Read MAASAI REVISED PROTESTANT Isaya 46 Bible Online

Isaya 46 - MAASAI REVISED PROTESTANT bible

Isaya 46

¹Etusulari Beli, neijulujule Nebo, etii inkitanyaanyukot enye shumata ng'uesi o nkishu; ore kuna tokitin ninapinapa naa keiroishi anaa lolan ooek ing'uesi.

²Neijulujula ninche, nesulunye te nebo, meidim ninche aataretu ilo ola, kake ore ninye nkorroki enye kepuo eyararoto.

³“Toning'oki nanu, na aji e Yakobo, o ele pisiai pooki le nkaji e Israel, apa laatoikioki nanu ebaiki pee eini intae, oowaki apa ebaiki itii nguseti;

⁴ore ninye o te moruao inyi Nanu ake Ilo, ore eiborrita intae lukuny naa kanap intae. Aitobira nanu intae naa kanap intae; kaya nanu intae naa kalo agolie intae.

⁵“Kaing'ae intae kintanyaanyukiekie nikintorisiokiki, nikidutietie intae pee kinyaanyuku?

⁶Ore lelo oobuku saabu too lbenia, neineneng enkosholai too ntemet e nkiroishi naa keiger olkunoni, neitayunye nena enkai; paa keitoki aabatata aaserem!

⁷Nedumu ninche ina kitanyaanyukoto aaiteleiki iloilila lenye, nenap ninye, nepuo aapik ewueji enye, neitasheyie teine, nemeidim ninye ashomo teine. Naa te neishiraki oltung'ani ninye, nemeidim atawaliki, aashu eitajeu ninye te nyamali enye.

⁸Tadamu ena ninguanare, tadamu nkitarruorot inono,

⁹tadamu inapa baa e apa musan; amu kara Olaitoriani nemeetae likae; kara nanu Olaitoriani nemeetae likae laanyaanyukie,

¹⁰naibalunye nanu mbaa e nkiting'oto te nkiterunoto o ebaiki apa moitie naibalunye nena neton eitu eaku, ajo, ‘Kelo enkiguana ai aitashe, naa kalo nanu aitabaya iyieunot aainei pooki.’

¹¹Kaipotu ilo motonyi oinosisho te nkalo o loosaen, o ilo tung'ani le nkiguana ai meeu te nkop nalakua. Airoro nanu naa kaitabaya; kaiguana nanu naa kaas ina.

¹²“Entoning'oki nanu intae ilo ogol onyek, intae kulo oolakuaniki enkordunoto.

¹³Aitataanua nanu enkordunoto ai, meekure elakua, nemeekure eimutie enjeunoto ai; naa kapik nanu enjeunoto atua Sion, te nkaraki Israel ina kitoo ai.”