Read MAASAI REVISED PROTESTANT Yeremia 15 Bible Online

Yeremia 15 - MAASAI REVISED PROTESTANT bible

Yeremia 15

¹Naaitoki Olaitoriani ajoki nanu, “Ore naaji ninye teneitashe Musa o Samuel te dukuya nanu, meibelekenya oltau lai aing'or kulo tung'ana. Taarai ninche meshomo too nkonyek aainei, naa nchoo ninche meshomo!

²Ore ake pee kinkilikuan ninche iyie, aajoki, ‘Kaji iyiook kipuo?’ Nijoki iyie ninche, ‘Nji ejo Olaitoriani:’ “Ore lelo lo lmeitai nepuo olmeitai, ore lelo laa ilo lalem nepuo enetii olalem ore lelo; laa ilo lameyu, nepuo enetii olameyu, ore lelo laa ile yararoto nepuo eyararoto.

³“Kagelaki nanu shumata ninche mpukunot ong'uan oo looidaikie, Olaitoriani ojo: olalem oar, ildien oopolos, olmotonyi lo loing'ang'e o ng'uesi enkop pee emut ninche aaidaikie.

⁴Naa kaitaa nanu ninche entoki naitureisho too nkitoriat pooki enkop te nkaraki ina nataasa Manase olayioni le Hesekia, olaiguanani le Yuda tiatua Yerusalem.

⁵“Kaing'ae liking'urrie iyie oo Yerusalem, aashu kaing'ae likinchiraki iyie? Kaing'ae oibelekenya aikilikuanu olmabarishoi lino?

⁶Kitanya iyie nanu, Olaitoriani ojo, iton arrinyo siadi; neaku aaitorioki nanu enkaina ai pee aagilunore naaidaikie iyie, anaure nanu te nkibooroto engoro ai.

⁷Atisila nanu ninche te silet nasilishoreki, too nkang'itie pooki eina kop; aishirie nanu ninche, aidaikie nanu iltung'ana kumok; neitu ninche eibelekenya aaing'uaa nkoitoi enye.

⁸Aitaa nanu esiana oo nkolia enye kumok alang osinyai loo naaiposha; ayaka nanu noo ng'otonye ilmurran ooti olainyalani te nkipirata e nkolong; aishoo nanu emion o lkirutoto metadoiki ninche aluam.

⁹Ore ina natoiwuo nkera naapishana neiterre; etadoyie enkolong enye eton aa dama; eitukurruaki netusulaki. Ore inkera naatelekutua, naisho metaari to lalem te dukuya ilmang'ati lenye, Olaitoriani ojo.”

¹⁰Woi nanu, yieyio lai, amu kitoiwuo nanu, oltung'ani o ekenya okeshare enkop pooki, neitu aisilenisho, kake aadekita ninche pooki.

¹¹Metaa nchoo etiu neijia, Olaitoriani, teneitu nanu aaisiaai aitobiraki teneitu nanu aasai iyie terishata oo lmang'ati laainei etii ninche atua enyamali o sina.

¹²Ketii obo oidim atigila esekenkei naing'uaa moikuape o suyai?

¹³“Ore karsisisho ino o lchumati lino naa kaisho metarrari, metii enkinyang'a, te nkaraki ing'ok inono pooki, tiatua enkop ino pooki.

¹⁴Kaaisho nanu iyie isiaayia ilmang'ati linono tiatua enkop nimiyiolo, amu ore te ngoro ai neinuaaki enkima nayupuyup ntarasi.”

¹⁵Olaitoriani iyiolo iyie; tadamuaki nanu nikibaiki nanu, nintalaku elap tialo nanu too laisilisilok laainei. Ore te ng'iriata ino mikiya nanu; tayiolo ajo te nkaraki iyie pee anap imorot.

¹⁶Anoto irorei linono, naibirribirra nanu ninche, neaku irorei linono te nanu eng'ida o enchipai o ltau lai; amu te nkarna ino aaipotoki nanu, Olaitoriani Enkai oo lororani.

¹⁷Eitu nanu aton to lturrur loo looshipa, ang'ida; atotona nanu openy, amu etii apa enkaina ino shumata nanu, amu kimputa nanu engoro.

¹⁸Kainyoo pee meish emion ai. Nemeishiunoyu olbae lai, ketanya eishiunyeki? Itiu iyie te nanu anaa ereyiet nalejisho (nadudung'o nkariak), anaa nkariak naaishunye?

¹⁹Neaku inji ejo Olaitoriani: “Tenishukunye, naang'amu nanu, naa intashe iyie te dukuya nanu. Teniro iyie ina sidai, neme ina nara pesho, nitiu iyie anaa enkutuk ai.

²⁰Naa kaaitaa nanu iyie te kulo tung'ana esuntai nasheta osuyai; aikiarare ninche iyie, kake mikimir ninche iyie, Olaitoriani ojo.

²¹Kaakordu nanu iyie aitung'uaa enkaina eilo torrono, naalaku iyie aitung'uaa enkibung'ata eilo lemeeta olng'ur.”