Read MAASAI REVISED PROTESTANT Ilawi 25 Bible Online

Ilawi 25 - MAASAI REVISED PROTESTANT bible

Ilawi 25

¹Nejoki Olaitoriani Musa te nchumata o Ldoinyo le Sinai,

²“Tiaaki iltung'ana loo Siraeli, tenipuonunu kenya ina kop naisho intae, neibung ina kop Sabato te nkaraki Olaitoriani.

³Ore too larin ile niunuunu intae nkurman inyi, ore te kulikae arin ile nintobiriri ilng'anayio linyi, nisotisoto ilng'anayio lenye;

⁴kake ore to lari liopishana neaku Sabato naeng'ieng'are enkop meturo, Sabato to Laitoriani, miunuunu intae nkurman inyi aashu intobiriri ilng'anayio linyi.

⁵Ore ina nabulu openy tiatua nkurman inyi nimintayuyu aaya. Ore isabibu leilo shani leitu eitobiri nimisotisoto intae. Keaku olari oyeng'iyeng'ae aaitirring'a te nkaraki ina kop.

⁶Ore ina Sabato ena kop naa keisho intae endaa, intae maate o rrindiki linyi loo lewa o loo nkituaak o sinkan ooigero o ilo omoni lishularere

⁷o nkishu inono sii o nena ng'uesi naatii atua enkop ino. Ore pooki naaiu enkop naa keaku endaa.

⁸“Naa inken iyie iwikii naapishana oo larin, katitin naapishana ilarin oopishana, peyie aa ore nena katitin naapishana o nena wikii naapishana oo larin neaku ilarin artam ooudo.

⁹Nintoki taa airriwaa oltung'ani meshomo enkop pooki aosh esekekua aitadar te nkolong e tomon o lari liopishana. Ore teina olong o lning'o lo sotua niosh esekekua aitadar tiatua enkop ino pooki.

¹⁰Nintisinyinyi olari lionom nilimumu aaibalunye elakunoto tiatua ina kop pooki aaliki lelo pooki oomanya; naa keaku osirua te intae, ina kata errinyokino ake oltung'ani te ntae ntokitin enyena o lmarei lenye.

¹¹Ore teilo ari lionom naa keaku osirua te intae, ore teina nimiunishosho aashu inkesikese ina nabulu openy, aashu isotutu ilng'anayio loo sabibu leitu eitobiri;

¹²amu osirua naa keaku sinyati te intae, ninyanya intae nena naabulu too nkurman.

¹³“Ore tiatua ele ari lionom nerrinyo ake oltung'ani te intae alo enetii imasaa enyena.

¹⁴Naa tenimiraki ole latia ino aashu teninyiang'u to le latia ino, niminyalakinono maate.

¹⁵Ore anaa eneba ilarin te siadi ilo sirua neijia eba enkinyiang'a teilo le latia ino, naa te risioroto oo larin oong'or enkata e nkikesare kimiraki ninye.

¹⁶Tenaa kumok ilarin niponaa iyie enkinyiang'a, naa tenaa kuti ilarin nintaa kiti enkinyiang'a, amu esiana oo larin ninye kimirakinye iyie.

¹⁷Eminyala intae maate kake entureita Enkai inyi amu kara nanu Olaitoriani Enkai inyi.

¹⁸“Neaku embung'a intae nkitanapat aainei nimbung'ubung'u nkiguanat aainei niasiasa ninche, pee itonini tiatua ina kop te seriani.

¹⁹Keiu ina kop ilng'anayio lenyena, ninyanya intae aaraposho nitonini tiatua ninye te seriani.

²⁰Naa tenijojo intae, “Kainyoo kinya teilo ari liopishana, tenimikiun aashu kinturrur enkurma ang?”

²¹Kairriwaki nanu emayianata ai shumata intae to lari le ile pee etum enkop inyi atoiu ilng'anayio too larin okuni.

²²Ore iunishosho to lari le isiet ninyanya endaa musana, ometabau olari lioudo olotunye endaa enye, inyanya endaa musana.

²³Memiri enkop te nkinyiang'a e katukul, amu enaai enkop amu irara intae ilomon ooidurrakita tenebo nanu.

²⁴Naa ore tiatua ina pooki nitii entipik enkinyiang'a e lakunoto.

²⁵“Teneaku aisinani olalashe lino, nemir embata oo masaa enyena, ore ilo alashe onyikare nelotu ashuku ina natimira olalashe lenye.

²⁶Tenemeeta oltung'ani likae oshuku ina, kake neitoki ninye adupoyu netum ntokitin naashukunye,

²⁷nchoo ninye eiken ilarin ebaiki ina kata apa pee emir neitoki ninye alak aitulus teilo tung'ani apa otimiraka, nerrinyokino taa ayau atua imasaa enyena.

²⁸Kake tenemeeta ninye ntokitin naaidip naarrinyokinye kewan enye, neaku naa ore apa ina natimira neton too nkaik eilo apa oinyang'ua ometabau olari le Yubilii[5]. Ore te Yubilii nelaari ninye nerrinyokino ninye imasaa enyena.

²⁹“Tenemir oltung'ani enkaji enye namanya, natii atua enkanasa nasheta isunta, neidim ninye aitalaku tiatua olari olulung'a eidipaki aatimir, to lari olulung'a elo ninye atum esipata nashukunye.

