Read MAASAI REVISED PROTESTANT Ilawi 7 Bible Online

Ilawi 7 - MAASAI REVISED PROTESTANT bible

Ilawi 7

¹Ena ninye enkitanapata o lasar le nkitarruorroto. Eisinyati ninye oleng.

²Ore teine wueji neyieng'ieki ilasarri oopejori, teine eyieng ninche olasar le nkitarruorroto, ore osarge lenye neisuaakini enchumata o lperere lo lasar aaitaman.

³Ore enkurriny enye pooki neishoori, ina ilata e nkidong'oe, o ina kurriny pooki naimulumulita enkoshoke,

⁴o lairakuj pokira oaare o ina kurriny naimulumulita ninche, o ilo kina le moinyua oya ninye tenebo o ilairakuj;

⁵nepejoo olapolosani ninche te nchumata olperere lo lasar anaa nkishoorot naapejokini Olaitoriani te nkima, olasar le nkitarruorroto ninye.

⁶Keidim pooki lee tiatua ilapolosak ainosa, nenyae tiatua ewueji sinyati, eisinyati ninye oleng.

⁷Ore olasar le nkitarruroroto, neikununo anaa olasar le ng'oki, nabo enkitanapata e pokira, ore ilo apolosani oitayu olning'o lo sotua neya nkiri eilo asar.

⁸Neya ilo apolosani oitayu olasar opejori olchoni leilo asar opejori oitayio ilo tung'ani.

⁹Ore pooki kishooroto e ntapa natapejoki tiatua ewueji napejishoreki o pooki toki naitobiraki te moti aashu teneyierishoreki naa eneilo apolosani oitarasayie aishooyo.

¹⁰Ore pooki kishooroto e ntapa, naipurjaki te ilata aashu enatoyio, neaku enoo layiok pooki le Aron, neishori pooki aaitorisioki.

¹¹“Naa ena enkitanapata o lasar le seriani oidim oltung'ani aishoo Olaitoriani.

¹²Teneishooyo ninye te nashe, neishooyo ninye imukateni neitu eisuishieki naaipurjaki te ilata, o nkaukau neitu eisuishieki o emukate e ntapa naelieki eilata napuyiapui naaipurjaki te eilata aaitobiraki.

¹³Ore tenebo ilo asar lenye le seriani le nkishooroto e nashe neyau ninye enkishooroto enye tenebo o imukateni naaisuishieki.

¹⁴Ore te kuna neishooyo ninye emukate nabo te pooki kishooroto, anaa enkishooroto to Laitoriani, neaku ena kishooroto eneilo apolosani oisuaaya ilo sarge lo lasar le seriani.

¹⁵Ore inkiri eilo asar lenye le seriani le nkishooroto e nashe nenyae teina olong olasar lenye, meisho ninye ae toki eleku o mekenyu.

¹⁶Kake tenaa ore olasar le nkishooroto enye naa enkitabaroto aashu enkishooroto o lpela[2] neinosi teina olong naishorua ninye olasar lenye, ore enkolong nasuju neinosi entoki natelekua,

¹⁷kake ore entoki naleku too nkiri eilo asar te nkolong e uni nepejori te nkima.

¹⁸Teneinosi pooki toki oo nkiri eilo asar lenye le seriani te nkolong e uni, ore ilo oishorua ilo asar nemeng'amuni, nemeikenakini ninye ilo asar, neaku ilo asar olminong, ore ilo oinosa nenap ninye enkitarruorroto enye.

¹⁹“Ore nkiri naaiseyie pooki toki nemesinya nemeinosi, nepejori te nkima. Ore lelo pooki lemeiduruk neidim aainosa nkiri,

²⁰kake ore ilo tung'ani onya nkiri eilo asar lo Laitoriani le seriani eeta ninye olduruk, nedung'ori ilo tung'ani aaitung'uaa iltung'ana lenyena.

²¹Naa teneiseyie oltung'ani ake ninye entoki naiduruk nemesinya, tenaa olduruk te tung'ani aashu eng'ues nemesinya aashu ae toki naiduruk o lminong paa keitoki anya nkiri olasar lo Laitoriani le seriani, neiwuang'ieki ilo tung'ani tiatua iltung'ana lenyena.”

²²Nejoki Olaitoriani Musa,

²³“Tiaaki iltung'ana le Israel, minyanya intae eilata o lkiteng, aashu enker, aashu enkine.

²⁴Ore eilata e ng'ues natua openy o eilata eina natara ilowuarak, neidimi aataasishore tiae oitoi, kake meeta nchere pee inosa intae.

²⁵Amu ore pooki tung'ani onya eilata e ng'ues naa ninye eishorieki Olaitoriani olasar te nkima neiwuang'ieki too ltung'ana lenyena.

²⁶Niminyanya sii osarge tukul, aa ole motonyi aashu aa ole ng'ues, te pooki wueji nimanyimanya.

²⁷Ore oloba anaa olonya pooki sarge, neiwuang'ieki ilo tung'ani too ltung'ana lo Laitoriani.”

²⁸Nejoki Olaitoriani Musa,

²⁹“Tiaaki iltung'ana le Israel, ore ilo oishoru olasar le seriani loo nkishoorot enyena aisho Olaitoriani neyaki ninye ina kishooroto enye Olaitoriani; te ilo asar loo nkishorunot enyena e seriani.

³⁰Neyau ninye too nkaik enyena makewan nena kishorunot naapejorieki te nkima olasar lo laitoriani; neyau ninye ina ilata tenebo o loikulu, pee etumi aayuko ilo oikulu anaa olasar oyuki te dukuya Olaitoriani.

³¹Nepejoo olapolosani eilata te nchumata olperere lo lasar, kake ore oloikulu neaku ole Aron o layiok lenyena.

³²Ore emuro e tatene nincho olapolosani anaa enkishooroto naing'uaa olasar lino loo nkishoorot inono e seriani.

³³Ore ilo tiatua ilayiok le Aron oishooyo osarge lo lasar le seriani o eilata neishori emuro e nkalo e tatene metaa erubata enye.

³⁴Amu ore ilo oikulu oyuki o ina muro naishoori, aawa nanu too ltung'ana loo Siraeli, aitayu tiatua ilasarri lenye loo nkishoorot e seriani, naisho nanu ninche Aron ilo apolosani o layiok lenyena, anaa erubata e anaake naitayu iltung'ana loo Siraeli.

³⁵Ena ninye erubata e Aron o layiok lenyena naing'uaa nena kishoorot naapejorieki te nkima olasar lo laitoriani, naiteng'elakaki ninche ina olong apa naitarasayioki ninche pee eisiaisho anaa lapolosak lo Laitoriani.

³⁶Eitanapishe Olaitoriani pee eishori ninche ena iltung'ana loo Siraeli ina olong apa natubukokoki ninche eilata aaput anaa erubata enye e anaake tiatua iishoritin enye pooki.”

³⁷Ena ninye enkitanapata o lasar opejori, olasar le ntapa, olasar le ng'oki o lasar le nkitarruorroto o le nkitisinyata o lasarri le seriani,

³⁸apa naitanapa Olaitoriani Musa te nchumata Oldoinyo le Sinai, ina olong apa naitanapa ninye iltung'ana loo Siraeli pee eyaki nkishoorot enye Olaitoriani to lpurkel le Sinai.