Read MAASAI REVISED PROTESTANT Ilawi 14 Bible Online

Ilawi 14 - MAASAI REVISED PROTESTANT bible

Ilawi 14

²“Ena naaku enkitanapata tialo ilo oata enkeeya oo lbolot teina olong e nkitisinyata enye; keyakini ninye olapolosani,

³neipang olapolosani alo auluo ilng'oborri nelo ilo apolosani ajur ninye. Ore ake pee eishiwuo ina keeya oo lbolot,

⁴neitanap olapolosani ninche mewaita imotonyi are sidain nemeiduruk naaishu o nkeek oo ntarakua o enkarasha nanyokie o hisopo te nkaraki ilo oitisinyi.

⁵Neitanap olapolosani ninche meteyiang'a nabo e nena motonyi tiatua emoti oo nkulupuok te nkare naruko.

⁶Neya ninye ina motonyi naishu tenebo nkeek oo ntarakua o ina arasha nanyokie o hisopo, neitadoiki ninche o ina motonyi naishu atua ilo sarge leina motonyi nateyieng'aki te shumata ina are naruko;

⁷neisuaaki ilo oitisinyi teina keeya oo lbolot katitin naapishana; netum taa aibalunye ninye nchere meiduruk, neing'ueiki ina motonyi naishu aisho meshomo te wueji newang.

⁸Ore ilo oitisinyi neituku ninye ilkilani lenyena, nebarn endukuya enye pooki, neituku kewan te nkare, nesidanu ninye, ore te siadi ina nelotu ninye atua ang, kake keton te boo o lng'obor lenye nkolong'i naapishana. Ore te nkolong e naapishana nebarn ilpapit pooki te ndukuya.

⁹Nebarn ninye olmunyei lenye, o lpapit loo nkonyek o lpapit lenyena pooki. Neitoki aituku ilkilani lenyena, neituku osesen lenye te nkare, neaku ninye olemeiduruk.

¹⁰“Ore te nkolong e isiet neya ninye isitiman oaare le kerra lemeeta entioto o esupen nabo e ker o lari obo nemeeta entioto o lasar le ntapa imatuan uni e tomon e efa, entapa napuyiapui naipurjakaki eilata o ltulet obo le ilata.

¹¹Ore ilo apolosani oituku ninye nepik ilo tung'ani oitukui o kuna tokitin dukuya Olaitoriani, te kutukaji eilo ng'obor le ntumo.

¹²Neya olapolosani obo le lelo sitiman le kerra, nepolos ninye metaa olasar le ng'oki tenebo o ilo tulet le ilata, neyuk ninche anaa olasar oyuki te dukuya Olaitoriani,

¹³neyieng ninye ilo kuo le ker te wueji neyieng'ieki olasar le ng'oki o lasar opejori, te wueji sinyati, te nkaraki olasar le nkitarruorroto, ore olasar le ng'oki, naa eneilo apolosani, kesinya ninye oleng.

¹⁴“Neya olapolosani embata eilo sarge lo lasar le nkitarruorroto, nepik olapolosani enchumata enkitipet e nkiok e tatene eilo oitukui o enchumata o lmogirra le nkaina enye e tatene, o le nkeju enye e tatene.

¹⁵Neitoki olapolosani aya embata eilata natii oltulet nebukoki endap enye e nkaina e kedianye,

¹⁶neitadoiki olkimojino lenye le tatene atua ina ilata natii endap enkaina enye e kedianye neisuaaya embata eina ilata to lkimojino lenye katitin naapishana te dukuya Olaitoriani.

¹⁷Ore embata eina ilata natelekua te nkaina enye nepik olapolosani enchumata enkitipet e nkiok e tatene eilo oitukui, o enchumata o lmogirra lenye le nkaina e tatene o le nkeju enye e tatene, shumata ilo sarge lo lasar le nkitarruorroto.

¹⁸Ore ina ae ilata natii enkaina o lapolosani nepik ninye endukuya eilo oitisinyi. Neitobir taa olapolosani olasar o lning'o lo sotua te nkaraki ninye te dukuya Olaitoriani.

¹⁹Neishooyo olapolosani olasar le ng'oki, aitobir olning'o lo sotua te nkaraki ilo oitisinyi te nkaraki enkiduruk enye. Ore te siadi neitoki ayieng olasar opejori,

²⁰neishooyo olapolosani ilo asar opejori o lasar le ntapa te nchumata olperere lo lasar. Neijia eiko olapolosani aitobir olning'o lo sotua te nkaraki ilo tung'ani, neaku ninye olemeiduruk.

²¹“Kake tenaa aisinani ilo tung'ani nemeidim anoto ntokitin kumok, neya naa ositima obo le ker pee eaku olasar le nkitarruorroto oyuki, pee eitobiri olning'o lo sotua te nkaraki ninye, o ematua e tomon e efa e ntapa napuyiapui naipurja te ilata pee eaku olasar le ntapa o oltulet le ilata,

²²o nturkuluoni are sii aashu nturkuluoni are kutiti, anaa enaidim ninye anoto. Ore nabo naa olasar le ng'oki ore enkae naa olasar opejori.

²³Ore te nkolong e isiet neyau ninye ninche te nkaraki enkitisinyata enye ine netii olapolosani, kutukaji eilo ng'obor le ntumo te dukuya Olaitoriani.

²⁴Neya olapolosani ilo kuoo le ker lo lasar le nkitarruorroto o ilo tulet le ilata, neyuk olapolosani ninche metaa olasar oyuki te dukuya Olaitoriani.

