Read MAASAI REVISED PROTESTANT Ilawi 3 Bible Online

Ilawi 3 - MAASAI REVISED PROTESTANT bible

Ilawi 3

¹“Tenaa ore enkishooroto o ltung'ani naa olasar le seriani, neishooyo ninye enkiteng te luaata, olbung'ae aashu entawuo, inchoo eishooyo ina nemeeta entioto te dukuya Olaitoriani.

²Neiteleiki ilo tung'ani enkaina enye endukuya eilo asar lenye neyieng ninye te kutuk aji eilo ng'obor le ntumo, ore lelo ayiok le Aron, lelo apolosak neisuaaki ilo sarge ilo perere lo lasar aaitaman.

³Ore te ilo asar le seriani oishoruaki anaa enkishooroto naishori te nkima Olaitoriani, neishooyo ninye enkurriny pooki naimulumulita enkoshoke o enkurriny pooki e nkoshoke,

⁴o lairakuj pokira aare tenebo ina kurriny naimulumulita ninche oilo kina le moinyua oya ninye tenebo ilairakuj.

⁵Nepejoo ilayiok le Aron te nchumata olperere lo lasar ti oriong ilo asar opejori, otii enchumata oo nkeek te nkima, olasar le mpejoroto te nkima, esong'ouna narropil to Laitoriani.

⁶“Tenaa ore enkishooroto o ltung'ani o lasar le seriani oishori Olaitoriani naa oloo nkerra aashu nkineji, ositima aashu esupen neishoru enemeeta entioto.

⁷Teneishoru oltung'ani olkuoo le ker aitaa olasar lenye, neishoru ninye te dukuya Olaitoriani,

⁸neiteleiki enkaina enye endukuya eilo asar lenye, neyieng ninye te dukuya ilo ng'obor le ntumo. Ore lelo ayiok le Aron neisuaaki osarge ilo perere lo lasar aaitaman.

⁹Ore te ilo asar le seriani anaa enkishooroto napejokini te nkima Olaitoriani, neishooyo ninye eilata enye, eilata e nkidong'oe, aitabaiki oloito le nkoriong o ina kurriny naimulumulita enkoshoke o enkurriny pooki e nkoshoke,

¹⁰o lairakuj pokira oaare o ina kurriny naimulumulita ninche, oilo kina le moinyua neya ninye tenebo ilairakuj.

¹¹Nepejoo olapolosani ninche te nchumata olperere lo lasar anaa endaa naishoruaki tialo enkima aaisho Olaitoriani.

¹²“Tenaa ore enkishooroto o ltung'ani naa enkine, inchoo eishoru ninye te dukuya Olaitoriani,

¹³neiteleiki enkaina enye endukuya enye neyieng ninye te dukuya ilo ng'obor le ntumo, ore lelo ayiok le Aron neisuaaki osarge olperere lo lasar aaitaman.

¹⁴Netum taa aishooi te ninye, anaa olasar lenye oishori te nkima Olaitoriani: ina kurriny naimulumulita enkoshoke o enkurriny pooki enkoshoke,

¹⁵o lairakuj pokira oaare tenebo ina kurriny enye o ilo kina le moinyua oya ninye tenebo ilairakuj.

¹⁶Nepejoo olapolosani ninche te nchumata o lperere lo lasar anaa endaa naishoori te nkima metaa esong'ouna narropil. Ore enkurriny pooki naa eno Laitoriani.

¹⁷Keaku ena enkitanapata e anaake tiatua iishoritin inyi pooki, tiatua imanyishoritin inyi pooki, nchere minyanya intae enkurriny aashu osarge.”