Read MAASAI REVISED PROTESTANT Isaya 5 Bible Online

Isaya 5 - MAASAI REVISED PROTESTANT bible

Isaya 5

¹Ntasho mataranyaki nanu olanyor lai osinkolio le nyorrata oipirta enkurma enye oo sabibu: keeta apa ilo lanyor enkurma oo sabibu te ndoinyo sidai enterit.

²Etuturo ninye neiwuang'ie isoito, neun isabibu ooshiluno; neshetu oltalet orripishoreki te mpolos e nkurma, neitobiru eneironyishoreki teine; neton aanyu metoiu enkurma isabibu, kake isabibu le ntim etoiwuo.

³Ore naa, intae iloomanya Yerusalem o ltung'ana le Yuda, atoomono intae, enguanareki nanu o ina kurma ai oo sabibu.

⁴Kainyoo nanu aitong'oro eitu aas te nkurma ai oo sabibu? Ore pee aanyu nanu metoiu ilng'anayio, kaainyoo pee aa isabibu le ntim etoiwuo?

⁵Ore naa taata kaaliki nanu enalo aitaas enkurma ai oo sabibu, kaiwuang'ie nanu enkikarrata enye, pee eidaikieki; naa kagil nanu isunta enyena pee eitunyori.

⁶Kaitaa nanu ninye mijooni; meikesuni ae kata te ninye nemeturi naa kebulunye endiati o lkiku; naa kaitanap sii inkatampo pee meshaiki enchan ninye.

⁷Amu ore ina kurma oo sabibu o Laitoriani loo lororani naa enkaji e Israel, ore lelo tung'ana le Yuda ninche enkurma natuunoki naitiship ninye; neing'oru ninye esipata, kake ng'ura, enkibukoroto osarge natii; neing'orua esupatisho, naa ng'ura, olkiyioi otii!

⁸Wooi ninche lelo ooruk inkajijik, lelo ooponiki ate ilchampai, o metaba anaa neishunye pooki wueji, nikintaae iyie oloton openy te mpolos e nkop.

⁹Einosa Olaitoriani loo lororani olmumai aning'ito too nkiyiaa aainei: “Kesipa kemijoonu inkajijik kumok, nena ajijik sidain sapuki nememanya.

¹⁰Amu ore iekai tomon oo lng'anayio naa iltuleta isiet ake eitayu le naisho oo sabibu, ore enkikapu nabo oo lanterera naa emborei nabo empirbil ake entapa eitayu.”

¹¹Woi ninche lelo ooinyototo aayooki tadekenya, pee etum aakuet aatusujai inaishi naapi, lelo ootoni oleng o metaa kewarie o metaba anaa neidimu ninche enaisho!

¹²Neeta ninche inkinantani o nkai oo sinkolioitin, o ndulen o naishi too siruai lenye; kake meshilaa ninche inkiaasin o Laitoriani, anaa edol ina siaai oo nkaik enyena.

¹³Ore te nkaraki ina kepuo iltung'ana laainei eyararoto te nkaraki emodai enye; kemut olameyu ilkituaak lenye, nemuta olorere lenye pooki te nkure.

¹⁴Neaku eibung'a enemeneng'a esumash, netang'a enkutuk enye aitulus, ore enkitoo e Yerusalem o ilo orora lenye, naa kepuo aadoyio, olorora lenye o ilo ong'idare.

¹⁵Eirrugoki tung'ani aaing'orie enkop, neitadowuoki iltung'ana aayau kop, ore inkonyek e ilo oitokoos neitoborraki.

¹⁶Kake ore Olaitoriani loo lororani, neitaaki kitok te sipata, ore Enkai Sinyati neitodolu kewan te sinyatisho te sipata.

¹⁷Ore ilkuoo le kerra, nedaa anaa ilootii endaata enye, ore ilkuoo le kineji nedaa to lmuaate.

¹⁸Woi ninche lelo ooyietu enkarruoisho too nkeenta e lejare, lelo ooyietu ing'ok anaa too nkeenta e ngarri,

¹⁹lelo oojo: “Nchoo ninche eisarrisar, nchoo ninche eitasiooyo esiaai enye pee kitum iyiook aatodol; nchoo eyiolounoto e Ilo Sinyati le Israel etaanu, naa nchoo ninye elotu, pee kitum iyiook aatayiolo!”

²⁰Woi ninche lelo oojo entorroni eisidai nejo esidano entorroni, nepik enaimin erishata e wang'an, nepik ewang'an erishata e naimin, lelo oopik enduaran erishata e meloni nepik emeloni erishata e nduaran!

²¹Woi ninche lelo ooiteng'enuo too nkonyek enye maate, lelo ooitaa ate kalamasi!

²²Woi ninche lelo oorup ate te neokieki enaisho, lelo arriyiak te nkitushulata oo naishi naapi,

²³lelo oolaaya olarruoni te nkaraki eropata, neoru ilo asipani esipata enye!

²⁴Neaku, ore anaa enamut olng'ejep le nkima isuut o anaa enaibung inkujit naatoito olng'ejep le nkima, neijia etiu ntona enye, ketiu anaa entoki natong'ua apurda, ore te rishata naitapuku, netiu anaa enterit; te nkaraki natanyaita ninche enkitanapata Olaitoriani loo lororani, netemenaitie ninche ororei le Ilo Sinyati le Israel.

²⁵Ore te nkaraki ina eyupuyupo engoro o Laitoriani tialo iltung'ana lenyena, neitorioyie ninye enkaina enye, aarare ninche neosh ninche, neikirikira oldoinyo; netiu mpopoki enye anaa isuut too nkoitoi naalala e nkanasa. Amu ore te kuna pooki meibooroyu engoro enye, neton ake eitoriori enkaina enye.

²⁶Neyuku ninye olosho olakua, neisulu ninye aipotu meetu aaing'uaa ineeiting'ie enkop; naa ng'ura, nekuetu te ngolon oleng!

²⁷Meetae obo lenye onauru, meetae obo lenye orrorro, meetae oloimug neirura, meetae olololong'u enkeene e mpolos, nemedung'o enkeene e namuke enye;

²⁸naa kepi mbaa enye, neteyietuoki nkai enye, negol iloisotok loo mbartan enye anaa soito, ore nkejek oo ngarrin enye nepuo anaa osiwuo.

²⁹Neikununo enkikurrukur enye anaa eno lng'atuny, neikurrukur ninche anaa ilkuoo loo lng'atunyo; keikurrukur ninche neibung'isho, neripaa ninche ina ng'ues naibung'a, nemeetae ololo arrinyu.

³⁰Ore kenya teina olong naa keikurrukurroki ninche nena naaibung'a, te nkikurrukur naaijo ene naiposha. Naa te neing'or oltung'ani enkop, nedol enaimin ake o osina; ore ewang'an neitomisimis inkatampo enyena.