Read MAASAI REVISED PROTESTANT Yeremia 22 Bible Online

Yeremia 22 - MAASAI REVISED PROTESTANT bible

Yeremia 22

¹Nji ejo Olaitoriani: “Tadoi shomo enkaji o laiguanani le Yuda, niro teine ele rorei,

²nijo, Toning'o ororei lo Laitoriani lo aiguanani le Yuda, ilo otonita to lorika le nkitoo le Daudi; iyie o sinkan linono, o ltung'ana linono ooimu kuna shomito.

³Nji ejo Olaitoriani: Taasa esipata o esupatisho, intayu te nkaina e ilo oitorogonyisho ilo oitorogonyaki. Niminyalinyala aashu iariara olomoni o lokishi o enkoliai, aashu imbukoo osarge lemeta entioto tene wueji.

⁴Amu esipa tinimbung ele rorei, nejing'u nchomito ena aji ilaiguanak ootonie olorika le nkitoo le Daudi, ekedito ngarrin oo mbartan o mbartan, ninche o sinkan lenye o ltung'ana lenye.

⁵Kake tinimining kulo rorei, ainosa olmumai te kewan ai, Olaitoriani ojo, nchere ore ena aji naa keaku mijooni.

⁶“Amu nji ejo Olaitoriani tialo enkaji o laiguanani le Yuda: Ira iyie sidai anaa Gilead te nanu, itiu iyie anaa endukuya o ldoinyo le Lebanon kake esipa kaaitaa nanu iyie olpurkel o enkanasa neme manya.

⁷Kairriu nanu ilainyalak likiarare iyie, oltung'ani ake o masaa enyena o larrabal naa kedung ninche iltarakua linono gelunot nenang'aki ninche atua enkima.

⁸“Naa kegiroo iloreren kumok ena anasa, nejoki ake pooki ng'ae olelatia enye, Kainyoo pee etaasa Olaitoriani ena tena anasa kitok?”

⁹Naa kewaliki ninche aajo, “Te nkaraki natung'uaitie ninche osotua lo Laitoriani Enkai enye, neserem kulie aitin neisiaai ninche.”

¹⁰Minchirakiki ninye ilo otua aashu isinanuo te nkaraki ninye kake nchirakiki te mion ilo olo, amu meitoki ninye ashukunye adol enkop enye.

¹¹Amu nji ejo Olaitoriani tialo Shalom olayioni le Yosia, olaiguanani le Yuda, laa ninye oitoreisho te rishata e Yosia papaai lenye. Naa ninye oshomo aing'uaa ewueji enye: “Meitoki aekata ninye ashukunye ene,

¹²kake tiatua ine wueji netanapaki ninye aaya eyararoto, teine eye ninye, nemeitoki aekata ninye aigil adol ena kop.”

¹³“Woi ninye ilo oshet enkaji enye te ntorroni, o nkajijik enyena e shumata te lejare ilo oisho olelatia enye meisiaayia ninye te mpesho, nemeisho ninye olekoisiaayio lenye;

¹⁴ilo ojo, ‘Kashetaki nanu kewan enkaji sapuk tenebo inkajijik e shumata naalala’ naguetaki ilusien ninye neikod ninye too ltarakua, nael to ranki onyokie.

¹⁵Ijo iyie ira olaiguanani te nkaraki nishet inkajijik oo ltarakua? Keitu apa edaa papaai lino neokisho neas esipata o esupatisho? Neaku etaa sidai te ninye.

¹⁶Eiguanare ninye mbaa olaisinani ono lomena; neaku sidai. Aime nanu eyiolo tena? Olaitoriani ojo.

¹⁷Kake iata iyie inkonyek o ltau, te nkaraki ake, dupoto o e lejare o te nkibukoroto o sarge lemeeta entioto, o easata enkitorogonyare o larrabal.”

¹⁸Neaku nji ejo Olaitoriani tialo Yehoiakim olayioni le Yosia, olaiguanani le Yuda: “Meishiraki ninche ninye ejo, oi olalashe lai! Aashu ejo oi enkanashe ai!

¹⁹Meishiraki ninche ninye ejo, oi olkitok, anaa ejo oi oloyanyiti! Kenukari ninye anaa osikiria, eing'irtitori nenang'ari aaitogiroo nchomito e Yerusalem.”

²⁰“Ilepa shomo Lebanon, niyietu aishir, ailepunye oltoilo lino tiatua Bashan; nchira te Abarim, amu ore lelo lewa lang'at linono pooki neidaikieki.

²¹Aairorie nanu iyie tiatua karsisisho ino, kake itejo iyie, ‘Mainining nanu.’ Ena apa nataa enkoitoi ino ebaiki lelero ino, nchere eitu iyie ining oltoilo lai.

²²Kekutaa olkutati ilchekuti linono pooki, ore ilewa lang'at linono pooki nepuo eyararoto; nitum taa atukurru nindang te nkaraki entorroni ino pooki.

²³Iyie olomanya Lebanon oton tiatua iltarakua kebaa sii iyie enkigoroto tenelotu emion shumata iyie, emion naikununo anaa ene nkitok nasaisai!”

²⁴“Ore anaa enaishu Olaitoriani ojo, hoo naa ore Konia olayioni le Yehoiakim olaiguanani le Yuda, naa olgisoi omishirakino enkarna ai te nkaina ai e tatene, ore ake eyia, aidim nanu atopolosai

²⁵naaishooyo iyie apik atua enkaina e lelo ooing'oru enkishui ino, lelo liure iyie naapik atua enkaina e Nebukadnesa olaiguanani le Babilon o atua nkaik oo Lkaldayo.

²⁶Kaanang'aa nanu iyie o ina ng'utunyi nikitoiwuo iyie anang'aki atua ae kop, ine neitu apa kiinyieki, naa teine ilo iyie aye.

²⁷Kake ore ina kop nang'uar ninche pee eshukokino, meshukokino ninche.”

²⁸Amaa ele tung'ani oji Konia kemoti natemenayioki natadanye, entoki nemeshilaa hoo ng'ae? Kainyoo paa ore ninye o nkera enyena netanang'ayioki aaiturraa tiatua enkop nemeyiolo ninche?

²⁹Iyie na kop, na kop, na kop, toning'o ororei lo Laitoriani.

³⁰Nji ejo Olaitoriani: “Ngero ele tung'ani ajo meeta nkera, ele tung'ani lemedupoyu too nkolong'i enyena; amu meetae hoo obo tiatua eishoi enye odupoyu atonie olorika le nkitoo le Daudi, neitoki aitoreisho te Yuda.”