Read MAASAI REVISED PROTESTANT Yeremia 21 Bible Online

Yeremia 21 - MAASAI REVISED PROTESTANT bible

Yeremia 21

¹Ele rorei oewuo enetii Yeremia eing'uaa Olaitoriani, ina kata apa pee eirriwaki ninye olaiguanani Sedekia Pashur olayioni le Malkia o Sefania olapolosani, Maasia, ejo,

²“Inkilikuanishore Olaitoriani tialo iyiook, amu eitobirita Nebukadnesa olaiguanani le Babilon olarrabal pee earare iyiook; keidim Olaitoriani aitaasa iyiook te risioroto oo nkiaasin enyena e nking'asia, neisho ninye metorrinyoyu aing'uaa iyiook.”

³Neitoki Yeremia ajoki ninche:

⁴“Nji intae entiaaki Sedekia, ‘Nji ejo Olaitoriani, Enkai e Israel: Ng'ura, Kashuku nanu nena masaa o larrabal naatii atua nkaik inyi naa te ninche iararere olaiguanani le Babilon niaararere Ilkaldayo oomanita intae tioriong isunta; naa kayau nanu ninche tenebo atua empolos ena anasa.

⁵Nanu enkorrok ai oarare intae te nkaina naitoriori o enkaina nagol, te ngoro, o te mpushuna, o te ngoro kitok.

⁶Naa kaosh nanu lelo oomanya ena anasa, oltung'ani o eng'ues, keye ninche to lmeitai kitok nepi.

⁷Ore te siadi, Olaitoriani ojo, naisho nanu Sedekia olaiguanani le Yuda, o sinkan lenyena, o ltung'ana ootii ena anasa, ooleku olmeitai o olalem o lameyu, naisho nanu metaarai enkaina e Nebukadnesa olaiguanani le Babilon o te nkaina oo lmang'ati lenye, atua enkaina e lelo ooing'oru enkishui enye. Keosh ninye ninche te nepi o lalem, meing'urrie ninye ninche, aashu epal ninche, aashu eeta olng'ur.’

⁸“Ore tialo kulo tung'ana tiaaki iyie: ‘Nji ejo Olaitoriani: Kapik nanu dukuya iyie enkoitoi e nkishui o enkoitoi nalo keeya.

⁹Ore ilo oton tiatua ena anasa neye to lalem o to lameyu o to lmeitai; kake ore ilo oipang alo neisho kewan lelo kaldayo oo manita intae nepok netiu enkishui enye anaa enkishooroto olarrabal.

¹⁰Amu eitu ataarare nanu ena anasa te ntorroni neme te sidai, Olaitoriani ojo; keishoori ninye aapik atua enkaina o laiguanani le Babilon, naa kepejoo ninye te nkima.’

¹¹“Ore tialo enkaji o laiguanani le Yuda tejo, ‘Entoning ororei lo Laitoriani,

¹²na aji e Daudi! Nji ejo Olaitoriani: Tudung'o enkiguana te sipata tadekenya, niyau aitung'uaa enkaina e ilo oitorogonyisho lelo pooki ooitorongonyaki mepuku ake engoro ai anaa enkima, neyupuyup nemeetae oltung'ani oidim atara, te nkaraki nkiaasin inyi torrok.

¹³Ng'ura, kaarare nanu intae, iloomanya oyarata, iyie nadapidapoi enkisiashata, Olaitoriani ojo; intae oojo, Kaing'ae oidim atadou ataarare iyiook, aashu kaing'ae oidim atijing'a emanyisho ang?’

¹⁴Kaitame nanu intae te risioroto oo lng'anayio loo nkiaasin inyi, Olaitoriani ojo kainok nanu enkima tiatua entim enye, naa kemut ninye ina pooki namanita ninye.”