Read MAASAI REVISED PROTESTANT Isaya 9 Bible Online

Isaya 9 - MAASAI REVISED PROTESTANT bible

Isaya 9

¹Kake meetae osina teina apa naata emion. Ore too nkatitin e dukuya neishoo ninye metemenari enkop e Sebulon o enkop e Naftali, kake ore too nkolong'i e siadi naa keisho ninye meitaai kitok ina oitoi e naiposha, ina kop natii lido kekun le Yordan, Galilaya oo loreren.

²Ore lelo tung'ana apa oopuo te naimin netoduaa ewang'an kitok; ore apa lelo oomanya enegut e misimisi, neitawang'aka ninche ewang'an.

³Itoponayie iyie olorere itoponikia iyie eng'ida enye; neng'ida ninche te dukuya iyie te ng'ida naaijo ene nkikesare, neikununo anaa tene ng'ida lewa eor nena naataarutua.

⁴Amu ore ina shata e murt e ilo ola lenye, o ina shata o loililai lenye, ina ng'udi e ilo aitorogonyani, nitigila iyie anaa te nkata e Midian.

⁵Amu ore enamuke ake pooki e ilo otii enjore naa kemut enkima, ore pooki kila oata oltipoti lo sarge naa kepejori anaa ilkeek le nkima.

⁶Amu etoikioki iyiook enkerai, eishooki iyiook enkayioni, naa keaku oloililai lenye etii enkitoria, naa kepuoi aajo enkarna enye, “Olaiguanani le Nking'asia, Enkai Magilani, Papa loo Ntarasi, Olkitok le Seriani.”

⁷Ore emponaroto e nkitoria enye o eseriani, nemeeta enkiting'oto, to lorika le nkitoo le Daudi, o te shumata enkitoo enye, pee eitubulaa, neitasheyie te sipata o te supatisho, ebaiki ena kata taata oo ntarasi moitie. Olokiyo[3] lo Laitoriani loo lororani oitabaya ena.

⁸Eirriwayie Olaitoriani olkilikuai lo larrabal te nkaraki Yakobo, naa kelo aitawang'aki Israel.

⁹Naa kepuo iltung'ana pooki aayiolou, aa taa, Efraim o lelo oomanya Samaria, lelo oojo to lwuasa o te nkitokoos oo ltauja:

¹⁰“Etusulari isoito loo nkajijik kake eikishet iyiook too soito oogueta; etuuroyioki oreteti aadung, kake eikipik iyiook iltarakua erishata enye.”

¹¹Neaku kedumaki ninche Olaitoriani ilmang'ati, neputu ilmang'ati lenye.

¹²Ore lelo le Siria ootii enkalo o loo saen o lelo le Filistia ootii enkalo o loo ntoluo, kepuo aamut te nkutuk nang'a. Amu ore te kuna pooki eitu eiwuang'ieki engoro enye neitorioyioki enkaina enye.

¹³Eitu eibelekenyakino iltung'ana ilo otoosho ninche, neitu eing'oru Olaitoriani loo lororani.

¹⁴Ore te nkaraki ina etudung'oyie Olaitoriani te Israel endukuya o lkidong'oi; nedung ilng'osil loo ltuka o seyia te nkolong nabo -

¹⁵lelo payiani kituaak ooyanyit ninche endukuya, ore ilo oiboni oibonisho te lejare ninye olkidong'oe;

¹⁶amu ore lelo oorikoo ele orere naa keitapong'oo ninche, ore lelo oorikori naa keijori.

¹⁷Ore te nkaraki ina meshipakino Olaitoriani elelero enye, nemeetayie olng'ur lelo okishin o nkolia; amu ore pooki ng'ae lenye nepaashare orrekie le Nkai naa laasak loo ntorrok, ore pooki kutuk neiro ine modai. Ore te kuna pooki neitu eiwuang'ieki engoro enye neitorioki enkaina enye.

¹⁸Amu eyupuyupito entorroni anaa enkima, nenya isuut o lkiku; nenya isanagi le ntim, neilep ninche shumata te mpuruo kitok.

¹⁹Tiatua engoro o Laitoriani loo lororani etapejoki enkop, netotiutuo iltung'ana anaa ilkeek le nkima; meetae oltung'ani oing'urrie olalashe lenye.

²⁰Kewuapaa ninche too ntateniaa, neton ake eisumash, nedaa ninche too nkedienyaa, kake eitu eraposho; nenya ake oltung'ani nkiri e ilo le latia enye.

²¹Nenya Manase Efraim, nenya Efraim Manase, ore ninche pokira nedumakino Yuda. Ore te kuna pooki neitu eiwuang'ieki engoro o Laitoriani, Neitorioki enkaina enye.