Read MAASAI REVISED PROTESTANT Isaya 61 Bible Online

Isaya 61 - MAASAI REVISED PROTESTANT bible

Isaya 61

¹ Etii Enkiyang'et o Laitoriani Enkai shumata nanu, amu aatubukoko nanu Olaitoriani eilata aput pee ayaki lomon supati lelo aisinak. Aairriwayie ninye nanu pee alo aitagol lelo ootigilate iltauja, pee aibalunye elakunoto te lelo ooena, o emboloroto te lelo ooikenoro te jila.

²Pee aibalunye ajo etabawua olari lo Laitoriani, o enkolong e lap e Nkai ang; pee aitagol lelo pooki ooishir;

³pee aisho lelo ooishir tiatua Sion - olmarisian te rishata oo nkuruon, o ina ilata e ng'ida te rishata osina, o olkila le nkisisa te rishata e lepori o ltau; pee etumi aatejo ninche ilkeek le supatisho, ina unore o Laitoriani, pee etumi aaitaa ninye kitok.

⁴Naa kepuo ninche aaigil aashet iwuejitin apa neeidaaitie neshetu ninche nene wuejitin apa neetomijoonito, neram ninche nena anas apa naaidaitie, ina mijoonisho oo ishoritin kumok.

⁵Naa keitashe iltung'ana leeiking'a aairrita nkerrai inyi, naa iltung'ana loo loreren oopuo aaku ilaturok linyi o laitobirak loo sabibu;

⁶kake keipoti intae aajo ilapolosak lo Laitoriani, keimaki intae iltung'ana aajo ilaisiaayiak le Nkai ang; ipuopuo intae aanya olkar loo loshon, ore karsisisho enye nipuopuo intae aaisikarrare.

⁷Ore te rishata e nkurruna inyi naa itumutumu intae erubata katitin are, ore te rishata e sulare nipuopuo intae aang'idakino ewueji enye; metaa ore tiatua ina kop inyi naa ipuopuo aatum erubata katitin are, nitumutumu eng'ida oo ntarasi.

⁸Amu ore nanu Olaitoriani naa esipata ayieu, kaiba empurrore o enkitarruoroto; kalo nanu aisho ninche elaakinoto nasipa, nalo aitobir osotua loo ntarasi o ninche.

⁹Ore eishoi enye naa kepuo aaku yiolot tiatua loshon, neyiolouni nkera enye tiatua iloreren; ore pooki oodol ninche neyiolou ninche nchere olorere ele otamayiana Olaitoriani.

¹⁰Kang'ida nanu oleng tiatua Olaitoriani, keshipa oltau lai tiatua Enkai ai; amu aaishopo ninye nanu to lkila le njeunoto, aaimulumula ninye nanu to lkila le supatisho, anaa oloyamisho te nekus kewan too mporro, anaa esiankiki narikori te neikod kewan too masaa enyena sidain.

¹¹Amu ore anaa enaiu enkop inkaitubulu enyena, aashu anaa enaitubulu enkurma entoki natuunokoki neijia eiko Olaitoriani, Enkai; keitubulu esupatisho o enkisisa, te dukuya iloshon pooki.