilo oitobira shumata - ninye Enkai! Ilo oitobirua enkop neitayu (ninye oitotona; eitu ninye eitobir olmuaate, eitayio ninye pee emanyi!): “Kara nanu Olaitoriani nemeetae likae.

¹⁹Eitu apa nanu airo too nkurrat, tiatua ewueji nemisimis; eitu apa nanu ajoki eishoi e Yakobo, ‘Eng'oruaki to lmuaate.’ Kairo nanu Olaitoriani esipata, naibalunye ina nasipa.

²⁰“Enturrurrunye nipuonunu, entinyiku wootu te nebo, intae lo pisiai loo loshon! Meyiolo ninche toki lelo oonap inkitanyaanyukot oo nkaitin enye oo nkeek, netoni aaomon ina ai nemeidim aitajeusho.

²¹Iyau lomon linono nimbalunye; nchoo ninche eiguana te nebo! Kaing'ae apa otolimuo ena te musano? Kaing'ae apa oibalunye? Aime nanu Olaitoriani? Nemeetae ae Ai neme nanu, Enkai nairo too sipat naa Olaitajeunoni; meetae ae Ai neme nanu.

²²“Embelekenyata wootu enatii pee eitajeuni intae; intae ilubot pooki e nkop! Amu kara nanu Enkai, nemeetae ae.

²³Inosa nanu olmumai te kewan ai, eimua enkutuk ai te sipata ilo rorei lemaaitoki arrinyokino: ‘Ore nanu kaagilakini pooki kung'u, nenya pooki ng'ejep olmumai.’

²⁴“Tiatua Olaitoriani ake, epuoi aajo tialo nanu, isipat o engolon. Ore lelo laaiba neitukurruni ninche.

²⁵Ore tiatua Olaitoriani kelo ina ishoi pooki e Israel amirisho netum enkitoo.”