Read MAASAI REVISED PROTESTANT Yeremia 2 Bible Online

Yeremia 2 - MAASAI REVISED PROTESTANT bible

Yeremia 2

¹Aairorie Olaitoriani naajoki,

²“Shomo inosai metoning'i te Yerusalem ena natejo Olaitoriani, adamu nanu eseremata e kitisho ino, enyorrata ino anaa esiankiki narikori, ina kata kisujita nanu tiong'ota, tiatua ina kop neitu eunishoreki.

³Eisinyati apa Israel to Laitoriani, ninche ilng'anayio le dukuya le nkikesare enye. Ore pooki ooitarruoitie ninye netum entorroni; eewuo entorroni shumata ninche, Olaitoriani ojo.”

⁴Toning'o ororei lo Laitoriani iyie enkaji e Yakobo, olmareita pooki le nkaji e Israel.

⁵Inji ejo Olaitoriani: “Kaa torroni enotito loo papaai linyi te nanu pee aashomo aalam nanu, nepuo aasujaa empesho, neaku pesho?

⁶Eitu ninche ejo, ‘Koree Olaitoriani laa ninye oilepunye iyiook aitung'uaa enkop e Misiri. Laa ninye otorikoyie iyiook tiong'ota, tiatua enkop olpurkel o ngumot, tiatua ina kop olameyu o enaimin nagut, tiatua enkop nemedung hoo ng'ae, nemetii hoo oltung'ani omanya.’

⁷Nayau nanu intae atua enkop sidai, pee ishipakinono ilng'anayio lenyena o ntokitin enyena sidain. Kake ore pee ipuonunu atua ninturujuju enkop ai, nintaa enjung'ore ai olminong.

⁸Eitu ejo ilapolosak, ‘Koree Olaitoriani?’ Ore kuldo loo nkitanapat neitu aayiolou nanu; aatogolong'akitia nanu ilaitoriak; ore ilo oibonisho neibonisho te Baal, nepuo aasujaa nena tokitin nemeretisho.

⁹“Metaa eton aatakinore iyie, Olaitoriani ojo, ore nkera oo nkera inono naatakinore.

¹⁰Tudung'o shomo olomanaa le Kupro toduaa, aashu irriwaa olkilikuai Kedar metujurru asipu; toduaa tenaa kenotoki aekata entoki naikununo nji.

¹¹Keibelekenya olosho nkaitin enyena, hoo duoo ninye neme nkaitin? Kake eibelekenya iltung'ana laainei enkitoo enye, teina nemeretisho.

¹²Mputukunyo iyie shumata, tena iruto, ingasiayu tukul, Olaitoriani ojo.

¹³Amu etaasa iltung'ana laainei ntorrok are: aatung'uaitie nanu, ina ong'u oo nkariak naaishu, neguetaki ate ilmotioo, ilmotioo oodanya lemeidim aatushum enkare.

¹⁴“Ko rrindik Israel? Kosinka oino liang? Kainyoo naa pee etaa ninye olorreshitoi?

¹⁵Eipurrokito ilng'atunyo ninye, eipurrokito aabuaku. Neitaa ninche enkop enye mitil; neidaaitie nkanas enyena, metii iloomanya.

¹⁶Ore sii etadanya iltung'ana le Memfis o Tafnhel olmarisian le nkitoo le ndukuya ino.

¹⁷Aime kewan iyie iyaka ena te nking'uaroto o Laitoriani Enkai ino, ina kata pee kirikoo ninye te nkoitoi?

¹⁸Amaa taata kainyoo dupoto nitum tenilo Misiri, aok nkariak o lkeju le Nail? Aashu kainyoo dupoto nitum tenilo Asiria, aok nkariak e o lkeju le Frati?

¹⁹Entorroni ino nikintame iyie, naa ina kibelekenyata nimbelekenye niking'uanare iyie. Tayiolo nidol nchere entorroni naa kedua te iyie tening'uaa Olatoriani Enkai ino; metii euriata ai atua iyie, Olaitoriani Enkai oo lororani ojo.