³⁰Naa teneitu ekorduni tiaatua olari olulung'a, ore ina aji natii atua ina anasa nasheta sunta neitisipi katukul aajo ene ilo apa oinyiang'ua, tiatua iishoritin enyena pooki; nemepuoi aarriny to lari le Yubilii.

³¹Kake ore nkajijik e nena ang'itie kutiti nemeeta isunta naamanita ninche neitanyaanyukieki inkurman e nkop; keidimi aatushuku, naa kepuoi aarrinyu to lari le Yubilii.

³²Ore ake eyia, ore nena anas oo Lawi, nena ajijik naatii atua nkanas enye keidim ninche aatushuku pooki kata.

³³Naa tenetii obo loo Lawi lemeasishore esipata enye e nkordunoto, ore apa ina aji natimiraki tiatua enkanasa enye nerrinyuni to lari le Yubilii; amu ore nena ajijik naatii atua nkanas oo Lawi naa imasaa enye tiatua ltung'ana loo Siraeli.

³⁴Kake ore nkurman e nena nemeidimi aatimir amu imasaa enye nena ntarasi.

³⁵“Naa teneaku olalashe lino lishulare aisinani, neaku meidim atareto kewan, tareto iyie ninye, anaa olomoni aashu anaa olotadokuo likiewuo ashulare.

³⁶Ming'orunye ninye dupoto aashu ing'orunye toki, kake turia Enkai ino pee etum olalashe lino atotona te mbata iyie.

³⁷Misilenoki iyie ninye mpisai inono te mponikinoto nimincho iyie ninye endaa ino aing'oru dupoto.

³⁸Kara nanu Olaitoriani Enkai ino, ilo likiyawua iyie aitupuku te nkop e Misiri pee kincho iyie enkop e Kanaan, neaku ninye Enkai ino.

³⁹“Naa teneaku olalashe lino aisinani te mbata iyie, nikimiraki kewan enye, mincho iyie ninye mikisiaayia anaa orrindik.

⁴⁰Keaku ninye tenebo iyie anaa olaisiaayiani lo le koisiaayio o anaa sii olomoni. Eikisiaai ninye iyie ometabau olari le Yubilii,

⁴¹nikitum taa ashomo atung'uai, ninye o nkera enyena naatii tenebo ninye, neshuko alo enetii olmarei lenye, neshuko alo enetii imasaa o loo menye.

⁴²Amu isinkan laainei Isiraeli apa layaua nanu aitupuku te nkop e Misiri mepuoi aamir ninche anaa rrindiki.

⁴³Milo iyie aitore ninche te nkisikong'ata kake turia Enkai ino.

⁴⁴Ore tialo ilewa aashu ing'oruo rrindiki linono ooba anaa iliaata indim iyie ainyiang'u ilewa aashu ing'oruo rrindiki tiatua lelo oshon likimanita iyie.

⁴⁵Indim sii ainyiang'u te lelo omon likindurrakita iyie o te lelo mareita lenye ootii tenebo iyie, te lelo ootoiwuoki tiatua enkop ino; neaku ninche imasaa inono.

⁴⁶Ning'ueikiki ilayiok linyi te siadi intae, pee ejung aaitaa imasaa enye intarasi. Indimidimi intae aaitaa ninche irrindiki, kake ore te shumata, ilalashera linyi lelo tung'ana loo Siraeli mintorere te nkisikong'ata.

⁴⁷“Tenelo neaku olomoni aashu ilo oidurrua karsis, ore olalashe lino otashare neaku aisinani nemiraki kewan ilo omoni aashu ilo oidurrua otii tenebo iyie, aashu obo lo lmarei leilo tung'ani omoni,

⁴⁸ore eidipaki aatimir ninye keidimi aatushuku ninye. Keidim obo loo lalashera lenyena atalaku ninye

⁴⁹aashu ole nkapu lenye aashu enkerai ole nkapu lenye, neidim atalaku ninye, aashu oltung'ani le sotua onyikare oleng ora ololmarei lenye neidim atalaku ninye, aashu tenekarsisu neidim atalaku kewan.

⁵⁰Neiken ninye tenebo o ilo apa oyawua ninye ebaiki ilo ari apa otimirakinye kewan ninye ometabau olari le Yubilii, ore enkinyiang'a e lakunoto enye neaku te risioroto oo larin. Ore apa enkata natii ninye tenebo ilo ora olopeny neikenari anaa enkata olaisiaayiani lo le koisiaayio.

⁵¹Naa teneton etii ilarin kumok, ore te risioroto enye nerriny alak ninche teina kinyiang'a apa natalaaki te nkaraki ninye, enkinyang'a e lakunoto enye.

⁵²Naa teneng'or ilkuti arin pee ebau olari le Yubilii, neikenakino ninche, ore te risioroto oo larin le nkisiayiare oong'or te ninye nelak ninye mpisai te nkaraki elakunoto enye.

⁵³Ore anaa osinka olaki to lari ake o to lari neijia ninye etiu tenebo ilo, nemeitore ninye ninye te nkisikong'ata te dukuya iyie.

⁵⁴Naa teneitu elakuni ninye te kuna oitoi; nepuoi naa aalaaya ninye to lari le Yubilii, ninye o nkera enyena naatii tenebo ninye.

⁵⁵Amu ore te nanu iltung'ana loo Siraeli naa isinkan, isinkan laainei ninche layaua nanu aitupuku te nkop e Misiri. Kara nanu Olaitoriani Enkai ino.