Read MAASAI REVISED PROTESTANT Ilawi 19 Bible Online

Ilawi 19 - MAASAI REVISED PROTESTANT bible

Ilawi 19

¹Nejoki Olaitoriani Musa,

²“Tiaaki olturrur pooki loo ltung'ana loo Siraeli, entaa intae sinyat, amu ore nanu Olaitoriani Enkai inyi naa kara sinyati.

³Nchoo eyanyit pooki ng'ae te intae ng'otonye o menye, nimbung'ubung'u inkolong'i e Sabato aainei. Kara nanu Olaitoriani Enkai inyi.

⁴Emimbelekenyakino inkitanyaanyukot aashu intobirakiki ate nkaitin oo ntokitin naasholuno. Kara nanu Olaitoriani Enkai inyi.

⁵“Tenintarasaa olasar loo nkishoorot e seriani aaisho Olaitoriani, entarasai intae pee etumi aatang'amai intae.

⁶Neinosi ilo asar ina olong ake nintarasaitie, aashu enkolong nasuju, ore pooki toki naleku ometaa enkolong e uni nepuoi aapejoo te nkima.

⁷Teneinosi ninye penyo te nkolong e uni, naa olminong, meitokini aang'amaa.

⁸Ore pooki ng'ae onya nenap entorroni enye, te nkaraki naisarkionie ninye entoki sinyati o Laitoriani, ore ilo tung'ani neiwuang'ieki too ltung'ana laainei.

⁹“Teninkes enkurma nituturo te nkop ino, niminkes aitabaiki ineebayie nimishuko alo agilu lelo ng'osil ootung'uayioki.

¹⁰Miishu ilng'anayio to sabibu lino, nimisotu lelo ootusulari to sabibu lino. Tung'uai ninche te nkaraki ilaisinak o te nkaraki olomoni. Kara nanu Olaitoriani Enkai ino.

¹¹“Mipurrisho, nimiasisho te sunkuroisho, nemilej oltung'ani olikae.

¹²Niminyanya ilmuma te nkarna ai te sunkuroisho, pee misarkionienie enkarna e Nkai inyi. Kara nanu Olaitoriani.

¹³“Mintorogony o lelatia ino aashu ipur ninye. Mincho olekoisiaayio lo sinka lino eirrag te nkaji ino enkewarie pooki o mekenyu.

¹⁴Midek oltung'ani ming'ani nimipikaki oltung'ani modooni entoki narror, kake turia Enkai ino. Kara nanu Olaitoriani.

¹⁵“Mipik enyorrakinoto endung'oto enkiguana, mipik olkep olaisinani nimiureyu ilo kitok, kake te sipata tudung'oki enkiguana ole latia ino.

¹⁶Milo iyie idie o idie anaa olaitang'oroni tiatua iltung'ana linono, nimintashe iyie aitang'or enkishui o lelatia ino, Kara nanu Olaitoriani.

¹⁷“Mimbayu olalashe lino tiatua oltau lino kake entoning'oto pee minap ake eng'oki te nkaraki ninye.

¹⁸Mintalaku ake elap aashu iata enkiba tiatua oltau tialo ilayiok loo ltung'ana linyi, kake tonyorra olelatia ino anaa kewan ino. Kara nanu Olaitoriani.

¹⁹“Embung'a nkitanapat aainei. Miputokiki nkishu inyi iloing'ok loo mpukunot naapaasha, nimiun tiatua enkurma ino mpukunot are oo lanterera niminchop olkila oripa too mpukunot are oo nkarash.

²⁰“Teneboitare olee enkitok nara errindik natisira likae lee neton eitu elakuni aashu eishoori ae toki, nejurri ina bae, neitamei kake meari ninche metuata, te nkaraki naa errindik ina kitok.

²¹Kake keyau ilo lee enkishooroto o lasar le nkitarruorroto ayaki Olaitoriani, kutukaji eilo ng'obor le ntumo, neyau ninye olmeregesh metaa olasar le nkitarruoroto.

²²Neitoki olapolosani aitobir olning'o lo sotua te nkaraki ninye teilo meregesh lo lasar le nkitarruorroto te dukuya Olaitoriani te nkaraki ina ng'oki nataasa ninye; ore ina ng'oki nataasa ninye nepalakini.

²³“Tenipuopuo kenya aajing ina kop, niunuunu mpukunot pooki oo lkeek te nkaraki endaa, niyiolouu lelo ng'anayio lenye aajo etomitikioki intae ilarin okuni, minyanya ninche.

²⁴Ore to lari liong'uan nesinyayu ilng'anayio lenye pooki, enkishooroto enkisisa to Laitoriani.

²⁵Kake ore to lari le imiet nindimidimi aainosa ilng'anayio lenye, pee etum aaishoo intae emponaroto sapuk. Kara nanu Olaitoriani Enkai inyi.

²⁶“Minyanya pooki toki natii osarge atua. Emimbonishorere nimisiaishore ntaleng'o.

²⁷Emintamanaa endung'oto oo lpapit loo lmowuarak loo lukuny inyi nimibarnibarna mbat oo lmunyo linyi.

²⁸Eming'am iseseni linyi te nkaraki iloo tuata aashu imishiriri ate. Kara nanu Olaitoriani.

²⁹“Misarkionie entito ino aisho metaa emulayoi, meiput ake enkop entorroni e nkiborra oo nkonyek neaku enkop enabore esuujisho.

³⁰Embung'a Sabatoni aainei niyanyititi enkaji ai Sinyati. Ara nanu Olaitoriani.

³¹“Emipuopuo aaikilikuanishore iltung'ana ooirorie nkiyang'eta oo lootuata aashu lasakutok. Emipuopuo aaing'oru ninche, aaisarkionie ate te ninche. Kara nanu Olaitoriani Enkai inyi.

³²“Tudumunye iyie te dukuya lelo ooibor lukuny, iyanyita oltung'ani moruo naa turia Enkai ino. Kara nanu Olaitoriani.

³³“Teneidurru oltung'ani omoni alotu amany enkop ino mintaas ninye entorrono.

³⁴Ore ilo omoni likindurraka naa keyooki atiu anaa oinoti tiatua intae, naa tonyorra naa ninye anaa kewan. Amu irara sii apa intae ilomon te nkop e Misiri: Kara nanu Olaitoriani Enkai inyi.

³⁵“Mias entorrono te ndung'oto e nkiguana, te ntemata enkadoro aashu te nkineneng e nkiroishi aashu te nkumoi.

³⁶Ng'oru ntemeta nemetii elejare o entemata e nkiroishi nemetii elejare, o soito le nkiroishi leme le lejare efa nairirikino o hini nairirikino. Kara nanu Olaitoriani Enkai ino, oyawua intae aitupuku te nkop e Misiri.

³⁷Embung'a naa nkiguanat aainei pooki o nkitanapat aainei pooki niasiasa ninche. Kara nanu Olaitoriani.”