Read MAASAI REVISED PROTESTANT Yeremia 12 Bible Online

Yeremia 12 - MAASAI REVISED PROTESTANT bible

Yeremia 12

¹Ira iyie asipani, Olaitoriani, tenaaishankarrare nanu iyie; ore eyia kaitirrish nanu ororei lai te dukuya iyie. Kainyoo pee edupoyu enkoitoi oo larruok? Kainyoo pee edupoyu iltung'ana le nkeleekisho?

²Iun iyie ninche, neibung ninche ntona; nebulu ninche neiu ilng'anayio; nitaana iyie too nkutukie enye nilakua too ltauja lenye.

³Kake ore iyie, Olaitoriani, kiyiolo nanu, kidolita iyie nanu, nitem endamunoto ai tialo iyie. Teyietai ninche mpang'ie anaa nkerra naapuoi aayieng, nirragie ninche aiteng'el aitaany ina olong e yiang'are.

⁴Keishir kenya enkop o anu? Netoyu nkujit e pooki ong'ata. Te nkaraki entorroni e lelo oomanya atua ore ng'uesi o motonyi nejutori aaishie te nkaraki natejo iltung'ana, “Medol ninye ae kiting'oto ang.”

⁵“Amaa tenikueta akeshare iltungana too nkejek, nikintanaura ninche kaji naa inko tenikeshare mbartan? Naa amaa tenibatata te nkop naserian kaji naa inko tiatua osero lo lkeju le Yordan?

⁶Amu ore ninye ilalashera linono o enkaji e papaai lino, eji kitakaldaitie sii ninche, miruk ninche, hoo neiro irorei supati te iyie.”

⁷Aiturrayie nanu enkaji ai, naiturrayie enjung'ore ai aishooyie nanu ina nanyor to ltau lai, apik atua nkaik oo lmang'ati lenyena.

⁸Etotiwuo enjung'ore ai te nanu anaa olng'atuny tiatua entim, eilepunye ninye oltoilo lenye aarare nanu; neaku kaiba nanu ninye.

⁹Ketotiwuo enjung'ore ai anaa emotonyi narreshitoi, kemanita ninye motonyi naareshito too nkaloli pooki? Shomo inturrurro ing'uesi pooki e ntim iyau ninche meetu aapolol aanya.

¹⁰Einyala ilairritak kumok loo ntare enkurma ai oo sabibu eitunyokito ninche enkop erubata ai, eitaa ninche ewueji ai sidai e ong'ata mitil.

¹¹Eitaa ninche ninye mitil; naaishiraki nanu ina nataa mitil eitaaki enkop pooki mitil kake meetae oltung'ani oshilaa.

¹²Ore nena kisiashat pooki naaika to lpurkel neetuo lelo ooidaikie; amu kenya olalem lo Laitoriani enchoto nabo e nkop o metabaiki enkae; meetae o loata eseriani.

¹³Etuuno ninche enkano neikesu ilkiku, eitanaurita ninche ate kake eitu edupore toki. Keitukurruni ninche te nkikesare enye te nkaraki engoro O Laitoriani napi.

¹⁴Nji ejo Olaitoriani tialo, kulo le latia ai pooki torrok ooinyal ina jung'ore naishoo nanu iltung'ana laainei Israel metujung'o: “Ng'ura, kadotu nanu ninche aitung'uaa enkop enye, naa kadotu enkaji e Yuda aitung'uaa ninche.

¹⁵Ore peyie aaidip nanu ataarai ninche, naitoki nanu aing'urrie ninche, naayau pooki ng'ae ewueji e enjung'ore enye o pooki ng'ae enkop enye.

¹⁶Naa kelotu aaku teneibung ninche aakurraki nkoitoi oo ltung'ana laainei, pee enya olmumai te nkarna ai, ‘Anaa enaishu Olaitoriani,’ anaa sii apa enaiteng'ena ninche iltung'ana laainei meinosa olmumai te Baal, naa keshetuni ninche tiatua iltung'ana laainei.

¹⁷Kake tenetii olosho lemening'isho, naa kadotu nanu tukul naidaikie ninye, Olaitoriani ojo.”