Read MAASAI REVISED PROTESTANT Yeremia 1 Bible Online

Yeremia 1 - MAASAI REVISED PROTESTANT bible

Yeremia 1

¹Irorei kulo le Yeremia, olayioni le Hilkia, loo lapolosak apa ootii Anatot tiatua enkop e Benchamen,

²laa ninye eirorie Olaitoriani too nkolong'i e Yosia olayioni le Amon, olaiguanani le Yuda, to lari le tomon ookuni le nkitoria enye.

³Eirorie sii too nkolong'i e Yehoiakim olayioni le Yosia, olaiguanani le Yuda, ometabaiki enkiting'oto o lari le tomon oobo le Sedekia, olayioni le Yosia olaiguanani le Yuda, ometabaiki ina kata apa nawaki iltung'ana le Yerusalem eyararoroto to lapa le miet.

⁴Aairorie apa Olaitoriani naajoki,

⁵“Ore apa eton eitu aaitobiru iyie te nguset e yieyioo lino aatayiolo nanu iyie naa ore apa eton eitu kiini naaiteng'ela nanu iyie; aategelua nanu iyie aitaa oloiboni le Nkai too loreren.”

⁶Najo nanu, “Ee Olaitoriani Enkai! Mayiolo nanu airoro amu kara ake olbarnoti.”

⁷Kake aatiaka nanu Olaitoriani, “Mijo iyie, ‘Kara ake olbarnoti’; amu ore lelo pooki laairriwaki iyie naa ilo. Ore pooki naba anaa enaaitanap iyie naa ilo airo.

⁸Miureyu iyie ninche, amu atii nanu tenebo iyie pee aakordu iyie, Olaitoriani ojo.”

⁹Neitorioo Olaitoriani enkaina enye neiseyie enkutuk ai; naajoki nanu Olaitoriani, “Atipika nanu irorei laainei atua enkutuk ino.

¹⁰Ngura ajo, aatipika nanu iyie ena olong shumata iloreren o shumata nkitoriat, pee idotu nisulaa, pee iinyal nisulie, pee ishet niun.”

¹¹Nelotu ororei lo Laitoriani enatii ejo, “Yeremia, kainyoo idolita?” Najoki nanu, “Adolita olng'osila lo lchani laaijo oseki.”

¹²Naaitoki Olaitoriani ajoki, “Itoduaa iyie aitobiraki, amu arripito nanu ororei lai pee aitabaya ninye.”

¹³Nelotu ororei lo Laitoriani, enatii nanu te nkata e are ejo, “Kainyoo idolita?” Najoki nanu, “Adolita emoti naitokitok, eing'orita enkalo e moikuape.”

¹⁴Najoki nanu Olaitoriani, “Moikuape eipang'unye entorroni alotu shumata lelo pooki oomanya enkop.

¹⁵Amu, ng'ura kaipotu nanu iloshon pooki loo nkitoriat e moikuape, ejo Olaitoriani, naa kepuonu ninche ore ake pooki te ninche nepik olorika lenye le nkitoo tenejing'ieki nchomito e Yerusalem, aaigaraki isunta enyena pooki naamanita neman sii nkanas pooki e Yuda.

¹⁶Naa kairo nanu endung'okinoto ai enkiguana tialo ninche, teina torroni enye pooki aatung'uaitie nanu; etapejokito ninche enkorropil kulie aitin, neserem esiaai oo nkaik enye maate.

¹⁷Kake ore iyie, terretena empolos ino; tudumunye tiaaki ninche entoki pooki naba anaa enaaitanap iyie. Mincho kinture ninche maaiture ake nanu iyie te dukuya ninche.

¹⁸Ore nanu, ng'ura, kaaitaa nanu iyie ena olong enkanasa nasheta sunta, eng'ape e sekenkei, o sunta o suyai, pee igilunore enkop pooki, o ilaiguanak le Yuda, o ilkituaak lenyena, o lapolosak lenyena o lelo tung'ana leina kop.

¹⁹Eikiarare ninche iyie; kake mikimir ninche iyie, amu atii nanu tenebo iyie, ejo Olaitoriani, peyie aakordu iyie.”