Read MAASAI REVISED PROTESTANT Isaya 51 Bible Online

Isaya 51 - MAASAI REVISED PROTESTANT bible

Isaya 51

¹“Entoning'oki nanu intae ilooing'oru enkordunoto, intae kulo oing'oru Olaitoriani; eng'ura intae ina dapidapoi apa naa ninye etaguetunyeki intae, o ina gumoto oo soito apa natuturunyeki intae.

²Eng'ura Abraham papaai linyi o Sara apa natoiwuo intae; amu ore apa eton aa nabo aipotuo nanu ninye, namayian nanu ninye naitaa kumok.

³Kelo Olaitoriani aitagol Sion; nelo aitagol nene wuejitin pooki apa neeinyalaki, neitotiu ilo purkel lenye anaa Eden, netiu ilo purkel anaa enkurma o Laitoriani; keaku eng'ida o enchipai etumi tiatua ninye, o enkishooroto e nashe o ltoilo lo sinkolio.

⁴“Entoning'oki lo tung'ana laainei, nikinchosho nanu enkiok, lo orere lai; amu kelotu enkitanapata naing'uaa enatii, o esupatisho naaku ewang'an too ltung'ana.

⁵Kenyiku enkordunoto ai asieku, eeuo enjeunoto ai, naa kelo enkaina ai aitore iloreren, nanu eanyita lelo ootii ilmanien le naiposha, naa enkaina ai eisiligita ninche.

⁶Entudumu nkonyek inyi eng'ura shumata, nirrugogo aaing'or enkop ti abori; amu keish shumata anaa empuruo, neish enkop anaa olkila, ore lelo oomanya ninye naa keye anaa lojong'a; kake keaku enjeunoto ai enoo ntarasi, ore ina kordunoto ai nemeish aekata.

⁷“Entoning'oki nanu intae ilooyiolo esipata, kulo tung'ana ootii enkitanapata ai iltauja lenye; emiureyu imorot oo ltung'ana, niming'aeng'ae te neinyal intae nesukeny.

⁸Amu kenya ninche olasai anaa nkilani, nenya ninche olkurto anaa ilpapit loo nkerra; kake ore enkordunoto ai naa enoo ntarasi, ore enjeunoto ai naa enoo ishoritin pooki.”

⁹Tudumunye, tudumunye, ntagoluoyu, Na golon o Laitoriani; tudumunye anaa apa, te nena ishoritin e apa moitie. Aime iyie apa otudung'udung'o ina kukuuu e naiposha naji Rahab aitaa ndung'ot?

¹⁰Aime iyie apa oitoyio enaiposha, nena ariak e ine wueji kitok negut; aime iyie apa oitaa enguton e naiposha enkoitoi, pee etum lelo ootokorduaki aaima?

¹¹Naa keshukunye lelo ooinyang'ua Olaitoriani aapuonu Sion eranyisho; nelotu eng'ida nemeeta enkiting'oto shumata lukuny enye; kepuo ninche aang'amu eng'ida o enchipai, ore osina o somit nepuo aailanyisho.

¹²“Nanu, nanu ilo oitagol intae ira iyie ng'ae eji metaa iure oltung'ani laa keye, ina kerai e tung'ani naitayioki anaa nkujit,

¹³nikirikino Olaitoriani, Ilo likintobirua, Ilo laa ninye oisalaasha oloing'ang'e nepik olkitamanyunoto le nkop, niureishoyu endama pooki te nkaraki ina goro napi e ilo oitorogonyisho, ina kata te nelotu ninye amutisho? Koree naa ina goro napi e ilo oitorogonyisho?

¹⁴Ore ilo oibookoki enkop naa kelaari nabo kata; meye ninye nedou alo atua engumoto, nemeishunye aekata endaa enye.

¹⁵Kara nanu Olaitoriani Enkai ino, ilo oputu enaiposha o metaa keikurrukur ilopir lenyena - Olaitoriani loo lororani ninye enkarna enye.

¹⁶Natipika nanu irorei laainei enkutuk ino, naaisudoo iyie tiatua oloip le nkaina ai, naisalaash oloing'ang'e naitobir olkitamanyunoto le nkop, najoki Sion, ‘Irara intae iltung'ana laainei.’ ”

¹⁷Tushumunye, tushumunye, ntasho, iyie Yerusalem, iyie anaa ina natookishe te nkaina o Laitoriani teina kikompe e ngoro enye, iyie enatookishe to lbakuli amera, niyukuyukori.

¹⁸Meetae hoo obo orikoo ninye tiatua lelo ayiok pooki ooitoiwuo; meetae oltung'ani oibung enkaina tiatua lelo ayiok pooki ooitubulua.

¹⁹Kitijing'a kuna tabo pokira are - kaing'ae likintigir iyie? - Eliyio o enkidaata, o lameyu o lalem; kaing'ae likintagol iyie?

²⁰Eiterritia ilayiok linono, eirragaa te dukuya pooki oitoi anaa entarakuet natijing'a orreshet; ebore ninche engoro o Laitoriani, ina kisikong'ata e Nkai ino

²¹Ore te nkaraki ina, entoning ena, intae kulo ooinosa osina, kulo ootemerate neme te naisho:

²²Nji ejo Olaitoriani, Olaitoriani Enkai ino Ilo ogolie ltung'ana lenyena: “Ng'ura ajo aiwuang'ie nanu te nkaina ino ina kikompe e merai nikiyukuyukie; ina bakuli e ngoro ai mingil aekata iyie aok;

²³naa kalo nanu apik inkaik e lelo aisilisilok linono, lelo apa likitiakita, ‘Irrugoyu pee kitum iyiook aashom’; nintotiu iyie enkoriong ino anaa enkop netiu anaa enkoitoi naaim ninche.”