Read MAASAI REVISED PROTESTANT Yeremia 10 Bible Online

Yeremia 10 - MAASAI REVISED PROTESTANT bible

Yeremia 10

¹Entoning ilo rorei oirorie intae Olaitoriani, intae naaji e Israel.

²Nji ejo Olaitoriani: “Emisuj nkoitoi oo loreren niming'asiasia ake too nkitoduaat loing'ang'e amu eing'asiate loreren te ninche,

³amu ore ilkuaaki le kulo tung'ana naa eitorrok. Kedung'i olchani te ntim, neguetu oltung'ani arriyia enkitanyaanyukoto e nkai te ntolu too nkaik.

⁴Neikod iltung'ana te nkosholai o te saabu; neitirrishi ninye te nyuntu o too lmushumaani, pee mepuku ashurtunye.

⁵Ore nkitanyaanyukot enye oo nkaitin neikununo anaa nkitanyaanyukot oo ltung'ana naaitasheyieki metorripo nkurman, nemeidim aairoro; kenapi ninche, amu meidim aashom. Miureyu iyie ninche, amu meidim aataas entorrono, nemeidim ninche aataas hoo nabo sidai.”

⁶Metii likae likinyaanyukie iyie Olaitoriani; ira iyie kitok, naa kitok enkarna ino te magilanisho.

⁷Kaing'ae limikiureyu iyie, Iyie Olaiguanani loo loreren? Amu erishata ino ena; amu ore tiatua lelo pooki ng'eni loo loreren otiatua nkitoriat enye pooki meetae likae likinyaanyukie.

⁸Ilkilo pooki nemoda; ore enkiteng'enare enye oo nkitanyaanyukot naa nkeek ake!

⁹Eyauaki enkosholai naidong'o aaitung'uaa Tarshishi, neyauni saabu aaitung'uaa Ufas. Esiaai oltung'ani arriyia ninche o enoo nkaik olaitobirani le saabu; ore nkilani enye naa pilei o sinteti; esiaai oo ltung'ana arriyiak pooki.

¹⁰Kake ore Olaitoriani naa Enkai nasipa; ninye Enkai naishu olaiguanani loo ntarasi naa te ngoro enye eikirikira enkop, nemeidimu iloshon engoro enye.

¹¹Nji iyie tiaaki ninche, “Ore nena aitin neitu eitayu shumata o enkop naa keidak te nkop o tiabori enkop.”

¹²Olaitoriani ninye oitobira enkop te ngolon enye, ninye oitasheyie enkop pooki te ng'eno enye nagut, naa te yiolounoto enye eitorioyie shumata.

¹³Teneitayu ninye oltoilo lenye netii enkikurrukur oo nkariak shumata neisho ninye enkinuku metunukunye too neeiting'ie e nkop. Neitayu ninye nkiwuang'at e nchan, neyau ninye osiwuo aitung'uaa nkajijik enyena naashumishoreki.

¹⁴Kekilo pooki tung'ani nemeeta eng'eno, eitukurruaki pooki aitobirani le saabu too nkitanyaanyukot enyena oo nkaitin; amu ore nkitanyaanyukot enyena naa ine lejare, nemetii enkiyang'et atua ninche.

¹⁵Ine pesho ninche, esiaai e lejare, ore te nkata enkitamioto enye naa keidaaya ninche.

¹⁶Metiu Enkai e Yakobo anaa ena kitanyaanyukoto amu ninye oitamanyua intokitin pooki, ore Israel naa olosho le njung'ore enye; Olaitoriani loo lororani ninye enkarna enye.

¹⁷Eturrurro ilolan linyi empung'o te nkop, intae lelo otamanaki!

¹⁸Amu nji ejo Olaitoriani: “Ng'ura kanang'aa nanu boo lelo oomanya ena kop tena kata, nayau nanu osina shumata ninche, pee etum ninche aatayiolo.”

¹⁹Oi nanu te nkaraki enkitamioto ai! Ore olbae lai naa olo sina, kake ore nanu atejo, “Esipa olosilisili ele lemeeta nchere pee mangiriakino nanu.”

²⁰Eidaikieki olng'obor lai, ore nkeenta aainei pooki netudung'ote; naashomo aaing'uaa nkera aainei metii ninche; metii hoo obo oigil akas olng'obor lai, nepik ilkarash laainei.

²¹Amu kemoda ilchekuti loo ntare nemeikilikuanishore Olaitoriani; neaku eitu edupo ninche, ore luaat enye pooki neidapashate.

²²Inining'o, olmarenke! Ng'ura elotu! Embuakunoto sapuk naipang'u te nkop e moikuape, pee eitaa nkanas e Yuda ilmuateni, emanyisho oo mbariak.

²³Kayiolo nanu Olaitoriani, nchere ore oltung'ani nemeata engolon e nkishui enye, nchere meetae oltung'ani ooidim aitoria enkishui enye.

²⁴Ntorioyioki nanu, Olaitoriani kake te sipata; neme te ngoro ino, pee mikintaa ake nanu olemetii.

²⁵Tubukoki engoro ino napi shumata lelo oreren limikiyiolo ninche, o shumata lelo tung'ana lemeipot enkarna ino; amu etara ninche Yakobo; nemut ninye, neitomijoono ninche emanyisho enye.