Read MAASAI REVISED PROTESTANT Isaya 54 Bible Online

Isaya 54 - MAASAI REVISED PROTESTANT bible

Isaya 54

¹“Taranyisho iyie na olupi, ina neitu eisho; tabuaku taranyisho to ltoilo sapuk, iyie ina neitu aekata esaisayu! Amu ore nkera e ina apa naiturrayioki naa eikumok aalang ina nayama, Olaitoriani ojo.

²Ntalala ewueji o lng'obor lino, nincho lelo karash le manyisho ino elaari; minunuk, ntoodoro nkeenta inono nintagol incheito inono

³amu ilo iyie aponari te tatene o te kedianye, naa kelo eishoi ino aya iloreren nepuo aamany nena anas apa naatung'uayioki.

⁴“Miureishoyu amu mikipuoi aaitukurru; ming'aing'ai amu mikintukurruni; amu mingil aekata adamu enkurruna e kitisho ino, ore ilo sina lino apa ira enkoliai nimingil aekata adamu.

⁵Ilo Likintobira iyie ninye olpayian lino, Olaitoriani loo lororani ninye enkarna enye; naa Ilo Sinyati le Israel Olakordunoni lino, naa keji ninye Enkai e nkop pooki.

⁶Amu kimpoto iyie Olaitoriani, itiu anaa enkitok nataarayioki netum osina to ltau, anaa esiankiki naiturrayioki, Enkai ino najo.

⁷Te rishata dorrop apa aaiturrayie nanu, kake to lng'ur kitok aaiturrur nanu.

⁸Te ngoro nadooyo nanu aisudoyie enkomom ai te iyie, te nkiti rishata, kake te nyorrata oo ntarasi nanu aaing'urrie iyie, Olaitoriani ojo, Ilo akordunoni lino.

⁹“Kelo ena atiu anaa nkolong'i e Noa te nanu: ore anaa apa enainosa olmumai nchere meigil inkariak e Noa aapuonu enkop, ainosa sii olmumai nchere maaigil aekata agorokino, nemaaigil aekata aisikong.

¹⁰Keidim ildoinyo aaidurra, neidimi aaiwuang'ie ildoinyo, kake melo aekata ina nyorrata ai nauno aing'uaa intae, ore ilo sotua lai le seriani nemeiwuang'ieki, Olaitoriani ojo, ilo oata olng'ur tialo iyie.

¹¹ “Oi Iyie Yerusalem, ena nainosa osina, ena natara olkutati neitu eitagoli, kairragie nanu isoito linono aitobiraki, naitobir ilkitamanyunot linono too ltoto oogol enkinyang'a ooji safira.

¹²Naitobir nanu iltaleta linono too soito ooji agate, naitobir nchomito inyi too ltoto ooji almasi, naitobir isunta inono pooki too soito oogol e nkiyiang'a.

¹³Ore layiok linono pooki naa Olaitoriani olo aiteng'en, naa kepuo lelo ayiok linono aadupoyu oleng.

¹⁴Naa kepuoi aaitubul intae te sipata; nipuopuo aalakuaniki olosilisili, amu mintokiki intae aaureishoyu; ore too ntabo, nemenyikaki ninche intae.

¹⁵Te nedumakino intae likae tung'ani neme nanu eing'uaa ina; ore ilo oba anaa olodumakino intae nebatata te nkaraki intae.

¹⁶Ng'ura ajo aitobira nanu olkunoni laa ninye okut enkima oo nkuk, neitobiru imasaa o larrabal pee easishoreki. Aitobira sii ilo oitalaku elap pee eidaikie;

¹⁷meetae iruparen naaitobiraki pee earieki intae naapuo aaku, ore pooki ng'ejep odumakino intae te nkiguana, nintukurrurru. Ena ninye enjung'ore oo sinkan lo Laitoriani naa kailepie nanu ninche, Olaitoriani ojo.”