Read MAASAI REVISED PROTESTANT Isaya 59 Bible Online

Isaya 59 - MAASAI REVISED PROTESTANT bible

Isaya 59

¹Kasip inchere eitu edorropu enkaina o Laitoriani eji metaa meekure eidim aitajeu, anaa eitoming'anaki enkiok enye, eji metaa meekure ening'isho;

²kake entorroni inyi nayawua eoro, te rishata inyi o Enkai inyi, naa ng'ok inyi naaisudoitie enkomom enye te intae, o metaa meekure ening intae.

³Amu eisarkionieki inkaik inyi to sarge neisarkionieki ilkimojik linyi te ntorroni; eiroro nkutukie inyi elejare, neitobiru ilng'ejepa linyi entorroni.

⁴Meetae hoo obo olo enkiguana te sipata, meetae ololo aiguana te sipata, osayia le pesho eng'idare ninche, neiro elejare, neipiru ninche esuujisho neyau entorroni.

⁵Neiu ninche ilmosor le nturbubua neitobiru ninche orreshet te nkaji e surusuri; ore ilo onya lelo mosor neye, ore ilo mosori odanyi nedanyuni olasurai.

⁶Ore lelo rresheta ooshetu ninche nemeaku inkilani, meimulumul iltung'ana ate te nena naaitobiru ninche. Ore esiaai enye naa esiaai e ntorroni, netii nkiasin o larrabal inkaik enye.

⁷Nekuetiki nkejek enye enkarruoisho, neisarisaraki aaibukoo osarge lemeeta entioto; ore ndamunot enye naa ndamunot e nkarruoisho, eliyio o enkidaata naatii nkoitoi enye.

⁸Meyiolo ninche nkoitoi e seriani, nemetii esipata nkoitoi enye; meetae oloim nena oitoi oyiolo eseriani.

⁹Ore te nkaraki ina kelakuaniki iyiook esipata, nemeinepu aekata iyiook esupatisho; king'oru iyiook ewang'an, naa ng'ura, enaimin kitum, king'oru ewang'an kake te misimisi kipuo.

¹⁰Nikirrapirrapu iyiook esuntai kipuo anaa iltung'ana modook, nikirrapirrapisho anaa iltung'ana lemeeta nkonyek; nikirrorro dama nikitiuu anaa iloopuoito te nkinuku, ore tiatua lelo tung'ana oogol kitotiutuo anaa iltung'ana ootuata.

¹¹Kinkurrukur pooki anaa ilng'arurum le ntim nikinchir aayietu anaa nturkuluoni; niking'oru esipata, kake meetae, niking'oru enjeunoto, kake kelakuaniki iyiook.

¹²Amu etoponari nkitarruorot ang te dukuya iyie, ore ing'ok ang neishakenoki iyiook; ore nena kitarruorot ang netii te nebo iyiook, nikiyiolo iyiook intorrok ang;

¹³kitigila nkitanapat nikiany Olaitoriani, nikimbelekenyate aaing'uaa esujata Enkai ang, kiimaki enkitorogonyare o engolon e nkong'u, nikidamu too ltauja nikiro ilomon le lejare.

¹⁴Eibelekenyaki esipata, ore esupatisho netalakuana; amu eimina esipata too umat oo ltung'ana, ore enkitoriori nemetumi.

¹⁵Metii esipata, ore ilo oiwuang'a te ntorroni nepik kewan batisho. Etoduaa Olaitoriani ina, neitu eitiship ninye nchere eji meetae esipata.

¹⁶Etoduaa ninye ajo metii oltung'ani, neing'asia pee edol ajo meetae oltung'ani omitu ilo oitorogonyitae, neaku enkaina enye kewan nayaka ninye enkisulata, ore esipata enye neitasheyie ninye.

¹⁷Eishopo ninye esipata anaa enkila o lgoo, neishop enkopiyia e njeunoto te ndukuya enye; neishop ninye ilkilani le lap, neimulumul kewan te mpushuna napi.

¹⁸Te risioroto oo nkiasin enye elo ninye aitalak ninche, neitalak te ngoro lelo mang'ati lenyena; ore lelo ootii olmanie le naiposha neitalaku te ninche.

¹⁹Naa kepuo ninche aaureyu enkarna o Laitoriani o enkitoo enye te nkalo o loo ntoluo o metabaiki moikuape, amu kelotu ninye anaa enkare o lkeju nanang'unye

²⁰“Naa kelotu ninye Sion anaa olalakunoni too lelo le nkaji e Yakobo ooibelekenya aaing'uaa enkitarruoroto, Olaitoriani ojo.

²¹“Naa ore tialo nanu, ele olning'o lai lo sotua o ninche, Olaitoriani ojo. Ore ina kiyang'et ai natii shumata iyie o lelo rorei laainei latipika nanu enkutuk ino, nemepuku ninche te nkutuk ino, aashu too nkutukie oo nkera inono, Olaitoriani ojo, ebaiki ena kata neito idia alo o ntarasi.”