Read MAASAI REVISED PROTESTANT Isaya 53 Bible Online

Isaya 53 - MAASAI REVISED PROTESTANT bible

Isaya 53

¹Kaing'ae otonyorrayie ina nikitoning'o? Naa ae ng'ae otoduaa engolon o Laitoriani tena?

²Amu etubulua ninye te dukuya Olaitoriani anaa enkaitubului kiti, o anaa entonai te nkop natoyio; meeta ninye enkishiaa anaa eneing'ori, eji metaa aikiing'or iyiook ninye, nemeeta esidano eji metaa eiking'uar.

³Etanyaita apa nemenaa iltung'ana ninye, oltung'ani loo sinaitin ninye netamoo osina; ore anaa obo lemeyieu iltung'ana neing'or, netemenayioki, neitu iyiook kishilaa ninye.

⁴Kesipa etanapa ninye emion ang nenap isinaitin lang; ore ake eyia nikidol ninye etooshoki, etoosho ninye Enkai, neisilisil.

⁵Kake etipikaki ninye olbae te nkaraki nkitarruorot ang, eitamorroojoki ninye te nkaraki ntorrok ang. Shumata ninye etii enkitamioto naa ninye naishiunye iyiook, naa too oshot enyena eishiunyeki iyiook.

⁶Kitiu iyiook pooki anaa nkerra naaimina, kishomo aaidapashari; kimbelekenyakinote oltung'ani ake enkoitoi enye; neiteleikia Olaitoriani shumata ninye entorroni ang pooki.

⁷ Eitorogonyaki apa ninye neisilisili, kake eitu ebol enkutuk enye; ore anaa olkuoo le ker opuoi aayieng, o anaa enker natii dukuya lelo oodung ilpapit lenyena, mebol enkutuk, neijia sii apa eikuna ninye, eitu ebol enkutuk.

⁸Ore te nkitorogonyata e ndung'okinoto e nkiguana, newaki ninye; naa ore to lporror lenye aing'ae otishilayie, nchere eiwuang'ieki ninye teina kop e lelo ooishu, etooshoki te nkitarruoroto oo ltung'ana laainei?

⁹Neitobir ninche enkurare enye te nebo lelo arruok etunukayioki ninye te nebo ilkarsisi, hoo duoo ninye nemeeta entorroni nataasa, neitu aekata ejo elejare te nkutuk enye.

¹⁰Kake eyieunoto apa Olaitoriani pee epik ninye olbae; etipika Olaitoriani ninye osina; neitaa ninye kewan olasar loo ng'ok, nelo adol eishoi enye, neitoodori nkolong'i enyena; kelo eyieunoto o Laitoriani adupoyu te nkaina enye;

¹¹kelo ninye adol ilng'anayio le mion o ltau lenye neshipayu; ore te yiolounoto enye ilo osipa, ilo sinka lai, keisho ilkumok meikenakini isipat; naa kenap ninye nkitarruorot enye.

¹²Ore te nkaraki ina kaoriki ninye erubata te nebo lelo kituaak, neor ninye nena naataaruaki te nebo lelo oogol; te nkaraki natubukoko ninye enkishui enye keeya, neikenakini lelo arruok. Ore te nkaraki ina netanapa ng'ok oo lkumok, neaku oloomonoki lelo aitarruorrok.