Read MAASAI REVISED PROTESTANT Isaya 60 Bible Online

Isaya 60 - MAASAI REVISED PROTESTANT bible

Isaya 60

¹Tudumunye, tawang'a, amu eeuo ewang'an ino, negira enkitoo o Laitoriani awang'u te iyie.

²Ng'ura ajo kelotu enaimin aiput enkop, neiput enaimin kitok olorere; kake kedumunye Olaitoriani tialo intae, nedoli enkitoo enye te shumata intae.

³Naa kepuonu iloshon ina wang'an inyi, nepuonu ilaiguanak ina kitawang'ata e nkilepunoto inyi.

⁴Tushumu iyie nkonyek inono ntamanai, toduaa; eiturrurrote ninche pooki te nebo, nepuonu enitii; kepuonu ilayiok linono eing'uaa enelakua, naa kenapi ntoyie inono too nkaik.

⁵Ore pee idol iyie ina ning'idayu, neiput oltau lino enchipai, amu ore ina kumoi e naiposha naa ekimbelekenyakini iyie, kelotu ina arsisisho oo loshon enitii.

⁶Keimisie intae olorora loo ntamesin, nena tamesin kutiti e Midian o Efa; kepuonu nekua pooki naaing'uaa Sheba. Keyau ninche saabu o enkorropil, neibalunye ninche enkisisa o Laitoriani.

⁷Ore nena luaat pooki oo ntare e Kedar, nikinturrurrokini iyie, ore lelo meregeshi le Neba-iot nikipuo aaisiai iyie; kepuonu ninche eng'amaroyu to lperere lai lo lasar, ore ina aji ai e nkitoo naitaa kitok.

⁸Kakua kulo oopuo tiaai anaa enkatampoi, netiu anaa nturkuluoni eim ilusien enye?

⁹Amu kaanyu nanu ilmanien loo naaiposha, ore nena melin e Tarshishi neng'as aayau lelo ayiok linyi ooing'uaa enelakua, neyau enkosholai enye o saabu enye te nebo ninche, te nkaraki Olaitoriani Enkai ino, o te nkaraki Ilo Osinya le Israel, amu kintaa ninye iyie kitok.

¹⁰Kepuonu iltung'ana leeiking'a aashet isunta inono, nikipuonu ilaiguanak lenye aaisiai iyie; amu ore apa te ngoro ai naatoosho nanu iyie, kake ore te nyorrata ai naaing'urrie nanu iyie.

¹¹Keaku kebolo nchomito inono anaake, dama o kewarie nemeikeni ninche; pee kitum iltung'ana aayaki iyie ina arsisisho oo loshon, eriku ilaiguanak lenye erukunye aapuonu.

¹²Amu ore ilo osho o enkitoria nimikisiai iyie neidaaya; ore lelo oshon naa keidaikieki katukul.

¹³Kelotu ina kitoo e Lebanon enitii, o lelo keek pooki sidain, pee epuonu aapik esidano ene wueji e nkaji ai; ore ene wueji neitasheyie nkejek aainei naitaa kitok.

¹⁴Ore layiok le lelo apa ooitorogony intae naa kepuonu enitii eirrugo; ore lelo pooki apa oomen intae nepuonu aairrugo too nkejek inyi; naa keipot ninche intae aajo Na anasa o Laitoriani, Sion e Ilo Sinyati le Israel.

¹⁵Ore kinturrayioki apa nikimbayuni, nemeetae obo oim atua iyie, kaaitaa nanu iyie kitok te nkishiaa ntarasi, eng'ida oo ishoritin pooki.

¹⁶Ilo iyie anaku kule oo loshon, nilo iyie anak ilki loo laiguanak, naa ilo ayiolou nchere, nanu, Olaitoriani, Olaitajeunoni lino, naa nanu Olalakunoni, Ilo Magilani le Yakobo.

¹⁷Ore te rishata o suyai naa kayau nanu saabu, ore te rishata e sekenkei naa kayau nanu enkosholai; ore te rishata e nchata nayau osuyai, ore te rishata oo soito nayau esekenkei. Kaitaa nanu lelo aitasheikinok linono eseriani, naitaa lelo likintore te ngolon esupatisho.

¹⁸Meigili aekata aaning olarrabal te nkop ino, nemening'i eliyio aashu enkinyala too lpolosien linyi; impotipoto intae isunta inyi aajo Enjeunoto, nijojo nchomito inyi Enkisisa.

¹⁹Meigil aekata enkolong aaku ewang'an inyi dama, anaa eaku ewang'an o lapa itum kewarie; kake Olaitoriani olo aaku ewang'an ino oo ntarasi, naa Enkai ino naaku enkitoo ino.

²⁰Meigil aekata enkolong adoyio te iyie, nemeigil olapa aaku enaimin, amu Olaitoriani olo aaku ewang'an ino oo ntarasi, ore nkolong'i inono e nkishirata neishieki.

²¹Ore iltung'ana linono naa keaku pooki supati; naa keya ninche ena kop aaitaa enenye ntarasi, ina aitubului natuuno nanu, ina siaai oo nkaik aainei, pee aatumi aaitaa kitok.

²²Ore ilo oti te ninche naa kelo aaku olmarei kitok, ore ilo oti aisul neaku olosho magilani; Kara nanu Olaitoriani; ore te nkata enye naa kaitasieku nanu ina.