Read MAASAI REVISED PROTESTANT Ilawi 27 Bible Online

Ilawi 27 - MAASAI REVISED PROTESTANT bible

Ilawi 27

¹Nejoki Olaitoriani Musa,

²“Tiaaki iltung'ana loo Siraeli, tenenya oltung'ani olmumai o ltung'ani te nkaraki Olaitoriani te ntemata ino,

³naa ena entemata e nkinyiang'a ino, ore olee ebaiki ilarin tikitam omeitabaiki ilarin ntomoni ile naa keaku shekeli onom e nkosholai te risioroto eina shekeli e wueji sinyati.

⁴Naa tenaa eng'oruoi ninye neaku entemata ino tialo ninye shekeli tomoni uni.

⁵Naa tenaa ilarin imiet oltung'ani neilep ometabaiki ilarin tikitam. Ore entemata ino to lee naa shekeli tikitam, ore te ng'oruoi naa shekeli tomon.

⁶Naa tenaa olapa obo embotoro oltung'ani neilep ometabaiki ilarin imiet, ore entemata ino to lee naa keaku shekeli imiet e nkosholai, ore te ng'oruoi naa keaku shekeli uni e nkosholai.

⁷Naa tenaa ilarin ntomoni ile oltung'ani neilep neaku ore entemata e nkinyiang'a ino tialo olee naa keaku shekeli tomon o imiet, ore te ng'oruoi naa keaku shekeli tomon.

⁸Naa tenaa aisinani oltung'ani oleng meidim atalaa enkiririkinoto ino neyau ninye ilo tung'ani dukuya olapolosani netem olapolosani ninye; te risioroto eilo tung'ani apa oinosie olmumai.

⁹“Naa tenaa eng'ues naaku entoki napolosi, napolosakini Olaitoriani, ore pooki toki naikununo neijia napolosaki ake ninye oltung'ani Olaitoriani naa kesinya.

¹⁰Mewalie ninye ae toki aashu eibelekenyie ninye esidai te ntorrono, aashu entorrono te sidai; naa teneitobir ninye ae kibelekenyata e ng'ues o eng'ues, neaku naa ore pokira ina o idia naibelekenyaki neaku sinyati.

¹¹Naa tenaa eng'ues nemesinya anaa enemeishoori anaa olasar to Laitoriani neyau naa ilo tung'ani ina ng'ues dukuya olapolosani,

¹²nepik olapolosani ina ng'ues entemata e nkinyiang'a tenaa eisidai aashu tenaa aitorrono, anaa enitem iyie olapolosani ninye, neaku neijia etiu enkinyiang'a.

¹³Kake teneyieu ninye nerrinyu ninye neponaa e rubata e imiet e tomon entemata e nkinyiang'a.

¹⁴“Teneitayu oltung'ani enkaji enye metaa sinyati to Laitoriani, nelo olapolosani atem tenaa aisidai aashu aitorrono; ore anaa enatem olapolosani naa neijia etiu enkinyiang'a.

¹⁵Naa teneyieu ilo oishoo Olaitoriani ina aji neshuku enkaji enye, nelo ninye aponaa erubata e imiet e tomon e ntemata e nkinyiang'a too mpisai neaku taa enkaji enenye.

¹⁶“Naa teneiteng'elaki oltung'ani Olaitoriani ematua e nkurma enye naa enenye te njung'ore, ore entemata ino e nkinyiang'a naa te risioroto e unoto enye. Ore omeri nabo (mpilbil ile kutiti) e shairi neaku shekeli onom oo ropiyiani, e nkosholai.

¹⁷Naa teneiteng'el ninye aitisinyaki Olaitoriani enkurma enye ebaiki olari le Yubilii, neaku anaa ina temata ino e nkinyiang'a nalulung'a.

¹⁸Kake teneiteng'elaki ninye Olaitoriani enkurma enye te siadi Yubilii neikenaki taa olapolosani esiana oo mpisai te risioroto oo larin oong'or ometabau olari le Yubilii, neiwuang'ieki taa erubata teina kikenata ino.

¹⁹Naa teneyieu ilo oiteng'ela enkurma neshuku, neponaa naa erubata e imiet e tomon oo mpisai, neaku taa enenye.

²⁰Kake tenemeyieu ninye nerrinyu ina kurma, aashu tenetimiraka ninye ina kurma likae tung'ani nemeitokini aaigil aarrinyu;

²¹kake ore ina kurma tenelakuni to lari le Yubilii, neaku sinyati to Laitoriani, ore anaa enkurma naishoruno, keaku olapolosani ninye olopeny.

²²Teneiteng'elaki oltung'ani Olaitoriani enkurma nainyiang'ua ina apa neme enenye natujung'o,

²³netum naa olapolosani aikena entemata enye e nkinyiang'a ometabaiki olari le Yubilii, nelo taa ilo tung'ani aishooyo esiana e nkinyiang'a teina olong anaa entoki sinyati to laitoriani.

²⁴Ore to lari le Yubilii nerrinyokino ina kurma ilo tung'anai apa oinyang'unyeki, aa enenye apa ina kop natujung'o.

²⁵Ore pooki temata e nkinyiang'a naa te risioroto e shekeli e wueji sinyati, ore ngerrai tikitam naa shekeli nabo.

²⁶“Kake ore ilkikaunot loo ng'uesi naa ilo Laitoriani, meetae oltung'ani oidim aiteng'ela; aa olkiteng aashu enker, ino Laitoriani.

²⁷Naa tenaa eng'ues nemesinya, neinyiang'u naa ninye te ntemata ino e nkinyiang'a, neponiki erubata e imiet, naa teneitu eshukuni nemiri te ntemata ino e nkinyiang'a.

²⁸“Kake meetae entoki naiteng'elaki, ina naiteng'elaki oltung'ani Olaitoriani e pooki toki ake ninye naata, aa oltung'ani aashu eng'ues, aashu enkurma enye natujung'o, naidimi aatimir aashu aatushuku. Ore pooki toki naiteng'elakaki naa eisinyati oleng to Laitoriani.

²⁹Meetae hoo oltung'ani oiteng'elaki, oidimi aaidaikie tukul tiatua iltung'ana oidimi aatushuku keari ake metua.

³⁰“Ore pooki matua e tomon e nkop, aa lanterera le nkop aashu ilng'anayio loo lkeek naa ilo Laitoriani; kesinya ninche to Laitoriani.

³¹Teneyieu oltung'ani neshuku ae nabo e matua enye e tomon oo nkishoorot enyena nelo naa ninye aponaa ematua e imiet e tomon.

³²Ore ematua pooki e tomon oo nkishu aashu inoo nkerrai, ore eng'ues pooki e tomon e nena pooki naaim abori e ng'udi o lchekut, naa keaku sinyati to Laitoriani.

³³Meikilikuanu oltung'ani tenaa eisidai aashu eitorrono, aashu ewalu ninye; tenelo newalu ninye, neaku ore pokira ina natawalunyeki o ina natawaluaki neaku sinyati, nemeshukuni ninye.”

³⁴Kuna ninche nkitanapat naaitanapa Olaitoriani Musa te nkaraki iltung'ana loo Siraeli to ldoinyio le Sinai.