Read MAASAI REVISED PROTESTANT Ilawi 26 Bible Online

Ilawi 26 - MAASAI REVISED PROTESTANT bible

Ilawi 26

¹“Emintobirakiki intae ate inkaitin naaguetuno nimishetishete nkitanyaanyukot oo nkaitin naaguetuno aashu e ng'ape, nimintasheyieyie intae osoit le nkitanyaanyukoto tiatua enkop inyi, pee irrugokinono ninche amu kara nanu Olaitoriani Enkai inyi.

²Embung'a intae isabatoni aainei niyanyititi emanyisho ai sinyati. Kara nanu Olaitoriani.

³“Tinipuopuo intae too nkiguanat aainei nimbung'ubung'u nkitanapat aainei, niasiasa ninche,

⁴naisho nanu intae enchan inyi too rishat enye, netum enkop atoishoyu, ore ilkeek le nkurma neiu ilng'anayio lenye.

⁵Ore esototo oo nkurman inyi nebik ometabau enkata nasotuni isabibu, nebik isabibu ometabau enkata eunore. Ninyanya intae emukate inyi aaraposho nibikibiki tiatua enkop inyi te seriani.

⁶Naa kaishoru nanu eseriani tiatua ena kop; naa irurara intae nemeetae oltung'ani oiture intae; naiwuang'ie nanu ing'uesi torrok tena kop, nemeitoki olalem atii enkop inyi.

⁷Naa imirimiri intae ilmang'ati linyi, naa kebatata ninche to lalem te dukuya intae.

⁸Imiet linyi oopuo aamir iip, ore iip linyi nepuo aamir nkalifuni tomon, ore ilmang'ati linyi naa kepuo aabatata to lalem te dukuya intae.

⁹Naa kaing'or nanu intae naisho intae entoisho naponaa intae, naitadedeyie nanu osotua lai o intae.

¹⁰Naa inyanya intae endaa musana apa nitushuma, nintokiki aaiwuang'ie ina musana pee itumutumu enipikipiki eng'ejuk.

¹¹Naa kaitobir nanu emanyisho ai tiatua intae, nemeibelekenya oltau lai aibayu intae.

¹²Naa kalo nanu tiatua intae naaku Enkai inyi, niakuku intae iltung'ana laainei.

¹³Kara nanu Olaitoriani Enkai inyi, ilo apa oyawua intae aitupuku te nkop e Misiri, pee mintokiki aaku irrindiki lenye, natigila nanu isekenke e rrindikisho enye, naisho intae enchom intorioriri.

¹⁴“Kake tenimikining'ining'i intae nanu, nimiasiasa kuna kitanapat pooki.

¹⁵Tenianyianya intae inkiguanat aainei, naa teneibayu oltau linyi nkikoot aainei, metaa miasiasa intae nkitanapat aainei, pooki nigiligili intae osotua lai,

¹⁶naitaas nanu intae ena: nayau nanu shumata intae entaboi naluam intae te nkeeya nemeishiuni o lkirobi oitarruoo nkonyek neitemen enkishui inyi. Naa keaku tempesho iunuunu ilanterera linyi, amu kenya ninche ilmang'ati linyi.

¹⁷Kaipirakinore nanu intae aarare naa keari intae te dukuya ilmang'ati linyi, ore lelo ooiba intae naa kepuo aaitore intae, naa ilanyishosho intae meetae oltung'ani omirita intae.

¹⁸Naa ore etii kuna pooki neton ake mikining'ining'i intae, naitame intae aitulus katitin naapishana te nkaraki ing'ok inyi,

¹⁹naa kagil nanu olwuasa le ngolon inyi, naitaa nanu oloing'ang'e linyi metotiwuo anaa esekenkei naitaa enkop inyi anaa osuyai.

²⁰Neaku pesho enkisiaayiare e ngolon inyi, amu meitoki enkop inyi aiu entoki naponari, ore ilkeek leina kop nemeitoki aaiu ilng'anayio lenye.

²¹“Naa tenikipaasharere intae nanu, nimikining'ining'i nanu, nayau nanu shumata intae ilmeita kumok, aitulus katitin naapishana anaa enkumoi oo ng'ok inyi.

²²Naisho nanu ing'uesi e ntim meetu atua intae, naa ninche naapuonu aapur intae aaya nkera inyi, neinyial nchoo inyi, neitaa intae kuti, pee eitoliyioi inkoitoi inyi.

²³“Naa tenimikishukokinono intae nanu tena kitamioto, kake nikipaasharere nanu,

²⁴napaashare sii nanu intae, naosh nanu makewan intae aitulus katitin naapishana te nkaraki ing'ok inyi.

