Read MAASAI REVISED PROTESTANT Ilawi 18 Bible Online

Ilawi 18 - MAASAI REVISED PROTESTANT bible

Ilawi 18

¹Nejoki Olaitoriani Musa,

²“Tiaaki iltung'ana loo Siraeli, Kara nanu Olaitoriani Enkai inyi.

³Miasiasa anaa enaasita loreren te nkop e Misiri, teine apa nemanya intae, nimiasiasa anaa enaasi te nkop e Kanaan, teine nayaita nanu intae nimipuopuo intae too nkiguanat enye.

⁴Entaas intae inkiguanat aainei nimbung'ubung'u inkitanapat aainei nipuoyieyie ninche. Kara nanu Olaitoriani Enkai inyi.

⁵Embung'a naa inkitanapat aainei o nkiguanat aainei, naa teneas oltung'ani nena neton eishu. Kara nanu Olaitoriani.

⁶“Metii oltung'ani te intae onyikaki olikae lenye le sotua aoru ilkilani aitalioo emasipaisho enye. Kara nanu Olaitoriani.

⁷Mioru ake papaai lino ilkilani aitaa olmasipai amu emasipaisho e ng'utunyi ina. Ng'utunyi ina, nimilo naa aitalioo emasipaisho enye.

⁸Milo aitalioo emasipaisho e nkitok e papaai lino, amu emasipaisho e papaai lino ina.

⁹Mintalioo masipaisho e nkanashe ino, ning'arie menye aashu ina tito e ng'utunyi aa einoti e ang aashu enayawuaki.

¹⁰Nimintalioo emasipaisho entito o layioni lino aashu ene ntito e ntito ino amu ore emasipaisho enye naa emasipaisho ino makewan.

¹¹Mintalioo emasipaisho e ntito ning'arie menye, ina naino te papaai lino, amu enkanashe ino ninye.

¹²Mintalioo emasipaisho e nkanashe e papaai lino amu eno lmarei le papaai lino ninye.

¹³Mintalioo emasipaisho e nkanashe e ng'utunyi amu eno lmarei le yieyioo lino ninye.

¹⁴Mintalioo emasipaisho o lalashe papaai lino, aa taa minyikaki enkitok enye, amu nkapu ino ninye.

¹⁵Mintalioo emasipaisho e nkitok o layioni lino, amu entito ino ninye, mintalioo emasipaisho enye.

¹⁶Mintalioo emasipaisho e nkitok o lalashe lino, amu emasipaisho o lalashe lino.

¹⁷Mintalioo emasipaisho e nkitok tenebo o entito enye, nimiya entito o layioni lenye aashu entito e ntito enye aitalioo emasipaisho enye; nkanashera inono ninche, entorroni ina.

¹⁸Nimiya enkanashe e nkitok ino ayam eton eishu enkanashe enye.

¹⁹“Milo enetii enkitok aboitare eton etii erishata enye o lapa.

²⁰Nimiboitare enkitok olelatia ino apik kewan entioto te ninye.

²¹Minchooyo ae nabo oo nkera inono meitarasari to lasar le nkima aaisho enkitanyaanyukoto e nkai e Molek aisarkionie enkarna e Nkai ino. Kara nanu Olaitoriani.

²²Miboitare ake olee aitaa enkitok; entaboi ina.

²³Nimiboitare ake eng'ues pooki aisarkionie kewan te ninye, nemeisho enkitok kewan eng'ues metaboitare, entaboi ina.

²⁴“Emisarkionie ate tiae nabo e kuna baa, amu te kuna pooki eisarkionie ate lelo oshon pooki laaraa nanu te dukuya intae.

²⁵Neaku enkop enaisarkionieki, neaku aitamio nanu enkitarruorroto enye, nelopu enkop lelo oomanya.

²⁶Kake embung'a intae nkitanapat aainei o nkiguanat aainei nimiasiasa ae nabo e kuna tabo, aa oinoti aashu ilo otadokuo oidurrua alotu atua intae.

²⁷(Amu ore kuna baa o lminong pooki netaasa apa iltung'ana lena kop, lelo apa ootii dukuya intae, neaku eisarkionieki enkop);

²⁸pee melopu ake intae enkop, tenisarkionienie, anaa apa enatolopua ilo osho otii dukuya intae.

²⁹Amu ore oloba anaa oloas nabo e kuna baa o lminong, ore lelo tung'ana oas neiwuang'ieki too ltung'ana lenye.

³⁰Metaa embung'a enkitanapata ai nimiasiasa aikata ae nabo e kuna tabo oo lkuaki apa ootaasaki te dukuya intae, nimisarkionienie ate te ninche. Kara nanu Olaitoriani Enkai inyi.”