²⁵Neitoki ninye ayieng ilo kuo le ker lo lasar le nkitarruorroto, neya olapolosani embata osarge leilo asar le nkitarruorroto, nepik enchumata enkitipet e nkiok e tatene eilo oitukui o enchumata olmogirra le nkaina enye e tatene o lmogirra le nkeju enye e tatene.

²⁶Nebukoki olapolosani embata eilata endap enkaina enye e kedianye,

²⁷neisuaaki to lkimojino lenye le tatene embata eina ilata natii endap enkaina enye e kedianye katitin naapishana te dukuya Olaitoriani.

²⁸Nepik olapolosani embata eina ilata natii enkaina enye enchumata enkitipet enkiok e tatene eilo oitisinyi o lmogirra le nkaina enye e tatene o le nkeju enye e tatene, teine wueji duoo netipikieki osarge lo lasar le nkitarruorroto.

²⁹Ore ina ae ilata naleku te nkaina o lapolosani nepik ninye endukuya eilo oitisinyi, pee eitobiraki ninye olning'o lo sotua te dukuya Olaitoriani.

³⁰Neishooyo ninye olasar loo nturkuluoni aashu nturkuluoni kutiti anaa ake duoo enaidim aishooi,

³¹nabo te nkaraki olasar le ng'oki o enkae te nkaraki olasar opejori tenebo olasar le ntapa, neitobir olapolosani olning'o lo sotua te dukuya Olaitoriani te nkaraki ilo oitisinyi.

³²Ena naa enkitanapata te nkaraki ilo oata enkeeya oo lbolot, lemeidim ninye anoto olasar le nkitisinyata enye.”

³³Nejoki Olaitoriani Musa o Aron,

³⁴“Tenipuonunu kenya ina kop e Kanaan naisho nanu intae metaa eninyi, tenapik nanu enkeeya oo lbolot atua enkaji tiatua ina kop inyi,

³⁵ore ilo liopeny enkaji nelotu aliki olapolosani, ‘Etii enkeeya nemayiolo atua enkaji ai.’

³⁶Neitanapisho olapolosani ajo meitayuni ntokitin naatii ina aji eton eitu elo olapolosani ajurru ina keeya, pee meibalunyeki nena pooki naatii atua ina aji aajo keiduruk. Ore te siadi neitoki olapolosani alo atua adol ina aji.

³⁷Nelo ninye ajurru ina keeya, naa tenetii enkeeya isunta eina aji etii iltipot oonyori o loonyokie, naa tenelioo aa eijo kegut aalang esuntai,

³⁸neipang olapolosani teina aji alo kutukaji, neiken ina aji nkolong'i naapishana.

³⁹Neitoki olapolosani alotu te nkolong e naapishana, aing'uraa, ore pee eidapashakine enkeeya isunta eina aji,

⁴⁰netum taa olapolosani aitanapisho meitayuni lelo soito ootii enkeeya nenang'akini ninche atua ewueji neiduruk tiatua enkanasa.

⁴¹Neisho ninye iliatuani leina aji meiutuuti nkaloli pooki, ore ina punyua naiutuutuni nepuoi aaibukoo te wueji neiduruk tiauluo enkanasa;

⁴²neitokini taa aayau kulikae soito nepiki erishata e lelo soito, neyau ninye ae turoto nemurie enkaji.

⁴³“Teneitoki ina keeya aigil ajing ina aji, eidipa ninye aitayu isoito neiutuutuo ina punyua neitoki amur te nturoto,

⁴⁴nelo olapolosani aing'uraa, naa teneibulayie ina keeya ina aji, naa enkeeya oo lbolot torrono natijing'a atua ina aji naa keiduruk ninye.

⁴⁵Naa keuroo ninye ina aji o soito lenyena o mbaoi enyena o ina turoto pooki e nkaji, nenap ninye ninche auluo enkanasa aya ewueji neiduruk.

⁴⁶Ore sii oltung'ani ojing ina aji eton eikeno neaku ninye oloiduruk ometaa teipa.

⁴⁷Ore ilo oirrag tiatua ina aji neituku ilkilani lenyena, ore olonya endaa tiatua ina aji neituku ilkilani lenyena.

⁴⁸“Kake tenelotu olapolosani ajurrisho, neitu eibulu ina keeya ina aji ina kata eidipaki aatumur te nturoto, neibalunye olapolosani ina aji ajo meiduruk, amu eishiunyeki ina keeya.

⁴⁹Ore te nkipooto eina aji neya olapolasani inturkuluoni are kutiti, tenebo o nkeek o ltarakuai o enkarasha nanyokie o hisopo.

⁵⁰Neyieng emotonyi tiatua emoti oo nkulupuok te shumata enkare naruko,

⁵¹neitoki aya nena keek o ltarakuai o hisopo o ina arasha nanyokie tenebo o ina motonyi naishu. Neitadoiki ninche atua ilo sarge le motonyi nateyieng'aki tiatua enkare naruko, neisuaaki enkaji katitin naapishana.

⁵²Neipok ina aji teilo sarge le motonyi o te nkare naruko o teina motonyi naishu o too nkeek oo ntarakua o te hisopo o ina arasha nanyokie.

⁵³Neitoki taa aisho ina motonyi naishu meipang'a alo tiatua ina anasa alo ong'ata, neaku keitobir ninye olning'o lo sotua te nkaraki ina aji naa kesidanu ninye aaku meiduruk.”

⁵⁴Ena naa enkitanapata tialo pooki keeya oo lbolot o to lpepedoi o

⁵⁵te nkeeya oo lbolot natii enkila aashu atua aji,

⁵⁶te wueji netejia aashu teneiwotiwote aashu oltipoti

⁵⁷pee etumi aaitodolu enkata naiduruk o enkata nemeiduruk. Ena ninye enkitanapata te nkaraki enkeeya oo lbolot.