²⁵Naa kayau nanu olalem shumata intae, pee atum aitalaku elap te nkaraki ilo sotua, naa teninturrurrorro intae tiatua inkanas inyi, naa kairriu nanu olmeitai atua intae naa keyai intae aapik atua inkaik oo lmang'ati linyi.

²⁶Ore ina kata tenagil nanu ewueji inyi nepejunyeki imukateni, neaku tomon inkituaak naapeju imukateni inyi te wueji nebo, naa keyau ninche imukateni inyi te ntemata e nkiroishi, ninyanya intae, nimiraposhosho.

²⁷“Naa tenimikining'ining'i nanu etii kuna pooki, nipuopuo torrekie laapaashare nanu,

²⁸nalo sii nanu apaashare ntae te ngoro napi, naitame nanu intae makewan katitin naapishana te nkaraki ing'ok inyi.

²⁹Inyanya intae inkiri oo layiok linyi, ninyanya inkiri oo ntoyie inyi.

³⁰Naa kaidakie nanu iwuejitin inyi e seremare, nasulaki enkop ilpereren linyi loo lasarri le nkorropil, nanang'aki mpopoki inyi nchumat enena kitanyaanyukot inyi, neibelekenya oltau lai aibayu intae.

³¹Naitaa nanu nkanas inyi ilmuateni naitomijoon inkajijik inyi sinyat, nemaitoki nanu aing'uaya isonkoyoni inyi naarropil.

³²Naitoliyio nanu ina kop, pee etum lelo mang'ati linyi ootii atua aaing'asiakinoto.

³³Naa kaidapashaki nanu intae iloshon, nashutu nanu olalem te siadi intae neaku keliyio enkop inyi, neaku nkanas inyi ilmuateni.

³⁴“Neshipakino taa ina kop isabatoni enyena ina kata aa mijooni, ina kata iyie itii enkop oo lmang'ati linono; netum taa enkop ayeng'iyeng'ayu neshipakino isabatoni enyena.

³⁵Ore teina rishata pooki nairrag ninye aa mijooni neyeng'iyeng'a ina kop, te nkiyeng'iyeng'ata apa nemeeta too Sabatoni nimanyanya intae ina kop.

³⁶Ore lelo linyi ooleku napik enkuretisho atua iltauja lenye teinakop oo lmang'ati lenye, ore embeneyio nakutita osiwuo neisikie ninche, naa keisik aailanyisho anaa ilo ooilany olalem, naa kepuo ninche memirita toki.

³⁷Naa kerrorro ninche aarrorrokino ake oltung'ani olikae, anaa oltung'ani oilany olalem, hoo nememirita ninche toki. Nimintoki aata engolon nintasheyie te dukuya ilmang'ati linono.

³⁸Naa ilo iyie aidaaya tenebo iloreren, ore ina kop oo lmang'ati linono nikinya iyie.

³⁹Ore lelo linyi tiatua enkop oo lmang'ati linyi neng'oroo enkishui enye te nkaraki ing'ok enye, ore sii te nkaraki ing'ok oo loo menye neng'oroo enkishui enye anaa ninche.

⁴⁰“Kake teneirridu ninche ntorrok enye o ntorrok oo loo menye teina suujisho naaitaasa ninche nanu o teina sii naashomo ninche aapaashare nanu

⁴¹omashomo nanu apaashare ninche, nayau nanu ninche atua enkop oo lmang'ati lenye. Teneitobor naa lelo tauja lenye lememurata neibelekenya teina torroni enye;

⁴²natum naa atadamu osotua lai o Yakobo nadamu nanu osotua lai o Isaak osotua lai o Abraham, nadamu nanu ina kop.

⁴³Kake keing'ua ninche ina kop neshipakino ninye isabatoni enyena ina kata eirrag aa mijooni metii ninche; naa keibelekenya ninche teina torroni, te nkaraki apa natemenaitie nkitanapat aainei, neibayu iltauja lenye nkiguanat aainei.

⁴⁴Ore ake eyia te nena pooki, ina kata etii ninche atua enkop oo lmang'ati lenye nemamenaa nanu ninche, nemaibayu nanu ninche ometaa kaidakie nanu ninche katukul nagil osotua o ninche, amu kara nanu Olaitoriani Enkai enye;

⁴⁵kake ore te nkaraki ninche kadamu osotua o loo nkakuyiaa lenye apa layaua nanu ninche aitupuku te nkop e Misiri too nkonyek oo loshon, pee atum nanu ataa Enkai enye. Kara nanu Olaitoriani.”

⁴⁶Kuna ninche nkiguanat o nkikoot o nkitanapat naaitobira Olaitoriani te rishata enye o ltung'ana loo Siraeli te nchumata Oldoinyo le Sinai aimunye Musa.