Read MAASAI REVISED PROTESTANT Isaya 55 Bible Online

Isaya 55 - MAASAI REVISED PROTESTANT bible

Isaya 55

¹“Wou pooki ng'ae oata enkure, wootu entook inkariak; wou, iyie ilo lemeeta mpisai inyang'u endaa inosa! Wou, inyang'u enaisho o kule, wou, miata ropiyiani, itum pesho.

²Kainyoo pee inchang'itie iropiyiani teina neme endaa? Kainyoo pee inchang'itie ole koisiaayio lino teina nimikiraposh? Toning'oki nanu nias ina naajoki, pee itum ina daa sidai aisul, nishipakino nena naapir.

³Irrugokoki nanu enkiok nilotu enatii; toning'o pee etum oltau lino atopuaa; pee aitobir nanu te nebo iyie osotua loo ntarasi, ilo sotua lai ouno te nkaraki Daudi.

⁴Ng'ura ajo aitaa apa nanu ninye shakeni too loreren, pee eaku olarikoni o Laitoreisho too loreren.

⁵Ipuopuo intae aaipotu lelo oreren limiyiololo intae, ore lelo oreren lemeyiolo intae nekuetiki intae, te nkaraki Olaitoriani Enkai inyi o Ilo Osinya le Israel, amu eitaa ninye intae olosho kitok.

⁶“Eng'oru Olaitoriani eton etumoyu, empoto ninye eton etaana;

⁷nchoo ilo torrono epaash nkoitoi enyena torrok, ore ilo lemeas isipat nepal ndamunot enyena; nchoo ninye errinyokino Olaitoriani, pee etum Olaitoriani aing'urrie ninye, nchoo errinyokino Enkai ang, amu kepalaki ninye oleng.

⁸Ore ndamunot aainei neme ndamunot inyi, ore nkoitoi aainei neme nkoitoi inyi, Olaitoriani ojo.

⁹Ore anaa enalakuaniki keper enkop, neijia etiu inkoitoi aainei elakuaniki nkuninyi, o ndamunot aainei elakuaniki ndamunot inyi.

¹⁰“Ore anaa enadou enchan o enkinuku eing'uaa keper, nemerrinyo kake kepuo aaitashal enkop, neitubulu nkaitubulu, neisho ilanterera lelo oounisho neisho endaa ilo onya,

¹¹neijia sii etiu ilo rorei lai oimu enkutuk ai; maarrinyokino nanu erok, kake kelo aitabaya ina nayieu, nelo aitubul ina toki apa nairriwaka.

¹²“Impang'ipang'a intae aapuo te ng'ida, nerikori intae te seriani; ore lelo doinyio o ndoinyio naatii dukuya intae, nebuaku aaranyisho, ore lelo keek pooki li ong'ata neosh inkaik.

¹³Ore erishata nabulu ilkiku naa iltarakua oobulu, ore erishata nabulu endiati naa olchani onyaanyukie olarrashi ore ena to Laitoriani naa kelo aaku entoki nadamuni, olmonekie loo ntarasi lemeiwuang'ieki aekata.”