Read MAASAI REVISED PROTESTANT Ilawi 9 Bible Online

Ilawi 9 - MAASAI REVISED PROTESTANT bible

Ilawi 9

¹Ore te nkolong e isiet neipotu Musa Aron o layiok lenyena o lpayiani loo Siraeli,

²nejoki ninye Aron, “Iwa iyie oloti oing'oni intayunye olasar le ng'oki o lmeregesh ntayunye olasar opejori, ore te pokira meetae oloata entioto, nintarasaa ninche te dukuya Olaitoriani.

³Nijoki iltung'ana le Israel, ‘Ewaita olkuoo le kine, oaku olasar le ng'oki o lashe o lkuoo le ker, naa ilo lari obo pooki nemetii oloata entioto, pee eaku olasar opejori

⁴o lkiteng o lmeregesh metaa olasar le seriani, pee ipolososo intae te dukuya Olaitoriani o enkishooroto e ntapa naipurja te ilata, amu ore taata keipang'aki intae Olaitoriani.’ ”

⁵Neyau ninche nena pooki naaitanapishe Musa te dukuya olng'obor le ntumo, neigutu olturrur pooki anyiku neitashe te dukuya o Laitoriani.

⁶Nejo Musa, “Ena bae eitanapa intae Olaitoriani pee iasiasa; naa keipang'aki intae enkitoo o Laitoriani.”

⁷Neitoki Musa ajoki Aron, “Tinyikaki olperere lo lasar, nintayu olasar lino le ng'oki ino o lasar lino opejori, nintobir olning'o lo sotua te nkorrok ino o too ltung'ana, niyau enkishooroto e kulo tung'ana nintayu olning'o lo sotua te nkaraki ninche, anaa enaitanapishe Olaitoriani.”

⁸Nenyikaki Aron ilo perere lo lasar, neyieng ilo ashe lo lasar le ng'oki te nkaraki enkorrok enye.

⁹Neitarasaki ilayiok le Aron ninye osarge, neitadoiki ninye olkimojino lenye atua osarge nepik osarge nena mowuarak o lperere lo lasar, nebukoki ilo sarge entonata o lperere lo lasar,

¹⁰kake ore enkurriny o lairakuj o lkina le moinyua o ilo asar le ng'oki etapejoyie ninye te nchumata olperere lo lasar, anaa enaitanapa Olaitoriani Musa.

¹¹Ore nkiri o lchoni nepejoo ninye te nkima tiauluo ilng'oborri.

¹²Neyieng ninye ilo asar opejori; neyaki ilayiok le Aron ninye osarge, neisuaaki ninye enchumata olperere lo lasar aitaman.

¹³Neyaki ninche ninye ilo asar opejori eitaaki rubat o endukuya; nepejoo ninye ninche te nchumata olperere lo lasar.

¹⁴Neituku ninye isorri e nkoshoke o loilelek nepejoo ninche tenebo ilo asar opejori te nchumata olperere lo lasar.

¹⁵Neitoki aitarasaa inkishoorot oo ltung'ana, neya ina kine o lasar le ng'oki te nkaraki iltung'ana, neyieng ninye, neishooyo ninye te nkaraki eng'oki anaa ilo asar le dukuya le ng'oki.

¹⁶Neitarasaa ninye ilo asar opejori, neishooyo ninye te risioroto e nkitanapata.

¹⁷Neitoki aitarasaa ilo asar le ntapa, neiput inkaik enyena, nepejoo te nchumata olperere lo lasar, aitatashaki ilo asar opejori le nkakenya.

¹⁸Nepolos sii olkiteng o lmeregesh, ilo asar le seriani te nkaraki iltung'ana neyaki ilayiok le Aron ninye osarge neisuaaki enchumata olperere lo lasar aitaman.

¹⁹Ore enkurriny eilo kiteng o eno lmeregesh o eilata e nkidong'oe leilo meregesh, o ina kurriny naimulumul isorri e nkoshoke o lairakuj o lkina le moinyua,

²⁰neiteleiki ninche ina kurriny enchumata oo loikuluaa, nepejoo ninye ina kurriny te nchumata olperere lo lasar,

²¹kake ore lelo oikuluaa o emuro e tatene, eyuko Aron anaa olasar oyuki te dukuya Olaitoriani anaa enaitanapishe Musa.

²²Neilepie Aron inkaik enyena aipirie iltung'ana nemayian ninche, nelotu ninye adou teine neishoorieki ilo asar opejori le ng'oki o lasar le seriani.

²³Nepuo Musa o Aron atua ilo ng'obor le ntumo, ore ake pee eipang'u ninche aapuonu boo nemayian ninche iltung'ana, neliooyu enkitoo o Laitoriani too ltung'ana pooki.

²⁴Nelotu enkima naing'uaa dukuya Olaitoriani nemut ilo asar opejori o ina kurriny natii shumata olperere lo lasar, ore ake pee edol iltung'ana pooki ina, nebuaku ninche nebatata too nkomomi enye.