Read MAASAI REVISED PROTESTANT Isaya 65 Bible Online

Isaya 65 - MAASAI REVISED PROTESTANT bible

Isaya 65

¹Aanyita nanu maaing'oru lelo apa leitu aaikilikuanu nanu, aanyita nanu maanoto lelo apa leitu aaing'oru nanu, atejo nanu, “Nele nanu, nele nanu,” teilo osho apa leitu eipot enkarna ai.

²Aitorioko nanu inkaik aainei endama pooki aipotu olorere oogolong'u, lelo oopuo te nkoitoi nemesidai, esujaa mbaa enye maate;

³iltung'ana laaitagor, ninche oas mbususi anaake te dukuya nkonyek aainei, epolosisho tiatua nkurman neinok enkorropil te shumata isoito;

⁴ilootoni ninche too nkuraren, netoni te nkewarie too lnukat lenye; lelo oonya nkiri oo lbitiro, ore motori o lminong netii iltooi lenye;

⁵nejo ninche, “Talamari minyiku, mikinyikaki nanu, amu aaiteng'elaki nanu aaitalam iyie.” Empuruo naimu nkumeishin aainei ena, enkima nayupuyup endama pooki.

⁶Ng'ura ajo eigeroki te dukuya nanu aajo, “Magira nanu, kake kaitalaku nanu, ee, kaitalaku nanu too lgooitie lenye,

⁷te nena kitarruorot enye o too nkitarruorot oo loo menye te nebo, Olaitoriani ojo; te nkaraki apa natapejo ninche enkorropil too nchumat oo ndoinyo, naasukeny ninche nanu te nchumata oo ldoinyo, katemaki nanu ilgooitie lenye elaakinoto oo nkitarruorot enye e apa.”

⁸Nji ejo Olaitoriani: “Ore anaa enatiu isabibu te nkimarrimarrati, nejo iltung'ana, Minyal ninye, amu etii emayianata atua ninye, neijia alo aas te nkaraki osinka lai, nemaidaikie ninche pooki.

⁹Kayau nanu ina ishoi e Yakobo o ene Yuda, lelo ajung'ok lo ldoinyo lai; lelo gelunot laainei oopuo aajung ine, nepuo lelo sinkan laainei aabik teine.

¹⁰Kelo Sharon aaku endaata oo nkerra, ore Oerata le Akor neaku ewueji neirragie nchoo, e lelo tung'ana laainei laaing'oru nanu.

¹¹Kake kaa aitaas intae ilelo ooany Olaitoriani, lelo lemedamu oldoinyo lai sinyati Sion, lelo oooserem enkai na Gadi neisho olasar le naisho enkai naji Meni?

¹²Karewaki nanu intae olalem, nipuopuo intae pooki aairrugokino ilo oar intae entuata; amu ore apa pee aipotisho, neitu irukishosho, ore pee airo, neitu ining'ining'i, kake itaasa intae ina torrono too nkonyek aainei, nitegelutua ina nemaaitiship.”

¹³Ore te nkaraki ina nji ejo Olaitoriani Enkai, Kepuo isinkan laainei aadaa, kake ilo iyie aisumashu; Kepuo isinkan laainei aaokisho, kake ketir intae enkure; Kepuo isinkan laainei aang'idayu, kake kepuoi aaitukurru intae;

¹⁴Kepuo isinkan laainei aaranyisho te ng'ida o ltau, kake ipuopuo intae aaishir te mion o ltau, niyietutu aaishir te nkaraki emion o ltau.

¹⁵Ning'ueikiki intae enkarna inyi lelo gelunot laainei meitaa oldeket, naa kear intae Olaitoriani Enkai entuata; kake ore lelo sinkan lenyena naa keipot ninye ti ae arna.

¹⁶Neaku ore ilo omayian kewan tena kop, nemayian kewan te Nkai e sipata, ore ilo onya olmumai te nkop, nenya te Nkai nasipa; amu meekure edamuni inyamalaritin e apa, neisudoyioki ninche too nkonyek aainei.

¹⁷“Kaitobiru nanu oloing'ang'e ng'ejuk o enkop ng'ejuk; nemeitokini aadamu ntokitin musana e apa katuk.

¹⁸Kake tishipayu ning'idayu ntarasi te nkaraki ina naitobiru; amu kaitobiru nanu Yerusalem natii eng'ida, ore lelo tung'ana lenyena neiput enchipai.

¹⁹Kang'idakino nanu Yerusalem, nashipakino iltung'ana laainei; meigili aekata aaning tiatua ninye oltoilo le nkishirata, anaa olkiyioi lo sina.

²⁰Meigil aekata nkera kutiti aaye tiatua ninye, nemeitokini aata iltung'ana kituaak lemebikoo, amu keaku keye enkerai aa enoo larin iip, ore olaing'okoni loo larin iip netum oldeket.

²¹Keaku keshet ninche nkajijik nemany ninche; neun ilkeek loo lng'anayio nenya ilng'anayio lenye.

²²Meigil ninche aashetisho nepuonu kulikae aamany; nemeigil ninche aaunisho nepuonu ilkulikae aanya; amu ketiu nkolong'i oo ltung'ana laainei anaa nkolong'i o lchani naa kepuo lelo gelunot laainei aashipakino te nkata naado ina siaai oo nkaik enye.

²³Mepuo ninche aanauru pesho anaa eiu nkera to sina; amu keaku ninche eishoi e ilo omayiana to Laitoriani o nkera enye te nebo ninche.

²⁴Ore eton eitu eipotisho ninche nawaliki nanu ninche, ore eton eirorita ninche naning nanu.

²⁵Naa kelo olkuoo le ker o osuyiani aadaa te nebo, nenya olng'atuny nkujit anaa olkiteng; neaku enterit endaa o lasurai. Nemeitoki ninche aata batisho anaa einyalisho te ilo doinyo lai sinyati, Olaitoriani ojo.”