Read MAASAI REVISED PROTESTANT Ilawi 11 Bible Online

Ilawi 11 - MAASAI REVISED PROTESTANT bible

Ilawi 11

¹Nejoki Olaitoriani Musa o Aron,

²“Entiaaki iltung'ana loo Siraeli: Kuna ntokitin naaishu nindimidimi intae aainosa tiatua ing'uesi pooki naatii oriong enkop.

³Ore pooki toki nasasha iloisotok neinyaku ing'amura, tiatua ing'uesi indimidimi aainosa.

⁴Ore ake eyia eminya kuna amu keinyaku ingamura nemesasha iloisotok: entames amu keinyaku ninye ng'amura kake mesasha iloisotok, mesinya te intae

⁵o enkijujur, amu keinyaku ninye ing'amura kake mesasha iloisotok, mesinya te intae.

⁶Ore enkitejo, amu keinyaku ninye ing'amura kake mesasha ninye iloisotok, mesinya te ntae,

⁷o lbitir amu kesasha ninye iloisotok kake meinyaku ing'amura, mesinya te ntae.

⁸Ore inkiri enye minyanya ake, ore mpopoki enye miseyieyie ake, mesinya ninche te intae.

⁹“Indimidimi intae aainosa kuna, e pooki e nena naatii atua nkariak. Ore pooki toki natii atua nkariak naata lopir o lpala aa atua enaiposha etii aashu ilkejek indimidimi intae aainosa.

¹⁰Kake ore pooki toki natii inaaiposha aashu atua ilkejek nemeeta lopir, aashu ilpala, te nena naapuo tiatua nkariak o nena naaishu naatii atua nkariak naa olminong te intae.

¹¹Nchoo eaku ninche olminong te intae, ore nkiri enye niminyanya, ore mpopoki enye niminyikakiki. Nchoo eaku olminong te intae.

¹²Ore pooki toki natii atua nkariak nemeeta lopir o lpala naa olminong te intae.

¹³“Naa kuna naaku olminong tialo imotonyi, nemeinosi ninche, amu olminong ninche: olkurragos o lmotonyi loo lmurran o lmotonyi sapuk le nkare

¹⁴o enkolepo o lenkalem te risioroto oo mpukunot enye

¹⁵o pooki kurruk te risioroto oo mpukunot enyena

¹⁶o esidai o lmuntut o lmagiro o entilalu te risioroto oo mpukunot enyena

¹⁷o emotonyi oo nkiyiaa o enaibalasho

¹⁸o lkupelia o enaadokutuk o enkinyankik o entirriid o encharab

¹⁹o entilagos o emotoroki o mpukunot enyena o lembae nabo o enagor kewan.

²⁰“Ore nkukuni pooki naata inaipuko naapuo too nkejek ong'uan naa olminong te intae.

²¹Ore etiu neijia, ore tiatua nena kukuni naata nkopir naapuo too nkejek moo ng'uan indimidimi intae aainosa nena naata ndapi too nkejek enye, naa ninche epuoyie te nkop.

²²Ore te ninche nindimidimi aainosa olmaati te risioroto oo mpukunot enyena o entiantianyi o mpukunot enyena o entaboi o mpukunot enyena o entargeeti o mpukunot enyena,

²³kake ore nkulie kukuni pooki naata nkopir, neeta nkejek moo ng'uan naa olminong te ntae.

²⁴“Naa te kuna iakuku intae ilo lduruk. Ore pooki ng'ae oiseyie mpopoki enye neiduruku ninye ometaa teipa,

²⁵ore pooki ng'ae ake ninye onap ae rubata oo mpopoki nelo aituku ilkilani lenyena neton ninye eiduruk o metaa teipa.

²⁶Ore pooki ng'ues naiperra iloisotok kake meeta loisotok oaare, aashu meinyaku ing'amura naa enturuj te intae, ore pooki ng'ae oiseyie ninche neiduruku.

²⁷Ore ng'uesi pooki naapuo too ndapi, tiatua nena ng'uesi oo nkejek moo ng'uan naa olduruk te ntae; ore oloba anaa oloiseyie empopok enye neiduruku ometaa teipa.

