Read MAASAI REVISED PROTESTANT Isaya 8 Bible Online

Isaya 8 - MAASAI REVISED PROTESTANT bible

Isaya 8

¹Naaitoki Olaitoriani ajoki nanu, “Iwa embao dapash ngero too sirat sapuki, ‘Ene Maher-shalal-hash-bas[2].’ ”

²Natum nanu olchakeni osipa, Uria ilo apolosani o Sakaria olayioni le Yeberekia, pee aaishakenoki.

³Nalo nanu aboitare enkitok ai, nenutayu ninye neiu enkayioni. Naaitoki nanu Olaitoriani ajoki, “Tejo enkarna e ina ayioni Maher-shalal-hash-bas;

⁴amu ore eton eitu eyiolou ina kerai atejo ‘Mpapa’ aashu ‘Nini’, ore ina arsisisho e Dameski o nena apa naataarutua Samaria naa keyae eduaaya olaiguanani le Asiria.”

⁵Naaitoki nanu Olaitoriani airorie, naajoki,

⁶“Ore te nkaraki natanyaita ele orere inkariak e Shiloa naaruko akiti, netalepori ninche eure Resin olayioni le Remalia;

⁷ore te nkaraki ina, kerewaki Olaitoriani aitaar ninche nkariak o Lkeju le Frati, ilo aiguanani le Asiria o enkitoo enye pooki; naa kenang'ari ninche aaimu imartin nepuo aaim mbat o lkeju.

⁸Naa keor nena ariak Yuda, nenang'ari neruko aapuo, neitabaiki olorere murto. Naa te nelak inaipuko enyena neibulu enkop ino pooki, iyie Emanuel.”

⁹Entaa nabo intae iloreren niureishoyuyu; entoning intae nakuapi naalakua; enterreten ate niruturutu.

¹⁰Enguanata te nebo, kake meaku ina toki; eimaki ororei kake melo auno, amu ketii Enkai te nebo iyiook.

¹¹Nji aatiaka Olaitoriani, nchere eiteleikia ina aina enye nagol shumata nanu, naaikok pee maibung orrekie le kulo tung'ana, naajoki:

¹²“Mijo iyie nena kitobirat torrok, nena pooki naajo kulo tung'ana nkitobirat torrok, nimiureyu iyie ina naure ninche, nimimputukuny.

¹³Kake ore Olaitoriani loo lororani, ninye ake intaa sinyati, nchoo eaku ninye iure, nchoo eaku ninye oloputukunyi lino.

¹⁴Naa keaku ninye ewueji sinyati, neaku osoit oluaa, neaku endapidapoi e rrorroto too nkajijik pokira e Israel. Neaku eloket o rreshet te lelo oomanya Yerusalem.

¹⁵Naa kerrorrokino ilkumok enchumata enye, nebatata negila, nerreshi ninche neyae.”

¹⁶Ore ntae ilooiteng'eni laainei, eng'ura nintubulaa ina kiteng'enare naishoo Enkai.

¹⁷Kaanyu nanu Olaitoriani, laa ninye oisudoo enkomom enye aitung'uaa enkaji e Yakobo, naa kaisilig ninye.

¹⁸Ore nanu o kuna kera naaishoo Olaitoriani nikira iyiook olmonekie o embae e nking'asia tiatua Israel, eing'uaa Olaitoriani loo lororani obik te nchumata oldoinyo le Sion.

¹⁹Naa tenejoki ninche intae, “Enkilikuanishore ilaitumusumusok o lasakutok ooing'oming'om neyietu,” aimeikilikuanishore iltung'ana Enkai enye? Ke lootuata ninche eikilikuanishore te rishata oo looishu?

²⁰Tawaliki ninche, tiaaki, “Entoning ina naiteng'en intae Olaitoriani! Emining ilaitumusumusok - ore enajoki ninche intae nemeret intae.”

²¹Naa kepuo ninche aadung enkop, eeta osina kitok o esumash; naa ore te neisumashu, negoro nedek olaiguanani lenye o Enkai enye, nedumu nkomomi enye aaing'orie shumata;

²²neitoki aaing'or enkop, kake ng'ura, osina ake o enaimin, ina misimisi o sina. Naa kenang'akini ninche atua enaimin narok ong'u.