Read MAASAI REVISED PROTESTANT Isaya 63 Bible Online

Isaya 63 - MAASAI REVISED PROTESTANT bible

Isaya 63

¹Kalo ele olotu eing'uaa Bosara te Edom oishopito ilkilani oonyokie? Kalo ilo olotu eishopo ilkilani le nkitoo, olotu te nkitoo o te ngolon? “Nanu ilo oibalunye esipata, Olmagilani oitajeusho.”

²Kainyoo pee enyokioo ilkilani linono, neikununo ilkilani linono anaa ileilo olo aim eneironyieki isabibu?

³“Aitunyo nanu enkironyet oo sabibu openy, ore too ltung'ana nemetii hoo obo otaa te nebo nanu; naitunyoo nanu ninche te ngoro ai, naitame nanu ninche te mpushuna ai; ore ilo sarge lenye neisuaakino ilkilani laainei, naaidurukie nanu ilkilani laainei pooki.

⁴Amu etii apa ina olong e lap atua oltau lai, ore ilo ari lai le nkordunoto netabawua.

⁵Aing'ura nanu, kake meetae hoo obo laaretu, naing'asia amu meetae hoo obo laatijing'a enkoriong, neaku te nkaina ai ake anoto enkishuroto, naaitasheyie nanu empushuna ai.

⁶Aitunyoyie nanu olorere te ngoro ai, naitemer nanu ninche te ngoro ai napi, nabukoki nanu osarge lenye enkop.”

⁷Kalimu nanu ina nyorrata o Laitoriani nauno, ina kisisa o Laitoriani, te risioroto e nena pooki naaishoo iyiook Olaitoriani o ina supatisho kitok te nkaji e Israel, apa naishoo ninye ninche te risioroto o lng'ur lenye o te risioroto e ina kitoo e nyorrata enye.

⁸Amu etejo ninye, Kesipa iltung'ana laainei ninche, inkera aainei nemeeta elejare; netaa ninye Olaitajeunoni lenye.

⁹Ore to losilisili lenye pooki, neisilisiloki ninye, naa ilo malaika otii te nebo ninye oitajewuo ninche; te nyorrata enye o to lng'ur lenye eitajewuo ninye ninche; etudumua ninye ninche nenap ninche nkolong'i pooki ti apa.

¹⁰Kake etogolong'utua ninche nepik osina Enkiyang'et enye Sinyati; neaku eibelekenye ninye aaku olmang'atinta lenye, ore ninye openy negilunore ninche.

¹¹Neitoki ninye adamu nkolong'i e apa moitie, e Musa ilo sinka lenye. Koree ilo apa oyawua ailepunye te naiposha lelo shekuti loo nkerrai enyena? Koree ilo opik atua ninche enkiyang'et enye Sinyati,

¹²ilo oisho ina aina enye e nkitoo meshomo te nkaina e tatene e Musa, ilo apa otooro nkariak te dukuya ninche, pee eitobiraki kewan enkarna oo ntarasi.

¹³Kaing'ae otorikoyie ninche aimie ine negut? Anaa embarta naimita olpurkel, eitu apa ninche errorro.

¹⁴Anaa nkishu naadoyio aapuo oerata, eishoo ninche Enkiyang'et o Laitoriani enkiyeng'iyeng'ata. Neaku itorikoyie apa iyie iltung'ana linono, pee intobiraki kewan enkarna e nkitoo.

¹⁵Ng'ura kop te shumata, toduaa teine wueji ino enkitoo nasinya. Koree olokiyo lino o enkidimata ino? Ore eyieunoto ino o lng'ur lino neiboori te nanu.

¹⁶Amu ira iyie Papa lang, hoo nemeyiolo iyiook Abraham nemelimu iyiook Israel; ore iyie, Lo Aitoriani, ira Papa lang, ore enkarna ino, Olokordu iyiook ebaiki apa moitie.

¹⁷Olaitoriani, kainyoo iyie pee incho iyiook matapaash inkoitoi inono nintagol iltauja lang metaa mikiure iyie? Torrinyunye te nkaraki isinkan linono, lelo oshon le njung'ore ino.

¹⁸Ore lelo tung'ana linono sinyat netujung'o enkaji ino sinyati te nkiti rishata; neitunyo ilmang'ati lang ina aji ino sinyati.

¹⁹Kitotiutuo iyiook anaa iltung'ana leitu aekata ing'as aitore, kitotiutuo anaa iltung'ana lemeipotieki enkarna ino.