Read MAASAI REVISED PROTESTANT Isaya 7 Bible Online

Isaya 7 - MAASAI REVISED PROTESTANT bible

Isaya 7

¹Ore apa too nkolong'i e Ahas olayioni le Yotam, olayioni le Usia, olaiguanani le Yuda, nelotu Resin olaiguanani le Siria o Peka olayioni le Remalia, ilo aiguanani le Israel, Yerusalem pee eitainye olarrabal. Kake eitu ninche emir ninye.

²Ore ake pee elikini enkaji e Daudi nchere, “Eibung'ate Siria o Efraim,” neikirikira oltau lenye o ltauja loo ltung'ana lenyena anaa ilkeek le ntim ookutita osiwuo.

³Nejoki Olaitoriani Isaya, “Shomo tanang'are Ahas, iyie o Shearyashub olayioni lino, amu inang'arere ninye te nkiting'oto o lkiperrata le nkare o lchorro le shumata, te wueji oo laitobirak loo nkilani.

⁴Nijoki ninye, ‘Terretenayu, ntirring'ayu, nimiureishoyu, nemishalu te nkaraki nena oben are e nkima netaa keimisiloo, te nkaraki engoro e Resin o Siria o layioni le Remalia.

⁵Ore te nkaraki naipirutua Siria, te nebo Efraim entorroni te nebo olayioni le Remalia, ejo;

⁶Maape iyiook aaitayunye Yuda olarrabal, nikinture ninye, nikisulie iyiook aaya, nikipik iyiook olayioni le Tabel metaa olaiguanani tiatua ninye,

⁷nji ejo Olaitoriani Enkai: Meitashe ina, nemeaku aekata.

⁸Amu ore entonata e Siria naa Dameski, ore entonata e Dameski naa Resin. (Ore te rishata oo larin ntomoni ile o imiet naa keitaae Efraim mpurdat o metaa meitoki aaku olorere.)

⁹Megol Israel alang Samaria nemegol Samaria alang olaiguanani Peka. Tinimirukuruku, intae, meeta nchere pee intasheito aaitobiraki.’ ”

¹⁰Neitoki Olaitoriani airorie Ahas,

¹¹nejoki, “Ing'oru olmonekie to Laitoriani Enkai ino; nchoo egutu anaa enemeneng'a aashu eado abaiki keper.”

¹²Kake etejo Ahas, “Maikilikuanu nanu, nematem nanu Olaitoriani.”

¹³Neitoki Isaya ajo, “Toning'o naa, naaji e Daudi! Kentoki nalelek ena pee intanaururu intae iltung'ana, nintokiki sii aaitanaur Enkai ai?

¹⁴Ore naa, Olaitoriani makewan oisho intae olmonekie. Ng'ura, kenutayu eselenkei neiu enkayioni naa keisho ninye enkarna aajo Emanuel.

¹⁵Naa keaku ninye, nenya eng'orno o enaisho, te neyiolou atirisha intorrok o supati.

¹⁶Amu ore eton eitu eyiolou ina kerai atanya entorroni negelu ina sidai, ore ina kop e lelo aiguanak pokira oaare ooiture intae naa kepuoi aaing'uaa.

¹⁷Keyau Olaitoriani shumata iyie o shumata iltung'ana linyi, o shumata e nkaji e papaai lino nkolong'i neitu aekata etumi ina olong apa nalo Efraim te Yuda - ilo aiguanani le Asiria.”

¹⁸Ore kenya teina olong naa keipotu Olaitoriani te nkisulata lelo oopuonu anaa lojong'a ooing'uaa nchorroi e Misiri o ilo olotu anaa olotoroki oing'uaa enkop e Asiria.

¹⁹Naa kepuonu ninche pooki nemany ineegum oo erat, o nkapuniaa oo ndapidapo o sanagi pooki loo lkiku, o wuejitin pooki neenyori.

²⁰Ore kenya teina olong naa kelo Olaitoriani abarnisho to lmurunya oisilenuoki te lido kekun o lkeju - to laiguanani le Asiria. Nebarn endukuya o lpapit loo nkejek enye, nebarn sii olmunyei tukul.

²¹Ore kenya teina olong naa keramat oltung'ani enkashe o nkerra are;

²²naa ore te nkaraki enkumoi e kule naata ninche, kenya ninye eng'orno; amu ore pooki ng'ae otelekua teina kop naa kenya eng'orno o enaisho.

²³Ore kenya teina olong, ore pooki wueji netii apa isabibu enkalifu nabo ooata enkinyang'a e shekeli enkalifu nabo e nkosholai, naa keaku entim oo lkiku.

²⁴Kepuonu iltung'ana ine eeta nkai o mbaa amu keaku enkop pooki entim oo lkiku.

²⁵Ore nena doinyo apa naaturi too nchempei nimintokiki intae aapuonu ine iurere entim oo lkiku; kake keaku nene wuejitin ineeidapashakino nkishu o nkerra.