²⁸Ore ilo onap empopok enye nelo aituku ilkilani lenyena, neaku oloiduruk metaa teipa, keiduruk ninche te ntae.

²⁹“Naa kuna naara olduruk te intae tiatua nena tokitin naaikurtutari tioriong enkop: Olmaima, enderoni, olmokua te risioroto oo mpukunot enyena:

³⁰olmokua o lmaima o lpur o logilalem o tanki.

³¹Kuna naaiduruk te intae tiatua nena naaikurtutari; ore ilo oba anaa oloiseyie ninche teneye neton eiduruk ometaa teipa.

³²Naa ore pooki toki nadoiki ninche etuata neaku enaiduruk, oi aa enchata, aashu enkila aashu olchoni, aashu olbene; pooki masaai ake ninye naasishoreki te pooki pukunoto; meeta nchere meitadoikini atua enkare, neton ninye aa olminong o metaa teipa; neitoki taa asidanu.

³³Naa tenedoiki ake ninye nabo enye atua entoki naitobiruaki too nkulupuok, ore ina toki pooki natii atua neaku keiduruk, ore ina moti oo nkulupuok entadany ninye.

³⁴Ore pooki daa natii atua ina moti naidimi aainosa, netubukokine enkare neaku keiduruk; ore entoki pooki naidimi aatook too masaa naaijo kuna neaku keiduruk.

³⁵Ore pooki toki naba anaa enadoiki erubata ake ninye oo mpopoki enye neaku keiduruk, aa enepejishoreki aashu eneyierishoreki, nchoo ebeli aaitaa mbelibelat; keiduruk ninche naa keaku olduruk te ntae.

³⁶Ore ake etiu, neijia, ore ina ong'u enkare aashu eng'umoto natii enkare naa keisidai; kake ore ake teneshoroo mpopoki enye neaku keiduruk.

³⁷Naa tenedoiki ake ninye erubata oo mpopoki enye ilanterera oopuoi aaun, ore lelo anterera naa aisidain ake;

³⁸kake teneshuma olantererai tiatua enkare, nedoiki ake ninye pooki rubata enchumata e nena popoki e ilo antererai neaku keiduruk te intae.

³⁹“Naa teneye ake eng'ues nabo e nena naainosi, ore ilo oiseyie empopok enye neaku oloiduruk o metaa teipa,

⁴⁰ore ilo onya nkiri enyena naa keishiaa pee eituku ilkilani lenyena kake keaku ake oloiduruk o metaa teipa. Ore sii ilo onap empopok nelo aituku ilkilani lenyena, neaku oloiduruk ometaa teipa.

⁴¹“Ore pooki toki naikurtutari ti oriong enkop naa keiduruk, meinosi ninye.

⁴²Ore entoki naba anaa enalo te nkoshoke enye aashu pooki nalo too nkejek ong'uan aashu pooki toki naata nkejek kumok, nena tokitin pooki naaikurtutari ti oriong enkop, eminya ake, amu olminong ninche.

⁴³Emintaa ake ate olminong te pooki toki naikurtutari, nimindurukiekie ate te ninche, pee miakuku ake ilo lminong.

⁴⁴Amu kara nanu Olaitoriani Enkai inyi, entisinya naa ate, pee iakuku sinyat amu kara nanu sinyati. Emindurukie ake ate tiae toki naikurtutari neiserpepiari ti oriong enkop.

⁴⁵Amu kara nanu Olaitoriani ilo apa oitayio intae aitung'uaa enkop e Misiri, pee aaku Enkai inyi, entaa naa sinyat, amu kara nanu sinyati.”

⁴⁶Ena ninye enkitanapata naipirta pooki ng'ues o emotonyi o pooki toki naishu nalo tiatua nkariak o pooki toki naishu naikurtutari ti oriong enkop,

⁴⁷pee eor nena naaiduruk o nena nemeiduruk o nena ng'uesi naaishu naaidimi aainosa o nena ng'uesi naaishu nemeidimi aainosa.