Read MAASAI REVISED PROTESTANT Yeremia 13 Bible Online

Yeremia 13 - MAASAI REVISED PROTESTANT bible

Yeremia 13

¹Nji aatiaaka nanu Olaitoriani, “Shomo inyang'u enkarasha e kitani, nipik empolos ino nimintadoiki ake atua enkare.”

²Nainyang'u enkarasha empolos te risioroto o rorei lo Laitoriani naen te mpolos ai.

³Neitoki ororei lo Laitoriani alotu enatii nanu te nkata e are ejo,

⁴“Iwa ina arasha e mpolos ninyang'ua naena te mpolos ino, nidumunye alo olkeju le Frati, nisudoo ina arasha teine to lbaata le ndapidapoi.”

⁵Nalo nanu, naisudoo te Frati, anaa enaaitanapa nanu Olaitoriani.

⁶Ore etulusoitie inkolong'i kumok naajoki nanu Olaitoriani, “Tudumunye, shomo Frati, ntayu teine enkarasha empolos apa naaitanapa iyie isudoi teine.”

⁷Nalo nanu Frati, naturu, naitayu ina arasha teine wueji apa naisudorie ninye. Naa ng'ura, etarruoyie apa ina arasha e mpolos; meekure apa eeta tipat.

⁸Neitoki ororei lo Laitoriani alotu enatii ejo:

⁹“Nji ejo Olaitoriani: Neijia aiko ainyal olwuasa le Yuda o ilo wuasa kitok le Yerusalem.

¹⁰Ore kulo tung'ana torrok, oany ening irorei laainei, oosuj te ngolon enkong'u iltauja lenye maate neshomo aasujaa kulie aitin pee eisiaai ninche neserem ninche ketiu anaa ena arasha empolos naidaaie, nemeeta tipat.

¹¹Amu ore anaa enaenikino enkarasha empolos oltung'ani, neijia aikuna enkaji pooki e Israel o enkaji pooki e Yuda maateenikinoto ninche nanu, Olaitoriani ojo, pee etum ninche aataa te nanu iltung'ana o enkarna o enkisisa o enkitoo te nanu, kake mening'isho ninche.

¹²“Irorie iyie ninche ele rorei, tiaaki, ‘Nji ejo Olaitoriani Enkai e Israel: Keiputi pooki siang'au e naisho oo lsabibu.’ Naa eikijoki ninche iyie, ‘Eimikiyiolo iyiook aaitisip aajo keiputi pooki siang'au e naisho oo lsabibu?’

¹³Nitum iyie atiaaki ninche, ‘Nji ejo Olaitoriani: Kaiput nanu emerai lelo pooki oomanya ena kop: lelo aiguanak ootonie olorika le Daudi le nkitoo o lapolosak o loibonok o lelo pooki oomanya Yerusalem.

¹⁴Naitaar nanu ninche oltung'ani ake o likae, iloo menye o layiok lenye tenebo, Olaitoriani ojo. Maing'urrie nanu aashu aleku, aashu aitananaki oshoke pee mainyal nanu ninche.’ ”

¹⁵Entoning ninchoruru enkiok; emiwuasa, amu eiroro Olaitoriani.

¹⁶Enchoo enkitoo Olaitoriani Enkai inyi, eton eitu eyau ninye enaimin eton eitu errorro nkejek inyi te nchumata ildoinyo ooitomisimisoki, ore ing'oru iyie ewang'an neibelekeny ninye aitaa emisimisi neitaa ninye enaimin nagut.

¹⁷Kake tenimining iyie, neishir oltau lai te nkisudoroto te nkaraki olwuasa lino; neishir nkonyek aainei te mion nerukunye ilkiyio, te nkaraki nataraiyioki eluaata Olaitoriani.

¹⁸Tiaaki Olaiguanani o ng'otonye “Entadou ate too lorikan linyi le nkitoo, amu etadowuo enkopiyia ino e nkitoo sidai aing'uaa endukuya ino.”

¹⁹Eikenoki nkanas e Negeb, nemeetae olobol ninche. Ewaki Yuda pooki eyararoto, etarayioki tukul.

²⁰Tushumu nkonyek inono toduaa lelo oopuonu ooing'uaa moikuape. Koree ina luaata apa nikinchooki iyie, ina luaata ino sidai?

²¹Kaa iyie ijo tenepik ninche ate shumata iyie lelo apa laa iyie makewan oiteng'ena? Pee eaku ilchoreta te yie? Eimikimbung iyie emion, anaa emion enkitok nasaisai?

²²Naa tenijo iyie to ltau lino, kainyoo pee eetuo kuna baa shumata nanu? Te nkaraki esapuko e ntorroni ino pee eng'ishari ilkilani linono, nikisomiti iyie.

²³Keidim oltung'ani aibelekenya olchoni lo sesen lenye aashu olowuaru keri aibelekenya iltipot lenyena? Tenaa keidim, ore naa ntae laa ntorrok ake eas naa indimidimi aatayiolo aataas isidan.

²⁴Kaaidapash nanu iyie anaa suut, naayaita olkutati oing'uaa olpurkel.

²⁵Erubata ino ena, erubata naategelaka nanu iyie, Olaitoriani ojo, amu meekure kidamu iyie nanu nisiliga elejare.

²⁶Kangishaa nanu makewan olokesena lino apik shumata enkomom ino, naa kedoli enkurruna ino.

²⁷Atoduaa nanu olminong lino, o eloloito ino o enkisiishore[2] ino o lduruk le loloito ino too nchumat oo ldoinyo o too nkong'at. Oi iyie, Yerusalem! Ibik kenya o anu, eton eitu kintaai sinyati.