²⁰“Itigila apa iyie Israel enchata ino e murt nilak ienat inono, nijo iyie ‘Maisiaaisho nanu.’ Ee, te nchumata oldoinyo oodo oleng o tiabori pooki shani onyori oleng irrugokine iyie nkaitin anaa emulayoi.

²¹Ore eyia naatuuno nanu anaa osabibu gelunoti, entipat nadupa tukul kaji naa iyie nkuna pee mbelekenye niaku osabibu liong'ata?

²²Ore hoo nintukito kewan te munyan niaasishore osabuni sapuk, ore ilduruki le ntorroni ino neton etii dukuya nanu, Olaitoriani Enkai ojo.

²³Kaji iyie inko pee ijo ‘Eitu aaisarkionieki nanu, eitu nanu alo asujaa noo Baal?’ Ng'ura enkoitoi ino to eyarata; tayiolo ina nitaasa itiu iyie anaa entames lipong, naipirri nkaloli pooki,

²⁴esikiria e ong'ata natamoo olpurkel, ore pee eyieu oloing'oni neisugaa osiwuo! Kaing'ae oidim aibooi eng'uarrata enye? Meetae ilooyieu ninye o inaur ate, ore too lapaitin lenyena neinepu ninye.

²⁵Torripo nkejek inono milo ake miata namuka, olgos lino pee mikitir enkure. Kake itejo iyie, ‘Meetae osiligi, amu atonyorra nanu ilomon, naa ninche nanu asujaa.’

²⁶“Ore anaa enakurru olapurroni teneibung'i, neijia etiu sii enkaji e Israel keitukurruni: ninche, o laiguanak lenye, o lkituaak lenye o lapolosak lenye, o loibonok lenye.

²⁷Ninche ootiaakita olchani, Ira iyie papa lang, nejoki osoit, Itoiwuo iyie iyiook. Amu aaibelekenyakita ninche enkoriong enye, neitu aaibelekenyaki enkomom. Kake ore tenkata enyamali enye nejo ninche, ‘Tudumunye ntajeu iyiook!’

²⁸Kake koree nkaitin inono nena nintaikia kewan? Nchoo ninche edumunye, tenaa eikindim ninche aaitajeu iyie, tenkata ino enyamali; amu ore eneba nkang'itie inono neijia eba nkaitin inono, iyie Yuda.

²⁹“Kainyoo pee kilepilepaka iyie nanu? Kitogolong'akitia intae pooki, Olaitoriani ojo.

³⁰Pesho nanu ataara nkera inono, eitu ninche eitoriori, olalem lino kewan oinosa iloibonok linono anaa olng'atuny otupusha.

³¹Naa ore iyie, naishoi ena, toning'o ororei lo Laitoriani. Kataa nanu olpurkel te Israel, aashu enkop e misimisi kitok? Kainyoo naa pee ejo iltung'ana laainei, ‘Kilakuno iyiook, meekure iyiook kingil aapounu enitii?’

³²Kerikino entito imasaa enyena, aashu esiankiki narikori ilkilani lenyena? Kake maadamu nanu iltung'ana laainei too nkolong'i nemeikenayu.

³³Iyiolo oleng aitobira nkoitoi inono aing'oru enyorrata! Neaku ore ninye nkituaak arruok ninteng'en inkoitoi inono.

³⁴Ore olkila lino netii osarge le nkishui e lelo aisinak lemeeta entioto; eitu iyie inepu ninche egilita nkajijik, kake ore etii kuna tokitin pooki

³⁵nijo iyie, ‘Maata nanu entioto; kesipa eibelekenye engoro enye te nanu.’ Ng'ura, kaayau nanu iyie enkiguana teina nitejo, ‘Eitu nanu aas eng'oki.’

³⁶Kebaa eleleki nilotie iyie, mbelekeny enkoitoi ino! Eikipik iyie Misiri enkurruna anaa apa enikitipika Asiria enkurruna.

³⁷Ninye iyie ilotu aing'uaa etii nkaik inono shumata endukuya ino, amu etanya Olaitoriani lelo laa ninche iyie isilig, nimidupoyu iyie te ninche.