Read MAASAI REVISED PROTESTANT Ilawi 8 Bible Online

Ilawi 8 - MAASAI REVISED PROTESTANT bible

Ilawi 8

¹Nejoki Olaitoriani Musa,

²“Toriko Aron o layiok lenyena iriamariyie, niya lkilani o eilata naputishoreki o loing'oni lo lasar le ng'oki, o lmeregeshi aare o enkikapu oo mukateni neitu eisuishieki,

³ninturrur eumata pooki te kutukaji o lng'obor le ntumo. Neas Musa anaa enaitanapa Olaitoriani ninye.”

⁴Neiturrurri eumata te kutukaji o lng'obor le ntumo anaa enaitanapishe Olaitoriani.

⁵Nejoki Musa ilo turrur “Embae ena naitanapishe Olaitoriani metaasi.”

⁶Neriku Musa Aron o layiok lenyena neituku ninche te nkare.

⁷Neishopoki Aron olkila lioriong nerreten ninye te nkeene e mpolos, neitoki aishopoki ninye enkila sapuk, neishopoki tioriong enkila dorrop neen teina keene naripuno te nkarriyiano eina kila dorrop aeniki ninye.

⁸Nepik ninye enkila olgoo, ore ina kila olgoo nepik Urim o Tumim.

⁹Nepik ninye enkarasha endukuya enye, ore ina arasha te nkalo enkomom nepik enkishili e saabu, ina eilo marisian sinyati le nkitoo anaa enaitanapa Olaitoriani Musa.

¹⁰Ina pee eya Musa ina ilata naputishoreki neitisiny ilo ng'obor le Nkai o pooki toki natii atua, neitisiny ninche.

¹¹Neisuaaki ninye embata eina ilata enchumata olperere lo lasar katitin naapishana, nebukoki ilo perere lo lasar tenebo imasaa enyena pooki o lmoti oitukuoreki o entonet enye, pee eitisiny ninche.

¹²Nebukoki embata eina ilata naputishoreki endukuya e Aron neput ninye neitisiny ninye.

¹³Neyau Musa lelo ayiok le Aron, neishopoki ninche ilkilani nerreten ninche too nkeenta inkoishuaa nepik ninche ilmarisiani, anaa enaitanapa Olaitoriani Musa.

¹⁴Neitoki ayau ilo oing'oni lo lasar le ng'oki, ore Aron o layiok lenyena neiteleiki nkaik enye endukuya eilo oing'oni lo lasar le ng'oki.

¹⁵Neyieng Musa ilo oing'oni, neitayu osarge, ore to lkimojino lenye nepik enchumata oo mowuarak eilo perere lo lasar aitaman, neitisiny ilo perere lo lasar, neibukoo ilo likae sarge te ntonata o lperere lo lasar, neitisiny ninye, pee eitobiru olning'o lo sotua te nkaraki ninye.

¹⁶Neitayu ninye enkurriny pooki e nkoshoke o lkina le moinyua o lairakuj pokira oaare tenebo enkurriny enye, nepejoo Musa ninche te nchumata olperere lo lasar.

¹⁷Kake ore ilo oing'oni o lchoni lenye, o nkiri enyena o moyok enyena nepejoo ninye te nkima tiauluo ilng'oborri, anaa enaitanapa Olaitoriani Musa.

¹⁸Neitoki ninye aitarasaa ilo meregesh lo lasar opejori neiteleiki Aron o layiok lenyena nkaik enye endukuya eilo meregesh.

¹⁹Neyieng Musa ninye, neisuaaki osarge enchumata eilo perere lo lasar aitaman.

²⁰Ore ake pee edung'i ilo meregesh aarishirish, nepejoo Musa endukuya o nena rubat o enkurriny.

²¹Ore ake pee eitukui isorri e nkoshoke o loilelek te nkare, nepejoo Musa olmeregesh pooki to lperere lo lasar, anaa olasar opejori, esong'ouna narropil, olasar opejokini te nkima Olaitoriani, anaa enaitanapa Olaitoriani Musa.

²²Neitoki aitarasaa olmeregesh liare, ilo meregesh le nkiteleikinoto oo nkaik; neiteleiki Aron o layiok lenyena nkaik enye endukuya eilo meregesh.

²³Neyieng Musa ninye, neitayu embata eilo sarge lenye nepik enkitipet enkiok e Aron e tatene o lmogirra le nkaina enye e tatene o le nkeju enye e tatene.

²⁴Neyauni ilayiok le Aron, nepik Musa oloti sarge inkitipeti oo nkiyiaa enye e tatene o lmogirrani loo nkaik enye e tatene olmogirrani lenye loo nkejek e tatene; neitoki Musa aisuaaki osarge olperere lo lasar aitaman.

²⁵Neitoki aitayu enkurriny o eilata e nkidong'oe, o ina kurriny pooki e nkoshoke o lkina le moinyua o lairakuj pokira oaare o enkurriny enye o emuro e tatene.

²⁶Ore teina kikapu oo mukateni neitu eisuishieki natii dukuya Olaitoriani neitayu ninye emukate nabo neitu eisuishieki, ore emukate nabo tenebo o eilata o enkaukau nabo neitatashaki ninche ina ilata oina muro e tatene.

²⁷Nepik ninye kuna pooki nkaik e Aron o nkaik oo layiok lenyena, neyuk ninche anaa olasar oyuki te dukuya Olaitoriani.

²⁸Neitoki Musa aya ninche too nkaik enye, nepejoo ninche te nchumata olperere lo lasar tenebo nena kishorunot naapejori; anaa olasar le nkiteleikinoto oo nkaik, esong'ouna narropil, olasar opejokini Olaitoriani te nkima.

²⁹Neya Musa oloikulu neyuk ninye anaa olasar oyuki te dukuya Olaitoriani, erubata apa e Musa ena to lmeregesh lo lasar le nkiteleikinoto oo nkaik, anaa enaitanapa Olaitoriani Musa.

³⁰Neitoki Musa aya embata eina ilata naputishoreki o embata eilo sarge otii enchumata olperere lo lasar, neisuaaki Aron o o lkilani lenyena, neitoki layiok lenyena o lkilani laisuaaki aisuaaki enye neaku eitisinya ninye Aron o lkilani lenyena, o layiok lenyena o lkilani lenye pooki tenebo ninye.

³¹Nejoki Musa Aron o layiok lenyena, “Enteyier nena kiri te kutukaji o lng'obor le ntumo ninyanya teine o nena mukateni naatii atua ina kikapu oo nkishoorot enkiteleikinoto oo nkaik, anaa enaitanapishe nanu, ajo, Aron o layiok lenyena oonya nena.

³²Ore entoki naleku too nkiri o too mukateni nipejoo te nkima.

³³Nimipuopuo intae aaipang te kutukaji eilo ng'obor le ntumo too nkolong'i naapishana, o metaba anaa neishunye nkolong'i e nkiteleikinoto oo nkaik, amu nkolong'i naapishana ine nkiteleikinoto oo nkaik te ntae.

³⁴Ore anaa enataase taata, eitanapishe Olaitoriani metaasi pee eitobiri olning'o lo osotua te nkaraki intae.

³⁵Ore te kutukaji e ilo ng'obor le ntumo entobik teine dama o kewarie too nkolong'i naapishana, intabayaya nena naaitanapishe Olaitoriani, pee miyeye ake, amu nena nanu aaitanapaki.”

³⁶Neas Aron o layiok lenyena nena tokitin pooki naaitanapishe Olaitoriani aimunye Musa.