Read MAASAI REVISED PROTESTANT Ilawi 24 Bible Online

Ilawi 24 - MAASAI REVISED PROTESTANT bible

Ilawi 24

¹Nejoki Olaitoriani Musa,

²“Ntanapa iltung'ana loo Siraeli pee kiyaki iyie eilata nasila oo loirienito te nkaraki oltaa, pee eton oltaa eyupuyup anaake.

³Ore tioriong ilo karasha le shakenisho tiatua ilo ng'obor le ntumo, nepik Aron ine aitobiraki ebaiki teipa ometaa tadekenya dukuya Olaitoriani anaake. Keaku ena enkitanapata ntarasi tiatua iishoritin inyi pooki.

⁴Kepik Aaron iltaai aitobiraki aiteleiki lelo iketa loo ltaai le saabu nasila te dukuya Olaitoriani anaake.

⁵“Niya iyie entapa napuyiapui nipej imukateni tomon oaare eina tapa, naa irubat are e tomon e Efa ake emukate.

⁶Nirragie ninche aitatash maare, neaku ile etatashaki te nchumata eina misa e saabu nasila.

⁷Nipik iyie enkorropil nasila pooki kereri pee etum atupudare ina mukate anaa erubata nadamuni napuoi aaisho Olaitoriani te nkima.

⁸Ore te pooki olong e Sabato neirragie Aron aitobiraki te dukuya Olaitoriani anaake te rishata oo ltung'ana loo Siraeli anaa olning'o lo sotua ntarasi.

⁹Naa keaku ina mukate ene Aron o layiok lenyena, nenya ninche tiatua ine wueji sinyati, amu ore te ninye naa erubata sinyati oleng naing'uaa nena kishoorot naapejokini Olaitoriani te nkima, embae nadamuni anaake.”

¹⁰Ore apa nabo olong, nelo olayioni le nkitok oo Siraeli laa ole Misiri menye, tenebo o iltung'ana loo Siraeli. Ore ilo ayioni le nkitok oo Siraeli o lee loo Siraeli neitarrikino tiatua enkang oo lng'oborri.

¹¹Ore ilo ayioni le nkitok oo Siraeli nemor ina Arna e Nkai nedek. Neyau ninche ninye enetii Musa. Ore apa enkarna e ng'otonye naa Shelomit, entito e Dibri, o losho le Dan.

¹²Neikenoo ninche ninye ometaba anaa neibalakinyeki ninche yieuna o Laitoriani.

¹³Nejoki Olaitoriani Musa,

¹⁴“Empang'unye tiatua enkang oo lng'oborri ilo otedekishe naa nchoo lelo pooki ootoning'o ninye eiteleiki nkaik enye endukuya enye, naa nchoo eumata pooki ear ninye too soito.

¹⁵Naa entiaaki lelo tung'ana loo Siraeli, ore ilo pooki odek Enkai enye nenap eng'oki enye.

¹⁶Ore ilo omor enkarna o Laitoriani neari metua. Near ninye olturrur pooki too soito aa ilo omoni aashu ilo inoti. Tenemor ninye ina Arna neari metua.

¹⁷Ore ilo oar oltung'ani metua, neari metua.

¹⁸Ore ilo oar eng'ues metua, nelak enkishui ake o te nkishui.

¹⁹Tenepik oltung'ani ole latia enye olbae, ore anaa enataasa neitaasi sii ninye.

²⁰Engilata o loito te ng'ilata oloito, enkong'u o te nkong'u, olalae o to lalae, anaa enaitaasa ninye olikae neijia sii ninye eitaasi.

²¹Ore ilo oar eng'ues metua nelak. Ore ilo oar oltung'ani metua neari sii ninye metua.

²²Embung'a intae enkitanapata nabo to lomoni o to inoti amu kara nanu Olaitoriani Enkai inyi.”

²³Neaku eirorie apa Musa iltung'ana loo Siraeli, neyaki ninche ninye ilo otedekishe te nkang oo lng'oborri, nenang ninche ninye too soito. Neiko neijia iltung'ana loo Siraeli anaa enaitanapa Olaitoriani Musa.