Read MAASAI REVISED PROTESTANT Ilawi 22 Bible Online

Ilawi 22 - MAASAI REVISED PROTESTANT bible

Ilawi 22

¹Nejoki Olaitoriani Musa,

²“Tiaaki Aron o layiok lenyena metalama nena tokitin naasinya oo ltung'ana loo Siraeli naaishoo ninche nanu, pee meisarkionie enkarna ai sinyati. Kara nanu Olaitoriani.

³Tiaaki ninche, ‘Ore pooki ng'ae tiatua iishoritin inyi pooki, too lporori linyi pooki, tenenyikaki nena tokitin sinyat, naaitisinyakita iltung'ana loo Siraeli Olaitoriani eeta kereek, ore ilo tung'ani neiwuang'ieki aaitung'uaa ine natii. Kara nanu Olaitoriani.

⁴Meetae hoo obo le ishoi e Aron oata enkeeya oo lbolot, aashu oruko nkimek oidim ainosa nena tokitin sinyat ometaba anaa neaku biyoto. Ore pooki ng'ae oiseyie entoki nemesinya aibung empopok aashu oltung'ani opuku enkare e lewaisho,

⁵anaa oloba anaa oloiseyie entoki naikurtutari naidim aidurukie ninye, aashu oltung'ani oidim aitasuroki enkiduruk, naba ake duoo ninye anaa enaata,

⁶ore ilo tung'ani oiseyie mbaa naaikununo neijia neaku ninye oloiduruk ometaa teipa nemenya nena tokitin sinyat meteleku ake teneituku osesen lenye te nkare.

⁷Ore ake pee edoyio enkolong nemeitoki ninye aiduruk; ore te siadi neidim ninye ainosa nena tokitin sinyat, amu kuna ninche ndaiki enyena.

⁸Ore entoki natua openy, aashu enainosa ng'uesi entim menya ninye, apik kewan olduruk te ninche. Kara nanu Olaitoriani!’

⁹Nchoo naa ilapolosak eibung inkitanapat aainei, pee menap ing'ok te nkaraki ninye, neye ninche teine neisarkionie nkitanapat aainei, Kara nanu Olaitoriani oitisiny ninche.

¹⁰“Menya olomoni ina toki sinyati. Ore olomoni lo lapolosani aashu osinka lo le koisiaayio nemenya ina toki sinyati.

¹¹Kake teneinyiang'u olapolosani orrindik too mpisai aitaa emasaai enye makewan, neidim ilo rrindik ainosa ina toki. Ore lelo ootoiwuoki tiatua enkaji enye neidim aainosa ina daa enye.

¹²Teneyam oltung'ani leeiking'a entito o lapolosani nemenya ina tito nena kishoorot oo ntokitin sinyat.

¹³Kake tenaa enkoliai ina tito olapolosani aashu etung'uayie olpayian lenye, nemeeta nkera, neshukunye alotu enkang e menye, anaa apake te keraisho, neidim ninye ainosa ina daa e menye. Ore ake eyia meetae oltung'ani leeiking'a oidim ainosa ina daa.

¹⁴Naa tenenya oltung'ani ina toki sinyati meyiolo ajo endaa sinyati neponiki ninye ematua e imiet e tomon oo ntokitin enyena alak, neisho ina toki sinyati olapolosani.

¹⁵Meisarkionie ilapolosak nena tokitin sinyat oo ltung'ana loo Siraeli, naaitarasaki ninche Olaitoriani,

¹⁶aaitarasaki ninche metanapa enkitarruoroto o enkitadiaata, te nkinosata e nena tokitin enye sinyat, amu kara nanu Olaitoriani oitisiny ninche.”

¹⁷Neitoki Olaitoriani ajoki Musa,

¹⁸“Tiaaki Aron o layiok lenyena o ltung'ana pooki loo Siraeli, Teneitayu ake oltung'ani le nkaji e Siraeli aashu oloeuo amanyisho tiatua Israel olasar lenye, tenaa entoki olmumai lenye aashu tenaa enkishorunoto to ltau lo lpela naitarasakini Olaitoriani anaa olasar opejori.

¹⁹Pooki ake pee eng'amaroyu naa tenaa olbung'ae lemeeta entioto aa oloo nkishu aashu oo loo nkerra aashu o loo nkineji.

²⁰Kake emipolos ake entoki naata entioto, amu meng'amaroyu ina tialo intae.

²¹Naa tenepolos ake ninye oltung'ani olasar le seriani apolosaki Olaitoriani, pee eitabaya olmumai aashu tenaa olasar lo lpela, oing'uaa eluaata oo nkishu aashu eluaata oo ntare, naa pooki ake pee eng'amaroyu naa tenaa bayaroti nemetii entioto atua ninye.

²²Ore ng'uesi modook aashu ng'ojinia maiman, anaa nemelulung'a seseni anaa naaruko nkimek anaa enaata olpepedoi, emipolosaki Olaitoriani nena ng'uesi aashu intaikinyenye ilasarri oopejokini te nkima Olaitoriani te nchumata olperere lo lasar.

²³Ore oloing'oni aashu ositima le ker oata erubata osesen lenye naado aashu endorrop nindimidimi intae aitaa olasar lo lpela, kake ore to lasar le nkitabaroto o lmumai menyorrarri.

²⁴Ore pooki ng'ues natokordaki nejing olbae ilterege lenyena aashu eidong'oki, aashu etopolosaki aashu etegelemaki, mipolosakiki Olaitoriani aashu intaunyenye ilasarri tiatua enkop inyi;

²⁵nimintobiriri anaa endaa e Nkai inyi pooki ake ninye ng'ues nayawua oltung'ani omoni. Amu keeta ninche ntiot te nkaraki melulung'a ninche nemeng'amaroyu tialo intae.”

²⁶Nejoki Olaitoriani Musa,

²⁷“Teneini olbung'ae aashu ositima le ker aashu ole kine, neton ninye nkolong'i naapishana tenebo ng'otonye. Ore te nkolong e isiet neaku keng'amaroyu anaa olasar opejokini te nkima Olaitoriani.

²⁸Naa tenaa duoo enkiteng ng'otonye aashu enker nimiyieng ninye tenebo olashe o ng'otonye aashu olkuoo o ng'otonye te nkolong nabo.

²⁹Naa tenipolos olasar le nkishooroto e nashe apolosaki Olaitoriani nipolos naa te nkoitoi naishiaa pee etum ataa keng'amaroyu.

³⁰Nenyae ninye teina olong ake, nimileku ae toki mekenyiki. Kara nanu Olaitoriani.

³¹“Metaa embung'a nkitanapat aainei niasiasa ninche: Kara nanu Olaitoriani.

³²Nimisarkionienie ake enkarna ai sinyati, kake kaayanyituni nanu tiatua iltung'ana loo Siraeli. Kara nanu Olaitoriani oitisiny intae,

³³oyawua apa intae aitupuku te nkop e Misiri pee aaku Enkai inyi. Kara nanu Olaitoriani.”